ކޮވިޑް-19 އަށް ވެކްސިން ދިނުމަށް ގައުމުތަކުން ތައްޔާރުވަމުންދާއިރު މުޅި ދުނިޔެއިން ވައިރަސް ޖެހުނު މީހުންގެ އަދަދު 75 މިލިއަނުން މައްޗަށް އަރައިފިއެވެ.

އިނގިރޭސިވިލާތުން މި މަސްތެރޭގައި ފައިޒަރ އާއި ބައޯއެންޓެކްގެ ވެކްސިން ޖެހުމަށް ފަށާފައިވާއިރު އެމެރިކާގައިވެސް ވަނީ މި ވެކްސިން ޖަހަންފަށާފައެވެ. އަދި މޮޑާނާ ވެކްސިން އެމަރޖެންސީކޮށް ބޭނުންކުރުމުގެ ހުއްދަ އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ވަނީ ދީފައެވެ.

ފާއިތުވި މަސް ދުވަސްތެރޭގައި މުޅި ދުނިޔެއިން 18.65 މިލިއަން މީހުންނަށް ވަނީ އަލަށް ކޮވިޑް-19 ޖެހިފައެވެ. މިއީ މުޅި މި ޕެންޑަމިކްގެ ތެރޭގައިވެސް 30 ދުވަހުގެ ތެރޭގައި އެންމެ ގިނަ އަދަދެއްގެ މީހުންނަށް ވައިރަސް ޖެހުނު 30 ދުވަހެވެ.

ދުނިޔޭގެ ބައްރުތަކަށް ބަލާއިރު އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓްކުރަމުން އަންނަނީ ޔޫރަޕުންނެވެ. އެއީ 21.6 މިލިއަން މީހުންނެވެ. އެއަށްފަހު ނޯރތް އެމެރިކާ ސަރަހައްދެވެ. އެއީ 17.9 މިލިއަން މީހުންނަށް ކޮވިޑް-19 ޖެހިގެންނެވެ. ލެޓިން އެމެރިކާ ސަރަހައްދުން 14.5 މިލިއަން މީހުން އަދި އޭޝިޔާ ބައްރުން 13 މިލިއަން މީހުންނަށް ވަނީ ވައިރަސް ޖެހިފައެވެ.

ޔޫރަޕަށް ބަލާއިރު ފާއިތުވި ފަސް ދުވަހުގެ ތެރޭގައި ވަނީ އެއް މިލިއަން މީހުންނަށް އަލަށް ވައިރަސް ޖެހިފައެވެ. ރަޝިއާ އާއި ފްރާންސުން ވަނީ ވައިރަސް ޖެހުނު މީހުންގެ އަދަދު 2 މިލިއަނަށް އަރާފައެވެ. އިނގިރޭސިވިލާތާއި އިޓަލީން ވައިރަސް ޖެހުނު މީހުންގެ އަދަދު ވަނީ 1.9 މިލިއަނަށް އަރާފައެވެ.

މިދިޔަ ހަފްތާގެ ހޯމަ ދުވަހު އެމެރިކާ ގައި ވައިރަސް ޖެހިގެން މަރުވި މީހުންގެ އަދަދު ވަނީ ތިން ލައްކައަށް އަރާފައެވެ. ފާއިތުވި 7 ދުވަހު އެމެރިކާގައި ދުވާލެއްގެ މައްޗަށް 2500ށް ވުރެ ގިނަ މީހުން ވަނީ މިބަލީގައި މަރުވެފައެވެ. އަނެއްކޮޅުން އެމެރިކާގެ އެކި ކަންކޮޅުތަކުގައި ހޮސްޕިޓަލްތަކުގައި ފައިޒަރ ގެ ވެކްސިން އަންނަނީ ޖަހަމުންނެވެ.

އެމެރިކާ އަކީ މިޕެންޑަމިކްގެ ތެރޭގައި އެންމެ ގިނަ މީހުންނަށް ވައިރަސް ޖެހިގެން ރިޕޯޓްކުރަމުން އަންނަ ގައުމެވެ. އެގައުމުން 17 މިލިއަނަށްވުރެ ގިނަ މީހުންނަށް ވައިރަސް ޖެހިފައިވާއިރު ދެ ވަނަ އަށް އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓްކުރަމުން އަންނަނީ އިންޑިޔާއެވެ. އެއަށްފަހު ބްރެޒިލްއެވެ.

ދުނިޔޭގެ އާބާދީގެ 4 އިންސައްތަ ހިއްސާކުރާ އެމެރިކާ އިން ވައިރަސް ޖެހުނު މީހުންގެ 23 އިންސައްތަ ހިއްސާކުރެއެވެ.

މިދިޔަ ހަފްތާގެ ބުދަ ދުވަހު ބްރެޒިލްގައި 70،000 މީހުންނަށް ވަނީ ވައިރަސް ޖެހިފައެވެ. 7 މިލިއަނަށްވުރެ ގިނަ މީހުންނަށް ވައިރަސް ޖެހިގެން ދެން ރިޕޯޓްކުރަމުން އަންނަނީ އިންޑިޔާ އާއި ބްރެޒިލް އިންނެވެ.

ސައުތު އެމެރިކާ ސަރަހައްދުގެ ގައުމުތަކަކީ ދެ ވަނަ އަށް އެންމެ ގިނަ އަދަދެއްގެ މީހުން މިބަލީގައި މަރުވެގެން ރިޕޯޓްކުރަމުން އަންނަ ސަރަހައްދެވެ. އެސަރަހައްދުން 180،000 މީހުން ވަނީ މިބަލީގައި މަރުވެފައެވެ.

ހޮނިހިރު ދުވަހު އިންޑިޔާގައި ވައިރަސް ޖެހުނު މީހުންގެ އަދަދު ވަނީ 10 މިލިއަނަށް އަރާފައެވެ. އިންޑިޔާއިން އަންނަނީ ކުރިޔަށް އޮތް 8 މަސްދުވަސްތެރޭގައި 600 މިލިއަން ކޮވިޑް-19 ވެކްސިން ޖެހުމަށް ތައްޔާރުވަމުންނެވެ.