މަސީހުގެ އިތުބާރު ނެތް މައްސަލަ: ކެބިނެޓް މިނިސްޓަރުން ސޯޝަލް މީޑިޔާގައި ވަަރަށް ހަރަކާތްތެރި!

މަޖިލީހުގެ ރައީސްގެ އިތުބާރު ނެތް ކަމުގެ މައްސަލައާ އެކު ކެބިނެޓްގެ މިނިސްޓަރުންގެ ގިނަ ފާޑުކިޔުންތަކެއް އިދިކޮޅު ފަރާތްތަކަށް އަމާޒުވެއްޖެ އެވެ.

މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ މިދިޔަ ހޯމަ ދުވަހު ރައްޔިތުންގެ މަޖިލީހަށް ހުށަހެޅުމާ އެކު ސޯޝަލް މީޑިޔާގެ އެކި ޕްލެޓްފޯމްތަކުގައި ގިނަ މިނިސްޓަރުން ގެންދަވަނީ ތަފާތު ގޮތްގޮތަށް ޝުއޫރުތައް ފާޅު ކުރައްވަމުންނެވެ. ސޯޝަލް މީޑިއާގެ އިތުރުން ގައުމީ ޓީވީ އާއި ސަރުކާރަށް ތާއިދުކުރާ ޓީވީތަކުގައި ވެސް ވަޒީރުން ގެންދަވަނީ އިދިކޮޅު ފަރާތްތަކަށް ރައްދު ދެއްވަމުންނެވެ.

އިކޮނޮމިކް މިނިސްޓަރ މުހައްމަދު ސައީދު ކުރައްވާފައި ޓްވީޓެއްގައި ވަނީ ސަރުކާރުން ބްރިޖްތައް އަޅައި، ރައްޔިތުންގެ ދިރިއުޅުމުގެ އާއްމު ހާލަތު ރަގަޅު ކުރަމުންގެންދާ ކަމަށާއި މި ސަރުކާރުގެ ޕްލޭންގެ ތެރެއިން މާޒީގެ ވީރާނާވެ ހާލާކުވެފައިވާ މުސްތަގްބަލާއި، ފެއިލްވެފައިވާ ލީޑަރުންގެ ކިބައިން ސަލާމަތްކޮށް އުޖާލާ މުސްތަގްބަލަކަށް ގައުމު ގެންގޮސްދޭނެ ކަމަށް ވަނީ ވިދާޅުވެފަ އެވެ

މިނިސްޓަރ ސައީދު މިހެން ވިދާޅުވެ ޓްވީޓްކުރެއްވީ އެއަރޕޯޓްގެ ހިއްކިފައިވާ ބިމުގެ ފޮޓޯގެ އިތުރުން އައިޖީއެމްއެޗުގެ 25 ބުރީގެ އިމާރާތުގެ ފޮޓޯތަކަކާ އެކު އެވެ.

މީގެ އިތުރުން މިނިސްޓަރ ސައީދު ވިދާޅުވީ، މިއުޅެނީ މަޖިލީހުގެ ރައީސްގެ މައްސަލައެއް ނޫން ކަމަށާއި މަދު ވިޔަފާރިވެރިއެއް ދައުލަތަށް ދައްކަން ޖެހޭ ފައިސާ ނުދައްކަން ދައްކާ ބަހަނާއެއް ކަަމަށެވެ. ބެލެވޭ ގޮތުގައި ސައީދުގެ މި ބަހުގެ ހަމަލާ އަމާޒުކުރައްވާފައި ވަނީ ކުރިން ސައީދު އެ ބޭފުޅެއްގެ ދަށުގައި މަސައްކަތްކުރައްވައި އަދި މިނިސްޓަރު ކަމަށް ސައީދު ގެންނެވުމުގައި އިސްކޮށް ހުންނެވި ޖުމްހޫރީ ޕާޓީގެ ލީޑަރު ގާސިމް އިބްރާހީމަށެވެ.

ހައުސިން މިނިސްޓަރ ޑރ. މުހައްމަދު މުއިއްޒު ކުރައްވާފައިވާ ޓްވީޓެއްގައި ވަނީ ރިޝްވަތު ދީގެން މަޖިލީހުގެ ރައީސް ބަދަލު ކުރަން އުޅުމަކީ ގޮތް ހުސްވެފައިވާ ކަން ދައްކުވައިދޭ ނާތަހުޒީބު ފިނޑި އަމަލެއް ކަމަށެވެ. މިހެން ވިދާޅުވެ، ރައީސް ޔާމީން 2018 ޓެގް ކުރައްވާފައިވާ އިރު މަޖިލީހުގެ ރައީސް ވަކިކުރަން އުޅެނީ ސިޔާސީ އަދި މާލީ އަމިއްލަ ފައިދާތަކެއް ނަހަމަ ގޮތުގައި ހޯދަން ބޭނުންވެގެން އުޅޭ، ގައުމަށް ހެޔޮ ނޭދޭ ބައެއް ކަމަށް ވެސް ހައުސިން މިނިސްޓަރ ވިދާޅުވެފައި ވެއެވެ.

އެންވަޔަރމެންޓް މިނިސްޓަރ ތޯރިގް އިބްރާހިމް ކުރައްވާ ޓްވީޓުގައި ވަނީ ގާނޫނީ އިމުގެ ތެރެއިން އިދިކޮޅު ވާދަވެރިން ސިޔާސީ ހަރަކާތްތައް ހިނގައިގެން ރައީސް ޔާމީނުގެ ސަރުކާރުގެ ބައްޔެއް ނުކުރެވޭނެ ކަމަށެވެ.

މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ މަޖިލީހަށް ވެއްދުމާ ގުޅިގެން ހޯމް މިނިސްޓަރ އަޒްލީން އަހްމަދު ވިދާޅުވީ، ވެރިކަމުގެ ދަހިވެތިކަމުގައި މަޖިލީހުގެ ރައީސް ވަކިކުރަން މަސައްކަތް ކުރަނީ ގޮތް ހުސްވެގެން، ކުރެވޭނެ އެހެން ކަމެއް ނެތިގެން ކަމަށެވެ.

މީގެ އިތުރުން ފިޝަރީސް މިނިސްޓަރ ޑރ. މުހައްމަދު ޝައިނީ ވަނީ މަޖިލީހުގެ ބައެއް މެންބަރުންނަށް ފާޅުގައި ފާޑުކިޔާފަ އެވެ. އެގޮތުން އެންމެ ހިތާމަކުރަނީ މެންބަރު ސިނާނާއި މެންބަރު އިލްހާމް މަސީހުގެ އިތުބާރު ނެތް ކަމުގެ މައްސަލައިގައި ސޮއި ކުރެއްވުމުން ކަމަށް ވަނީ ހާމަކުރައްވާފަ އެވެ.

މީގެ އިތުރުން، ހެލްތު މިނިސްޓަރ ވެސް ވަނީ، މިކަމާ ގުޅޭ ގޮތުން ހިޔާލުފާޅުކުރައްވާފަ އެވެ. އެގޮތުން އިިދިކޮޅު ފަރާތްތަކަށް ހަޖަމް ނުވެގެން އުޅެނީ ރައީސް ޔާމީން ގެނެސްދެއްވާ ތަރައްގީ ފެނުމުން ކަމަށާއި އެމީހުން މަސައްކަތަކީ އެކަމަށް ހުރަސް އެޅުން ކަމަށެވެ.