ކްރޮއޭޝިއާއަށް އަންގާރަ ދުވަހު އައި 6.4 މެގްނެޓިއުޑްގެ ބިންހެލުމުގައި ހަތް މީހުން މަރުވެއްޖެއެވެ.
ރިޕޯޓްތައް ބުނާ ގޮތުން ކްރޮއޭޝިއާގެ މެދުތެރެއަށް އައި ބިންހެލުމުގައި ހަތް މީހުން މަރުވެ 20ށް ވުރެ ގިނަ މީހުންނަށް ވަނީ ހާނިއްކާވެފައެވެ. އަދި ބިންހެލުމުގެ ސަބަބުން ގިނަ އިމާރާތްތަކެއް ވެއްޓި ބިމާއި ހަމަވެފައިވާއިރު، މީހުން ސަލާމްތް ކުރުމަށް އެގައުމުގެ ސިފައިންނާއި ރެސްކިއު ޓީމުން ގުޅިގެން އަންނަނީ މަސައްކަތް ކުރަމުންނެވެ.
ކްރޮއޭޝިއާގެ ބޮޑުވަޒީރުގެ ނައިބް މެޑްވެޑް ގްލީނާ ވިދާޅުވީ މި ބިންހެލުމުގެ ސަބަބުން ގެއްލުންވި ފަރާތްތަކަށް އެހީތެރިކަން ފޯރުކޮށްދިނުމަށް އެގައުމުގެ ސަރުކާރުން ނިންމާފައިވާ ކަމަށާއި، މިހާތަނަށް އައިއިރު 12 އަހަރުގެ ކުޑަ އަންހެން ކުއްޖަކާއިއެކު ހަ މީހުން މަރުވެފައިވާ ކަމަށެވެ. އެކަމަކު އޭގެ ފަހުން މީހުން ސަލާމަތް ކުރާ ޓީމުން ވަނީ އިތުރު މީހެއްގެ ހަށިގަނޑު ފެނިފައިވާކަން ހާމަކޮށްފައެވެ.
ކްރޮއޭޝިއާގެ ފުލުހުން ބުނީ ބިން ހެލުމުގެ ސަބަބުން މިހާތަނަށް ވިހި މީހަކަށް އަނިޔާވެގެން ހޮސްޕިޓަލަށް ގެންގޮސްފައިވާ ކަމަށާއި، ވެއްޓިފައިވާ އިމާރާތްތަކުގެ އަޑިން އިތުރު މީހުން ފެނުމުގެ ފުރުސަތު އެބައޮތް ކަމަށެވެ.
ކްރޮއޭޝިއާގެ ބޮޑުވަޒީރު އަންޑްރޭ ޕްލޭންކޮވިޗް ވިދާޅުވީ ބިންހެލުން އައި ސަރަހައްދުން އެހެން ސަރަހައްދުތަކަށް މީހުން ބަދަލުކުރަން ޖެހިދާނެ ކަމަށެވެ.
ކްރޮއޭޝިއާގެ މެދުތެރެއަށް ހޯމަ ދުވަހުވެސް ވަނީ 5.2 މެގްނެޓިއުޑްގެ ބިންހެލުމެއް އައިސްފައެވެ.
މީގެ ކުރިން މި އަހަރުގެ މާޗު މަހުވެސް ވަނީ އެގައުމަށް 5.3 މެގްނެޓިއުޑްގެ ބާރުގަދަ ބިންހެލުމެއް އައިސްފައެވެ. އެ ބިންހެލުމުގައި އެކަކު މަރުވެ 27 މީހުންނަށް ވަނީ އަނިޔާވެފައެވެ.
