ޖައްވަށް ބޭރުކުރާ ވިހަ ގޭސްތައް މަދުކުރުމަށް ރާއްޖެއިން "ނެޓް ޒީރޯ" ޓާގެޓް އިއުލާނުކުރުމާ ގުޅިގެން ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖު (ޔޫއެންއެފްސީސީސީ) ގެ އެކްސެކިއުޓިވް ސެކްރެޓަރީ ޕެޓްރީޝިއާ އެސްޕިނޯސާ ރާއްޖެއަށް މަރުހަބާ ކިޔުއްވައިފިއެވެ.
އެގޮތުން އެކަމަނާ ކުރެއްވި ޓްވީޓެއްގައި ވިދާޅުވެފައި ރާއްޖެއިން ވަނީ 2030 ވަނަ އަހަރަށް ނެޓް ޒީރޯ އެމިޝަން ޓާގެޓް ހާސިލުކުރުމަށް އަމާޒުކޮށް ރާއްޖެއިން އިއުލާނުކޮށްފައިވާ ނެޝަނަލީ ޑިޓަރމައިންޑް ކޮންޓްރިބިއުޝަން (އެންޑީސީ) އަކީ މިއީ ހާސިލުކުރެވޭ ކަމެއްކަމުގެ އުންމީދު ދައްކައިދޭކަމަށެވެ.
ޕެޓްރީޝިއާ މިހެން ވިދާޅުވެފައިވާ އިރު، އދ އިން ވަނީ ނެޓް ޒީރޯ ޓާގެޓް ރާއްޖެއިން އިއުލާން ކުރުމާ ގުޅިގެން ރާއްޖެއަށް މަރުހަބާ ކިޔައި އދ ގެ ފަރާތުން އެވެ.
ފާއިތުވި އަހަރު ކުރިއަށް ދިޔަ ކްލައިމެޓް އެމްބިޝަން ސަމިޓުގައި ވާހަކަފުޅުދައްކަވަމުން ބޭރުގެ ގައުމުތަކުގެ އެހީތެރިކަމާއި އެއްބާރުލުން ލިބިއްޖެނަމަ ރާއްޖެއަށް ގާތްގަނޑަކަށް 2030 ވަނަ އަހަރު "ނެޓް ޒީރޯ" އާއި ހަމައަށް ވާސިލުވެވިދާނެ ކަމަށް ރައީސުލްޖުމްހޫރިއްޔާ އިބްރާޙީމް މުހައްމަދު ސޯލިހު ވިދާޅުވެފައިވާއިރު، މިކަމުގައި ބޭރުގެ ގައުމުތަކުގެ އެހީތެރިކަމާއި އެއްބާރުލުން ބޭނުންވާނެ ކަމަށްވެސް ރައީސް ވަނީ ވިދާޅުވެފައެވެ.
މި ސަމިޓުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ރާއްޖެއިން އޮތީ މޫސުމީ ކަންކަމަށް އަންނަބަދަލުތައް ދެނެގަނެ އެކަން ކުޑަކުރުމަށް ކުރާ މަސައްކަތުގައި ކުރިމަތިވާނެ ދަތިތަކާއި ކުރިމަތިލުމަށް ފުރިހަމަ ތައްޔާރުވެގެން ކަމަށާއި އެހެން ގައުމުތަކާއި ހިލާފަށް ރާއްޖެއަކީ މިހާރުވެސް މޫސުމީ ބަދަލުތަކުގެ ސަބަބުން ނޭދެވޭ އަސަރުތައް ކުރަމުންދާ ގައުމަކަށްވާތީ އެކަންކަން ކުޑަކުރުމަށް އަޅަންޖެހޭ ފިޔަވަޅު އެޅުއްވުމަށް ރާއްޖެއަށް ވަނީ މަޖުބޫރުވެފައި ކަމަށް ވިދާޅުވެފައެވެ.
ރައީސް ސޯލިހް ވަނީ ނެޓް ޒީރޯ ކަނޑައެޅުން މިއީ ރަނގަޅު ފެށުމެއްކަމުގައި ދެކިގެން މުސްތަގުބަލުގައި މިއަށްވުރެ ބޮޑު ތަސައްވަރަކާއިއެކު މަސައްކަތްކުރައްވާނެކަމުގެ ޔަގީންކަން އަރުވާފައެވެ.
