ޓްރާންސްޕޯޓް މިނިސްޓްރީގެ ޝިމާޒަށް ކުރާ ތުހުމަތުގެ ރިޕޯޓް ރައީސް މައުމޫނަށް
3 ޖެނުއަރީ 2021 | އާދީއްތަ 13:49އެއްގަމު ހުރިހާ އުޅަނދެއްގައި މެޝިން ރީޑަބަލް ނަމްބަރު ޕްލޭޓް ހެދުން ވަސާޖިއޯ ކުންފުންޏަކަށް ހަވާލުކުރުން
ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒު އަލީ: ކޮރަޕްޝަންގެ ބޮޑެތި ތުހުމަތުތަކެއް ކުރެވޭ
ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމްގެ ސްލޮޓެއްގައި ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރަކަށް ހުންނެވި ޝިމާޒް އަލީއަށް ޓެންޑަރ ބޯޑުގެ ޗެއާމަން އިސްމާއިލް ޒަރިޔަންދު ކުރެއްވި ކޮރަޕްޝަންގެ ތުހުމަތުތަކުގެ ތަފްސީލު ރިޕޯޓެއް ރައީސް މައުމޫނަށް ފޮނުއްވައިފިއެވެ.
ޝިމާޒަށް ޒަރިޔަންދު ކުރައްވާ ތުހުމަތުތަކާގުޅިގެން، ރައީސް މައުމޫނަށް ޓެގް ކުރައްވައި މިދިޔަ ޑިސެމްބަރު މަހުގެ 21 ވަނަ ދުވަހު ޒަރިޔަންދު ކުރެއްވި ޓްވީޓެއްގައި ވިދާޅުވެފައިވަނީ، ޓްރާންސްޕޯޓު މިނިސްޓްރީގެ އެމްއާރުއެމްއަށް ނިސްބަތްވާ ފިރިހެން ޑިޕިޔުޓީ މިނިސްޓަރުގެ ޢަމަލުތަކުން؛ ދައުލަތުގެ ޤަވާއިދުތަކަށް ގޮންޖަހައި ކޮރަޕްޝަނަށް މަގުފަހިވާގޮތަށް ކަންކުރާކަން ހާމަވުމުގެ މަރުޙަލާގައި އެފަރާތާއިމެދު ގޮތެއް ނިންމަވައިދެއްވުން އެދޭ ކަމަށެވެ.
ޒަރިޔަންދުގެ އެ ޓްވީޓާއި ގުޅިގެން ރައީސް މައުމޫން ކުރެއްވި ޓްވީޓްގައި ވިދާޅުވެފައިވަނީ، އެ މައްސަލައިގެ ތަފުޞީލު އެމްއާރްއެމްގެ އޮފީހަށް ފޮނުއްވައި ދެއްވުމަށް އެދިވަޑައިގަންނަވާ ކަމަށެވެ.
ޝިމާޒަށް ކުރާ ތުހުމަތުގެ ތަފްސީލު ރިޕޯޓެއް ތައްޔާރު ކުރެއްވުމަށްފަހު، އާދިއްތަ ދުވަހު ޒަރިޔަންދު ވަނީ، އެ ރިޕޯޓް ރައީސް މައުމޫނަށާއި ރައީސުލްޖުމްހޫރިއްޔާގެ އޮފީހަށާއި އެންޓި ކޮރަޕްޝަން ކޮމިޝަން (އޭސީސީ)އަށް އޮޑިޓް އޮފީހަށް ފޮނުވާފައެވެ.
ޒަރިޔަންދުގެ ރިޕޯޓްގައި ޝިމާޒަށް މައިގަނޑު ތިން ތުހުމަތެއް ކޮށްފައިވެއެވެ. އޭގެ ތެރޭގައި، ވަޒީފާގެ މަސްޢޫލިއްޔަތުގެ ތެރޭގައި ހިމެނޭ ޒިންމާއެއްގެ ތެރެއިން އެ މަޤާމުގެ ނުފޫޒު ބޭނުންކޮށްގެން ޤާނޫނާއި ޤަވާއިދާއި ޚިލާފު ޢަމަލުތަކަކަށް އެއްބާރުލުންދިނުމާއި، އެ ޢަމަލުގެތެރެއިން ވަކިފަރާތަކަށް ނާޖާއިޒު ފައިދާ ހޯދާދިނުމަށް މަސައްކަތްކުރުން ހިމެނެއެވެ.
