ޓޮޓެންހަމުން ޗެލްސީއާ ދެމެދު އޮތް ފަރަގު ހަތް ޕޮއިންޓަށް ކުޑަކޮށްފި

އިނގިރޭސި ޕްރިމިއާ ލީގުގައި ޓޮޓެންހަމުން ބާންލީގެ މައްޗަށް ކުރިހޯދައި އެއްވަނާގައި އޮތް ޗެލްސީއާ ދެމެދު އޮތް ފަރަގު ހަތް ޕޮއިންޓަށް ކުޑަކޮށްފި އެވެ.

ހޮނިހިރު ދުވަހުގެ ރޭ ކުޅުނު މެޗުން ޓޮޓެންހަމް މޮޅުވީ 0-2 ގެ ނަތީޖާއަކުންނެވެ. މެޗުގެ ފުރަތަމަ ހާފްގައި ދެޓީމުގެ ފަރާތުންވެސް ފެނިގެން ގޮސްފައިވަނީ ދާދި ހަމަހަމަ ކުޅުމެކެވެ. ދެޓީމަށްވެސް ލީޑު ނަގާނެ ގިނަ ފުރުސަތުތަކެށް ލިބުނު ނަމަވެސް އެ ފުރުސަތުތައް ވަނީ ބޭކާރުވެފަ އެވެ.

ނަމަވެސް ދެވަނަ ހާފްގައި ޓޮޓެންހަމްއިން ކުޅުން އިތުރަށް ވަރުގަދަކޮށް މެޗްގެ ލީޑް ނެގި އެވެ. މިލަނޑު 66 ވަނަ މިނެޓުގައި ޓޮޓެންހަމްއަށް ކާމިޔާބުކޮއްދިނީ އެރިކް ޑަޔާ އެވެ. އޭނާ މި ލަނޑު ކާމިޔާބުކުރީ ޓޮޓެންހަމްއަށް ލިބުނު ކޯނަރެއްގެ ބޭނުން ހިފައިގެންނެވެ. އޭގެ ދިހަ މިނެޓް ފަހުން ޓޮޓެންހަމްއިން ވަނީ އަނެއްކާވެސް ލަނޑެށް ކާމިޔާބުކޮށް ލީޑު ފުޅާކޮށްފަ އެވެ. މިލަނޑު އެޓީމަށް ކާމިޔާބުކޮށްދިނީ ހިއުން މިން ސަން އެވެ.

ޓޮޓެންހަމްއިން ހޮނިހިރު ދުވަހުގެ ރޭ މުހިންމު މޮޅެށް ހޯދިއިރު މެންޗެސްޓާ ޔުަނައިޓެޑް ވަނީ ކުޅުނު މެޗުން އެއްވަރުވެ ފަސްވަނާގައި ދެމިއޮވެވޭނެ ކަމާމެދު ބިރުހީވެފަ އެވެ. ވެސްޓް ބްރޯވްންވިޗް އާ ދެކޮޅަށް މެންޗެސްޓަ ކުޅުނު މެޗު ނިމުނީ ދެޓީމުންކުރެ އެއްވެސް ޓީމަކަށް ލަނޑެށް ނުޖެހި އެއްވަރު ވެގެންނެވެ. އެހެންކަމުން އާދީއްތަ ދުވަހު އާސެނަލްއާ ސިޓީ ބައްދަލުކުރާ މެޗް އާސެނަލުން ކާމިޔާބުކޮއްފިނަމަ މެންޗެސްޓާ ޔުނައިޓެޑް އަލުން ތާވަލުގެ ހަ ވަނައަށް ވެއްޓުން ގާތެވެ.

ހޮނިހުރު ދުވަހު ރޭ ކުޅުނު އެހެން މެޗްތަކަށް ބަލާއިރު ހަލް ސިޓީ ވަނީ ވެސްޓް ބްރޯވްން އަތިން 2-1 ގެ ނަތީޖާއިން މޮޅުވެފަ އެވެ. ލެސްޓާ ސިޓީއިން 2-0 ގެ ނަތީޖާއަކުން ސްޓްރޯކް ސިޓީގެ މައްޗަށް ކުރި ހޯދިއިރު ސަންޑަލޭންް އަތުން ވަޓްފޯޑް ވަނީ 1-0 އިން މޮޅުވެފަ އެވެ.

ހޮނިހިރު ދުވަހުގެ މެޗްތަކަށްފަހު ޕޮއިންޓް ތާވަލަށް ބަލާއިރު އެއްވަނާގައި އަދިވެސް އޮތީ ޗެލްސީ އެވެ. ޗެލްސީއަށް ކުޅުނު 29 މެޗުން ލިބިފައިވަނީ 69 ޕޮއިންޓް އެވެ. ދެވަނާގައި އޮތް ޓޮޓެންހަމް އަށް ކުޅުނު 29 މެޗުން ލިބިފައިވަނީ 62 ޕޮއިންޓް އެވެ. ތިންވަނާގައި އޮތް ލިވަޕޫލަށް ކުޅުނު 30 މެޗުން 59 ޕޮއިންޓް ލިބިފައި ވާއިރުހަތަރު ވަނާގައި އޮތް މެންޗެސްޓާ ސިޓީއަށް ކުޅުނު 28 މެޗުން ލިބިފައި ވަނީ 57 ޕޮއިންޓް އެވެ.