ލިވަޕޫލުގައި މަޑުކުރުމާ މެދު ވައިނަލްޑަމް ގޮތެއް ނިންމަނީ
30 ޑިސެމްބަރު 2020 | ބުދަ 10:37ވައިނަލްޑަމް ލިވަޕޫލުގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށް
ލިވަޕޫލަށް ކުޅެމުން އަންނަ ނެދަލެންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް
ލިވަޕޫލުގައި މަޑުކުރުމާ މެދު ނެދަލެންޑްސްގެ މިޑްފީލްޑަރު ޖޯޖީނިއޯ ވައިނަލްޑަމް މި ހަފުތާގައި ވަކިގޮތެއް ނިންމާނެ ކަމަށް ރިޕޯޓުތައް ބުނެފިއެވެ.
އުމުރުން 30 އަހަރުގެ ވައިނަލްޑަމް މި ވަގުތު ލިވަޕޫލުގެ އެއްބަސްވުމުގައި ހުރީ އަންނަ އަހަރުގެ ހޫނު މޫސުމުގެ ނިޔަލަށެވެ. އެހެންކަމުން ލިވަޕޫލުން އަންނަނީ އޭނާގެ އެއްބަސްވުން އާކުރުމަށް މަސައްކަތް ކުރަމުންނެވެ.
އެކަމަކު ވައިނަލްޑަމް ހޯދުމަށް ބާސެލޯނާއިން އަންނަނީ މަސައްކަތް ކުރަމުންނެވެ. ވައިނަލްޑަމަކީ ބާސާގެ މިހާރުގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ. އަދި މީގެ ކުރިން ބަޔާން މިއުނިކް ކުޅެމުން އައި ސްޕެއިނުގެ މިޑްފީލްޑަރު ތިއާގޯ އަލްކަންޓާރާ ހޯދުމަށްވެސް ބާސާއިން މަސައްކަތް ކުރިއިރު، މިދިޔަ ހޫނު މޫސުމުގެ ޓްރާންސްފާގައި އޭނާ ބަދަލުވީ ލިވަޕޫލަށެވެ. އެހެންކަމުން ވައިނަލްޑަމް ހޯދުމަށް މިދިޔަ ޓްރާންސްފާގައިވެސް ބާސާއިން ވަނީ މަސައްކަތް ކޮށްފައެވެ.
ވައިނަލްޑަމަށް ބާސާއިން ޝައުގުވެރިވި ނަމަވެސް، ރިޕޯޓުތައް ބުނާ ގޮތުން ވައިނަލްޑަމް ބޭނުންވަނީ ދިގު މުއްދަތަކަށް ލިވަޕޫލުގައި މަޑުކުރުމަށެވެ. އެހެންކަމުން މި ހަފުތާގައި އެއްބަސްވުމާ ގުޅޭ ގޮތުން ވައިނަލްޑަމް ވަކިގޮތެއް ނިންމާނެ ކަމަށްވެސް ވަނީ ރިޕޯޓުކޮށްފައެވެ.
މީގެ ކުރިން ނިއުކާސަލް ޔުނައިޓެޑަށްވެސް ކުޅުނު ވައިނަލްޑަމް ލިވަޕޫލަށް ބަދަލުވީ 2016 ވަނަ އަހަރުއެވެ. އޭނާ ވަނީ މިހާތަނަށް ލިވަޕޫލަށް ކުޅެދިން 208 މެޗުގައި 20 ލަނޑު ކާމިޔާބުކޮށްފައެވެ. އަދި ލިވަޕޫލުން މިދިޔަ ސީޒަނުގެ އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕް ކާމިޔާބުކުރިއިރު ވައިނަލްޑަމްގެ ހިއްސާ ބޮޑެވެ.
