ޔުނައިޓެޑް ވިކްޓަރީ (ޔޫވީ) އަކީ މިހާރު ވަރުގަދަ ކުލަބެއް ކަމަށާއި، އެ ޓީމާ ދޭތެރޭ ފަސޭހަކޮށް ވިސްނެން ނެތް ކަމަށް ޓީސީ ސްޕޯޓްސް ކުލަބުގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.
ލީގުގައި މިހާތަނަށް ކުޅުނު ތިން މެޗުގެ ތެރެއިން ދެ މެޗުން އެ ޓީމު ބަލިވެފައިވާއިރު، އަނެއް މެޗު ނިމުނީ އެއްވަރުވެގެންނެވެ. އެއާއެކު ޔޫވީ އޮތީ ތާވަލުގެ ފުލުގައި އެންމެ ޕޮއިންޓަކާއެކުއެވެ. އަދި ޓީސީން މިހާތަނަށް ކުޅުނު ތިން މެޗުގެ ތެރެއިން އެއް މެޗުން މޮޅުވެފައިވާއިރު، އެ ޓީމަށް ވަނީ މިހާތަނަށް ހަތަރު ޕޮއިންޓް ލިބިފައެވެ.
ދިރާގު ދިވެހި ޕްރިމިއާ ލީގުގައި ހޯމަ ދުވަހުގެރޭ ޔޫވީއާ ދެކޮޅަށް ނުކުތުމުގެ ކުރިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ޝާޒްލީ ބުނީ ޔޫވީ އަކީ ތަޖުރިބާކާރު ކުޅުންތެރިންތަކެއް ތިބި ކުލަބެއް ކަމަށާއި، އެ ކުޅުންތެރިންނާއެކު ޔޫވީ އަކީ މިހާރު ވަރުގަދަ ކުލަބެއް ކަމަށެވެ. އެގޮތުން ޔޫވީގައި މިވަގުތު ރަނގަޅު މެދުތެރެއެއް އަދި ފޯވާޑް ލައިނެއް އެބައޮތް ކަމަށާއި، އޭގެ ތެރޭގައި އިސްމާޢިލް އީސަ (މެސީ) ހުރުން އެއީ ޔޫވީގެ ތަފާތެއް ކަމަށްވެސް ބުންޏެވެ.
ޔޫވީން ލީގުގައި ފުރަތަމަ ކުޅުނު ދެ މެޗުން ބަލިވީ ލީގުގައި އޮތް އެންމެ ވަރުގަދަ ދެ ކުލަބާއި ދެކޮޅަށް ކުޅެން ޖެހުމުންކަން ފާހަގަކުރަމުން ޝާޒްލީ ބުނީ ކުލަބު ވެލެންސިއާ އާއި މާޒިޔާ ސްޕޯޓްސް އެންޑް ރެކްރިއޭޝަން ކައިރިން ޔޫވީއަށް ފަހަތުން އަރައި މޮޅުވުމަކީ އުނދަގޫ ކަމެއް ކަމަށެވެ.
ޓީސީ މެޗުގެ ކުރިން ޔޫވީގެ ކޯޗު މުޙައްމަދު އާދަމް ބުނީ މި ސީޒަން ފެށުނީއްސުރެ ޔޫވީއަށް ދިމާވެފައިވާ އެންމެ ބޮޑު އެއް މައްސަލައަކީ އަނިޔާގެ މައްސަލަ ކަމަށާއި، އެގޮތުން ކުރިއަށް އޮތް ޓީސީ މެޗަށް ނުކުންނައިރުވެސް އަނިޔާގެ މައްސަލަ ޓީމުގައި އެބަހުރި ކަމަށެވެ.
މުޙައްމަދު އާދަމް އިތުރަށް ބުނީ ޔޫވީގެ ސްކޮޑަކީ ވަރުގަދަ ސްކޮޑެއް ކަމަށާއި، އެކަމަކު ޓީމުގެ ފުރަތަމަ އެގާރައަށް ކުޅޭ ކުޅުންތެރިންގެ ތެރެއިން ފަހެއް ނުވަތަ ހަތަރު ކުޅުންތެރިން ތިބީ އަނިޔާގައި ކަމަށެވެ. އެހެންނަމަވެސް އެ ކުޅުންތެރިން ނެތްތަން މެޗުން ނުފެންނާނެ ކަމަށްވެސް އޭނާ ބުންޏެވެ.
ދިރާގު ދިވެހި ޕްރިމިއާ ލީގުގައި ޓީސީ އާއި ޔޫވީ ބައްދަލުކުރާ މެޗު ފަށާނީ ހޯމަ ދުވަހުގެރޭ 21:00 ގައެވެ.
