ޑީއާރްސީގައި އެބޯލާ ބަލީގެ އައުޓްބްރޭކް އިއުލާންކޮށްފި
ޑީއާރްސީ ގައި އެންމެ ފަހުން އެބޯލާ ބަލީގެ ނުރައްކާ ބޮޑުވެފައި ވަނީ 2014 ގައި، އެފަހަރު 40 އަށް ވުރެ ގިނަ މީހުން މަރުވި
އޮފިޝަލަކު ކުއްޖަަކަށް ފަރުވާ ދިނުމަށްޓަކައި ރައްކާތެރި ސަރަހައްދަކަށް ގެންދަނީ
މެދުތެރޭ އެފްރިކާގެ ގައުމެއް ކަމަށްވާ ޑިމޮކްރެޓިކް ރިޕަބްލިކް އޮފް ކޮންގޯ (ޑީއާރްސީ) ގައި އެބޯލާ ވައިރަސް ބަލީގެ އައުޓްބްރޭކް އިއުލާންކޮށްފިއެވެ.
ޑީއާރްސީގައި އެބޯލާ އައުޓްބްރޭކް އިއުލާން ކުރިއިރު އެކަކު ބަލީގައި މަރުވެފައި ވެއެެެވެ. ރިޕޯޓުތައް ބުނާ ގޮތުން އިތުރު ދެމީހަކު ވެސް ބަލީގައި މަރުވެފައިވާ ކަމަށް ބެލެވޭ ކަމަށް ވެސް ރިޕޯޓުތައް ބުނެއެވެ.
ޑީއާރްސީގެ ސިއްހަތާ ބެހޭ ވުޒާރާއިން ބުނީ ނިމިދިޔަ އޭޕްރީލް ފަހުކޮޅުގައި މަރުވެފައިވާ މީހާ ބައްޔަށް ޕޮޒިޓިވް ވީ ކަން އެނގުނީ، ޑީއާރްސީގެ އުތުރުއިރުމަތީގެ ބަސް-އުއެލޭ ޕްރޮވިންސްގައި ކުރި ޓެސްޓްތަކަށް ފަހުގައި ކަމަށެވެ. އެމީހާއާ އެކު އިތުުރު ނުވަ މީހަކު އެ ދަނޑިވަޅުގައި އެބޯލާ ބައްޔަށް ޓެސްޓުތައް ކުރިއެވެ.
ޑީއާރްސީ ގައި ހަރަކާތްތެރިވާ ޑަބްލިޔުއެޗްއޯގެ ރެޕްރެޒެންޓެޓިވް ޑރ. އަލަރަންގާރް ޔޮކުއިޑޭ ވިދާޅުވީ ބަލީގެ އަސަރު ހުރި "ލިކަޓީ" ސަރަހައްދަށް އެބޯލާ ބައްޔާ ގުޅޭ ސްޕެޝަލިސްޓުން ހޮނިހިރު ދުވަހު ދާނެ ކަމަށެވެ.
ހުޅަނގު އެފްރިކާ ގައުމުތަކުގައި 2013 އިން ފެށީގެން މިހާތަނަށް އެބޯލާ ބަލީގައި 11300 އަށް ވުރެ ގިނަ މީހުން މަރުވެފައި ވެއެވެ.
އެބޯލާއަށް، "އެބޯލާ ހެމެރެޖިކް ފީވާ"، ވެސް ކިޔައެވެ. އެއީ ހުންއައިސް ހަށިގަނޑުން ލޭ ފައިބާތީއެވެ. މިއީ ވަރަށް ފަސޭހައިން ގައިން ގަޔަށް އަރާ އަދި ފުރާނައަށް ނުރައްކާކުރާ ބައްޔެކެވެ. މި ވައިރަސް ހަށިގަނޑުގެ ދިފާޢީ ނިޒާމު ގަޑުބަޑުކޮށްލައެވެ. ނަތީޖާއެއްގެ ގޮތުން ހަށިގަނޑުން ލޭ ފޭބުމާއި ގުނަވަންތައް ފޭލްވުމާއި އަދި އެންމެ ފަހުން މަރާކުރިމަތިލުން ގާތެވެ. ހާއްސަކޮށް މި ބަލި ފެތުރެނީ އެފްރިކާގެ ފަގީރު ސަރަހައްދުތަކުގައި ކަމުން އެކަށީގެންވާ ފަރުވާ ނުދެވުމަކީ ވެސް މި ބަލީގެ ނުރައްކާ ބޮޑުވާން މެދުވެރިވާ ސަބަބެކެވެ.
