ޖަރުމަނުގެ ހެމްބާގް ސިޓީގައި ހުކުރު ދުވަހު ފެށުނު ޖީ20 ސަމިޓްގެ ފުރަތަމަ ދުވަސް ނިމި ދެވަނަ ދުވަސް ފެށުނު އިރު ވެސް މުޒާހަރާތައް ކުރިއަށް ދާ ކަމަށް ރިޕޯޓުތައް ބުނެފިއެވެ.

ދުނިޔޭގެ އެންމެ ބާރުގަދަ 20 ގައުމުގެ ސަމިޓް ކުރިއަށް ދާއިރު އެންޓި-ކެޕިޓަލިސްޓް މުޒާހިރީންނާއި ފުލުހުންނާ ދެމެދު ވަރުގަދަ ކުރިމަތިލުންތަކެއް ދަނީ ހިނގަމުންނެވެ.

ފުލުހުން ބުނެފައި ވަނީ މިހާތަނަށް ހިނގި ހަމަނުޖެހުންތަކުގައި 196 ފުލުހުން ޒަޚަމްވެފައިވާ ކަމަށެވެ.  އަދި 83 މުޒާހިރީން ވަގުތީ ގޮތުން ހައްޔަރުކޮށްފައިވާ ކަމަށާއި އަދި 19 މުޒާހިރީއަކު ފުލުހުންގެ ބަންދަށް ގެންގޮސްފައިވާ ކަމަށެވެ.

ހުކުރު ދުވަހު ޖީ20 ސަމިޓް ފެށުނު އިރު، މުޒާހިރީން ދަނީ ކާރުތަކުގައި ރޯކޮށް ފިހާރަތައް ލޫޓުވަމުންނެވެ.

 ފުލުހުންނާ ދެކޮޅަށް މުޒާހިރީން ދަނީ ގަލާއި ފުޅި ފަދަ ތަކެތި ބޭނުން ކުރަމުންނެވެ. މުޒާހަރާތައް ކޮންޓްރޯލް ކުރުުމަށް ފުލުހުން ދަނީ ވޯޓާ ކެނަން ވެސް ބޭނުން ކުރަމުންނެވެ.

ޖީ20 އަކީ 19 ގައުމަކާއި އަދި ޔޫރަޕިއަން ޔޫނިއަން (އީޔޫ) ގެ މައްޗަށް އެކުލެވިގެންވާ ގްރޫޕެކެވެ. ޖީ20 ގެ ގައުމުތަކުން އަހަރަކު އެއް ފަަހަރު ބައިނަލްއަގްވާމީ ގޮތުން ދިމާވެފައިވާ މާލީ އަދި އިގްތިސާދީ މައްސަލަތަކާ މަޝްވަރާ ކުރުމަށް ބައްދަލު ކުރެއެވެ. 

އިގްތިސާދީ އަދި މާލީ މައްސަލަތަކަށް ސަމިޓުގައި ބޮޑަށް އަލިއަޅުވާލެވުނަސް އެހެނިހެން ބޮޑެތި  މައްސަލަތައް ކަމަށްވާ މޫސުމަށް އަންނަ ބަދަލުތަކާއި، ލޭބާ ގަވާއިދުތަކާއި އަދި ކައުންޓާޓެރަރިޒަމްގެ މައްސަލަތަކަށް ވެސް ސަމިޓުގައި އަލިއަޅުވާލައެވެ.