ސަސް އަކީ ސަޕްރައިޒިން ޓީމެއް: ޝާޒްލީ

މި ފަހަރުގެ ދިރާގު ދިވެހި ޕްރިމިއާ ލީގުގައި އަލަށް ވާދަކުރާ ސުޕަ ޔުނައިޓެޑް ސްޕޯޓްސް (ސަސް) އަކީ ސަޕްރައިޒިން ޓީމެއް ކަމަށް ޓީސީ ސްޕޯޓްސް ކުލަބުގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.

ފުރަތަމަ ޑިވިޝަނުގައި މުޅިން އަލަށް ސަސް ވާދަކުރަމުން އައި ނަމަވެސް، އެ ޓީމުން މި ފަހަރުގެ ސީޒަނާ ކުރިމަތިލާފައިވަނީ ތަޖުރިބާކާރު ސްކޮޑަކާއެކެއެވެ. އަދި ލީގުގައި މިހާތަނަށް މެޗަކުން އެ ޓީމު ބަލިވެފައި ނުވާއިރު، ފުރަތަމަ މެޗުގައި ވަނީ ވަރުގަދަ ކުލަބު އީގަލްސް 1-0 ގެ ނަތީޖާއަކުން ބަލިކޮށްފައެވެ. އަދި ދެވަނަ މެޗުގައި ދަ ގްރާންޑޭ ސްޕޯޓްސް ކުލަބާ ވާދަކުރިއިރު، އެ މެޗު ނިމުނީ 1-1 ން ދެ ޓީމު އެއްވަރުވެގެންނެވެ.

ލީގުގައި ހުކުރު ދުވަހުގެރޭ ސަސްއާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ޝާޒްލީ ބުނީ ޓީސީގައި މި ފަހަރު އޮތީ ވަރަށް ޒުވާން ސްކޮޑެއް ކަމަށާއި، އެކަމަކު ވަރަށް އިތުބާރުކުރެވޭ މޮޅެތި ކުޅުންތެރިން ސްކޮޑުގައި އެބަތިބި ކަމަށެވެ. އެހެންކަމުން ޓީމު ހަމައަކަށް އެޅެން ވަގުތު ކޮޅެއް ނަގާ ކަމަށްވެސް ޝާޒްލީ ބުންޏެވެ.

ޝާޒްލީ އިތުރަށް ބުނީ މިހާތަނަށް ސަސްގެ ކުޅުމަށް ބަލާލާއިރު، އެ ޓީމު ފެންނަނީ ވަރަށް ވަރުގަދަ ޓީމެއްގެ ގޮތުގައި ކަމަށެވެ. އެހެކަމުން އެ ޓީމަކީ މި ފަހަރުގެ ލީގުގައި ވާދަކުރަމުން އަންނަ ސަޕްރައިޒިން ޓީމެއް ކަމަށްވެސް ޝާޒްލީ ބުންޏެވެ.

ސަސްއާ ދެކޮޅަށް ޓީސީ ނުކުންނައިރު، އެ ޓީމުން ވަނީ މިހާތަނަށް ލީގުގައި ތިން ޕޮއިންޓް ހޯދާފައެވެ. އެގޮތުން ފުރަތަމަ މެޗުގައި ދަ ގްރާންޑޭ އަތުން 3-0 ބަލިވި ނަމަވެސް، އެ ޓީމުން ވަނީ ދެވަނަ މެޗުގައި އިގާލްސް އަތުން 2-0 ން މޮޅުވެފައެވެ.

ޓީސީ މެޗުގެ ކުރިން ސަސްގެ ކޯޗު އަޙްމަދު ނާޝިދު (ނާދު) ބުނީ ކުރިއަށް އޮތް ޓީސީ މެޗަކީ ލީގުގެ ފުރަތަމަ ބުރުގައި ސަސްއަށް ކުރިމަތިލަންޖެހޭނެ އެންމެ މުހިންމު އެއް މެޗު ކަމަށެވެ. އެހެންކަމުން މި މެޗަށް ޓީމު އޮތީ ވަރަށް ރަނގަޅަށް ތައްޔާރުވެފައި ކަމަށާއި، ޓީމުގައި ކުދިކުދި އަނިޔާތައް އުޅުނު ނަމަވެސް، މެޗާ ކުރިމަތިލާއިރު ކުޅުންތެރިންގެ ފިޓްނަސް ވަރަށް ރަނގަޅު ކަމަށްވެސް ނާދު ބުންޏެވެ.

ދިރާގު ދިވެހި ޕްރިމިއާ ލީގުގައި ޓީސީ އާއި ސަސް ބައްދަލުކުރާ މެޗު ފަށާނީ ހުކުރު ދުވަހުގެރޭ 21:00 ގައެވެ.