މީގެއިތުރުން، ޤާނޫނާއި ޚިލާފު ޕްރޮކިޔުމަންޓް ހަރަކާތެއްގެ ތެރެއިން ޤަވާއިދާއި ޚިލާފަށް އެވޯޑުކުރެވުނު މަސައްކަތެއްގެ އެއްބަސްވުމަކީ ދައުލަތުގެ މާލިއްޔަތުގެ ޤާނޫނާއި ގަވާއިދުތަކާއި ޚިލާފު އަދި އެ އެގްރީމެންޓް ހިންގުމުގައި ރައްޔިތުންނާއި ދައުލަތަށް ގެއްލުމެއް ކުރިމަތިވެދާނޭފަދަ ކަމެއްކަން އެނގޭ ހިނދު، އެ އެގްރީމެންޓް ބާތިލުނުކޮށް ބޭއްވުމަށް ބާރުއެޅުމާއި، އެ މަސައްކަތާއި މަތިކޮށް ދައުލަތުން އެތައް މިލިޔަން ރުފިޔާއެއްގެ ގެއްލުމުގެ ބަދަލު ދިނުމުގެ ފުރުސަތެއް ހުޅުވުމަށް މަގުފަހިކުރުމުގެ ރޭވުމެއް އޮތް އަމަލެއް ހިންގާފައިވާ ކަމުގެ ތުހުމަތުވެސް ޝިމާޒަށް ކޮށްފައިވެއެވެ.
ތިން ވަނަ ތުހުމަތެއްގެ ގޮތުގައި ފާހަގަކޮށްފައިވަނީ، އެއްގަމުގައި ދުއްވާ އުޅަނދުފަހަރުގެ ރަޖިސްޓްރީ ދޫކުރުމުގެ އިސް މަސްޢޫލިއްޔަތުތަކަކާއި ހަވާލުވެހުރެ، އެ ޚިދުމަތްދިނުމުގައި ދައުލަތުގެ މުވައްޒަފުންނާއި މުވައްޒަފުންނޫން ފަރާތްތައް މެދުވެރިކޮށް ޢާއްމުންގެ އަތުން ފައިސާ އަތުލަމުންދިޔުމުގެ ޢަމަލު ހިންގުމަށް މަގުފަހިކުރުމެވެ.
ޓްރާންސްޕޯޓް މިނިސްޓްރީގެ ތެރެއިން ކޮރަޕްޝަން ހިންގާކަމަށް ކުރެވޭ ތުހުމަތުތަކާއެކު، ޝިމާޒަށް އަމާޒުވި މައިގަނޑު ކޮރަޕްޝަންގެ މައްސަލަތަކަކީ، 68 މިލިއަން ރުފިޔާގެ ޕްރޮޖެކްޓެއްގެ ދަށުން ރާއްޖޭގައި ދުއްވާ އެއްގަމު ހުރިހާ އުޅަނދެއްގައި މެޝިން ރީޑަބަލް ނަމްބަރު ޕްލޭޓް ހެދުން ވަސާޖިއޯ ނަމަކަށް ކިޔާ ކުންފުންޏަކަށް ކޮރަޕްޝަނަށް މަގުފަހިވާ ގޮތަށް ދިން މައްސަލައާއި ހދ. ކުޅުދުއްފުއްޓާއި ހދ. ހަނިމާދުއަށް އާ ބަސްތަކެއް ގެންނަން ހަވާލުކުރި ކުންފުނިން ބާ ބަސްތަކެއް ގެނައި މައްސަލައިގެ އިތުރުން، 2019 ގައި އިނގިރޭސިވިލާތަށް ޓްރާންސްޕޯޓް މިނިސްޓްރީގެ އިސް ބޭފުޅުން ކުރެއްވި ދަތުރެއްގައި، ޝިމާޒްގެ މަގާމުގެ މަސްއޫލިއްޔާ ގުޅުން ނެތް އެ ދަތުރުގައި ކުއްލި ގޮތަކަށް އޭނާ އަށް ފުރުސަތު ލިބިވަޑައިގަތް ގޮތެވެ.
