ހުއްޓުމެއް ނެތި ކުރާ އެންމެ ދިގު ދަތުރުގެ ރެކޯޑް ގަތަރު އެއާވޭސްއަށް

ގަތަރު އެއާވޭސްއިން ބުނާ ގޮތުން، އެއްވެސް މަޑުނުކޮށްކުރާ ދުނިޔޭގެ އެންމެ ދިގު ވައިގެ ދަތުރު އެ އެއާލައިނުން ދޯހާއާ އޯކްލޭންޑާ ދެމެދުފަށައިފިއެވެ.

އެ އެއާލައިނުން މިކަން އިއުލާނުކުރީ ދޯހާއިން އޯކްލޭންޑަށް އިތުރު އެއްވެސް މަންޒިލެއްގައި މަޑުނުކޮށް އެއާލައިނުން ދަތުރުކުރި ފުރަތަމަ ފްލައިޓް ޖެއްސުމަށްފަހުއެވެ.

ފްލައިޓް ކިއުއާރު 920 އޯކްލޭންޑްގައި ޖައްސާފައިވަނީ ފުރިތާ 16 ގަޑިއިރާ 23 މިނެޓަށްފަހު ހޯމަ ދުވަހުއެވެ.

މިއީ ލަފާކުރެވުނުވަރަށްވުރެ ތަންކޮޅެއް އަވަސް ވަގުތެކެވެ.

ބޯއިންގ 777-އެލްއާރު 200ގެ މި ބޯޓް ޖެއްސުމާއެކު ވައިގެ ދަތުރުފަތުރުގެ ދާއިރާގެ ސަގާފަތާ އެއްގޮތަށް ބޯޓަށް މަރުހަބާ ކިއުމުގެ ގޮތުންވަނީ ފެންހޮޅިން ފެން ޖަހާފައެވެ.

ގަތަރު އެއާލައިންގެ އާ މަންޒިލަކީ ވަގުތުގެ ގޮތުން ބަލާއިރު އެންމެ ގިނަ ވަގުތު ހޭދަވާ މަންޒިލް ކަމަށްވީ ނަމަވެސް 14،535 ކިލޯމީޓަރުގެ މި ދަތުރަކީ ދުރުމިނުގެ ގޮތުން އެންމެ ދިގު ދަތުރެއް ނޫނެވެ.

އެއާއިންޑިއާއިން ބުނާގޮތުގައި އެ އެއާލައިނުން ދިއްލީއިން ސެންފްރެންސިސްކޯއަށް ކުރާ ދަތުރަކީ 15،127 ކިލޯމީޓަރުގެ ދިގުމިނުގެ ދަތުރެކެވެ.