ކޮރޯނާވައިރަސްގެ މުޅިން އައު ސްޓްރެއިން އެއް ނައިޖީރިޔާއިން ފެނިފައިވާކަމަށް އެފްރިކާގެ ޑިޒީސް ކޮންޓްރޯލް ބޮޑީގެ ވެރިޔާ ޖޯން ނިކެންގަސޮންގ ވިދާޅުވެއްޖެއެވެ.
މިވައިރަސްގެ ކަންކަން އިތުރަށް ބަލަމުން އަންނަކަމަށާއި ރައްކާތެރިވުމުގެ އިތުރު ފިޔަވަޅުތައް އެޅުމަށްވެސް ޖޯން ވަނީ ގޮވާލައްވާފައެވެ.
ކޮރޯނާވައިރަސްގެ އައު ސްޓްރެއިން އެއް ނައިޖީރިޔާ އިން ފެނިފައި މިވަނީ ވައިރަސްގެ އައު ސްޓްރެއިން އެއް އިނގިރޭސިވިލާތާއި ދެކުނު އެފްރިކާ އިން ފެނިފައިވަނިކޮށެވެ. އެއާއެކު ރައްކާތެރިކަމުގެ އިތުރު ފިޔަވަޅުތަކެއް ވަނީ ގައުމުތަކުން އަޅާފައެވެ. އޭގެތެރޭގައި ދަތުރުފަތުރުކުރުން މަނާކުރުން ހިމެނެއެވެ.
"މިއީ އިނގިރޭސިވިލާތާއި ދެކުނު އެފްރިކާއިން ފެނިގެން މިއުޅޭ ސްޓްރެއިން އާއި ތަފާތު ސްޓްރެއިން އެއް." އޮންލައިންކޮށް ކުރިޔަށް ގެންދިޔަ ނޫސްވެރިންގެ ބައްދަލުވުމެއްގައި ޖޯން ވިދާޅުވިއެވެ.
އަލަށް ފެނިގެން މިއުޅޭ ވޭރިއެންޓްގެ އަދި ފެނިފައިވަނީ ވަރަށް މަދު ކޭސްތަކެއް ކަމަށް ޖޯން ވިދާޅުވިއެވެ. އެހެންކަމުން މިވައްތަރުގެ ސްޓްރެއިން އިތުރަށް ދިރާސާކުރުމަށް އިތުރު ސާމްޕަލްތައް ދިރާސާކުރާނެކަމަށް ޖޯން ވިދާޅުވިއެވެ. އަލަށް ފެނުނު އައު ސްޓްރެއިންގެ ޖިނޯމިކް ސީކުޔެންސް ނައިޖީރިއާއިން ވަނީ މިހާރު ހާމަކޮށްފައެވެ.
މިއައު ވޭރިއަންޓް ބިނާވެގެންވަނީ ދޭއް ނުވަތަ ތިން ޖެނެޓިކް ސީކުޔެންސްގެ މައްޗަށް ކަމަށް ރިޕޯޓްތައް ބުނެއެވެ.
އޭއެފްޕީން ރިޕޯޓްތައް ބުނާގޮތުން އައު ސްޓްރެއިން ފެނިފައިވަނީ ދެ މީހެއްގެ ފުށުންނެވެ. އެއީ އޮގަސްޓް މަހުގެ 3 ވަނަ ދުވަހު އަދި އޮކްޓޯބަރ މަހުގެ 9 ވަނަ ދުވަހު ނަގާފައިވާ ސާމްޕަލްތަކަކުންނެވެ.
އިނގިރޭސިވިލާތުން ފެނިފައިވާ ވޭރިއަންޓް ހާ އަވަހަށް މިވޭރިއެންޓުން ވައިރަސް ފެތުރޭކަން އަދި މިހާތަނަށް އައިއިރު ދެނެގަނެވިފައި ނުވާކަމަށް އޭއެފްޕީން ވަނީ ރިޕޯޓްކޮށްފައެވެ. އަދި މިހާރު ނައިޖީރިޔާގައި ފެންނަމުންދާ ކޭސްތަކަކީ މި ވޭރިއެންޓްގެ ސަބަބުން ފެންނަމުންދާ ކޭސްތަކެއްކަން އަދި ހޯދިފައިނުވާކަމަށްވެސް އޭއެފްޕީން ވަނީ ބުނެއެވެ.
ނައިޖީރިއާއަކީ އެފްރިކާގައި އެންމެ އާބާދީ ބޮޑު ގައުމެވެ. 200 މިލިއަން މީހުންގެ އާބާދީއެއް ހިމެނޭ ނައިޖީރި އާއިން މިހާތަނަށް ފެނިފައިވަނީ ކޮރޯނާވައިރަސްގެ މަދު ކޭސްތަކެކެވެ. އެގައުމުން މިހާތަނަށް އައިއިރު 80،000 މީހުންނަށް ވައިރަސް ޖެހިފައިވާއިރު ދުވާލެއްގެ މައްޗަށް ވައިރަސް ޖެހޭ މީހުންގެ އަދަދު ހާހަކަށްވުރެ މަތި ވެފައިވަނީ މިމަސްތެރޭގައެވެ. އެގޮތުން ފާއިތުވި ހަފްތާތެރޭގައި އެގައުމުގައި ވައިރަސް ޖެހޭ މީހުންގެ އަދަދުވަނީ 52 އިންސައްތަ އިތުރުވެފައެވެ.
