ގުދުސް އަކީ އިޒްރޭލުގެ ވެރިރަށުގެ ގޮތުގައި އެމެރިކާ އިން ބަލައިގަތުމާއި ދެކޮޅަށް، އދ.ގެ އާއްމު މަޖިލީހުގައި ނެގި ވޯޓު ބޮޑު އަޣުލަބިއްޔަތަކުން ފާސްކޮށްފި އެވެ.

193 ގައުމުގެ މައްޗަށް އެކުލެވޭ އދ.ގެ އާއްމު މަޖިލީހުގެ ބައްދަލުމަށް ހުށަހެޅި ގަރާރު ފާސްކޮށްފައިވަނީ، 128 ގައުމެއްގެ ތާއީދާއެކުގައެވެ. މިގަރާރާއި ދެކޮޅަށް ވޯޓު ދީފައިވަނީ އެންމެ 9 ގައުމުންނެވެ. ގަރާރަށް ވޯޓަށް އެހުމުން، 35 ގައުމަކުން ވަކިކޮޅަކަށް ވޯޓު ދީފައެއްނުވެއެވެ.

ގަރާރާއި ދެކޮޅަށް ވޯޓު ދިން ގައުމުތަކުގެ ތެރޭގައި އެމެރިކާ އަދި އިޒްރޭލުގެ އިތުރުން ދެން ހިމެނެނީ ކުދި ގައުމުތަކެވެ. އެއީ ގުއަޓެމާލާ، ހޮންޑިއުރާސް، މާޝަލް އައިލެންޑްސް، މައިކްރޮނީޝިއާ، ނައޫރޫ، ޕަލާއޫ އަދި ޓޯގޯ އެވެ.

މިގަރާރުގައި ވަނީ، ގުދުސް އާގުޅޭ ގޮތުން އެމެރިކާ އަދި ބައިނަލްއަޤްވާމީ މުޖުތަމައު އިން މީގެ ކުރިން ގެންގުޅުނު އުޞޫލާއި ޚިލާފަށް، ގުދުސް އަކީ އިޒްރޭލުގެ ވެރިރަށުގެ ގޮތުގައި އެމެރިކާ އިން ބަލައިގަތުމަކީ ޣައިރު ޤާނޫނީ، ބާތިލް ނިންމުމެއް ކަމަށާއި، ގުދުސްގެ ޤާނޫނީ ހައިސިއްޔަތާއިމެދު ގޮތެއް ނިންމޭނީ އެކަމާއި ގުޅޭ ގޮތުން އދ. އިން ފާސްކޮށްފައިވާ ގަރާރުތަކާއި އެއްގޮތަށް މަޝްވަރާގެ ތެރެއިން ކަމަށެވެ.

އަދި ގުދުސް އާގުޅޭ ގޮތުން އދ.ގެ ސަލާމަތީ މަޖިލީހުން ފާސްކޮށްފައިވާ ގަރާރުތަކަށް އދ.ގެ އާއްމު މަޖިލީހުގެ މެމްބަރު ހުރިހާ ގައުމަކުން ތަބާވުމަށް މިގަރާރުގައި ގޮވާލާފައިވެއެވެ. އަދި، ސަލާމަތީ މަޖިލީހުން މިކަމާއި ގުޅޭ ގޮތުން ފާސްކޮށްފައިވާ ގަރާރުތަކާއި ޚިލާފަށް ނިންމާފައިވާ ނިންމުންތައް ބަދަލު ކުރުމަށް މިގަރާރުގައި ގޮވާލާފައިވެއެވެ.

މީގެ އިތުރުން އދ.ގެ ސަލާމަތީ މަޖިލީހުން 1980 ވަނަ އަހަރު ފާސްކޮށްފައިވާ 478 ވަނަ ގަރާރާއި އެއްގޮތަށް، އެއްވެސް ގައުމެއްގެ ޑިޕްލޮމެޓިކް މިޝަން ނުވަތަ އެމްބަސީއެއް ގުދުސްގައި ގާއިމް ނުކުރުމަށް މިގަރާރުގައި ގޮވާލާފައިވެއެވެ.

މިފަދަ ގަރާރެއް އދ.ގެ ސަލާމަތީ މަޖިލީހުގައި ފާސް ކުރުމަށްވެސް މަސައްކަތް ކޮށްފައިވެއެވެ. އެހެންނަމަވެސް، މިދިޔަ ހޯމަ ދުވަހު އދ.ގެ ސަލާމަތީ މަޖިލީހަށް ހުށަހެޅި ގަރާރު، އެމެރިކާ އިން ވީޓޯ ކުރުމާއެކު، ސަލާމަތީ މަޖިލީހުގައި އެކަން ކާމިޔާބުވާ ގޮތް ނުވީއެވެ.

ސަލާމަތީ މަޖިލީހުގައި އެގަރާރު ފާސް ކުރުމަށް ކުރި މަސައްކަތް އެމެރިކާ އިން ނާކާމިޔާބު ކޮށްލުމާއެކު އދ.ގެ އާއްމު މަޖިލީހަށް މިމައްސަލަ ހުށަހަޅާފައިވަނީ އަރަބި ގްރޫޕްގެ ރިޔާސަތު ބަލަހައްޓާ ޔަމަން އަދި އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ ރިޔާސަތު ބަލަހައްޓާ ތުރުކީ އިންނެވެ. ތުރުކީ އަދި ފަލަސްތީނުގެ އިސްނެގުމާއެކު ޔަމަނުން ހުށަހެޅި ގަރާރު، ދުނިޔޭގެ އެތައް ގައުމަކުން ކޯސްޕޮންސަރ ކޮށްފައިވެއެވެ.

އދ.ގެ ސަލާމަތީ މަޖިލީހުގެ ނިންމުންތަކާއި ޚިލާފަށް، އދ.ގެ އާއްމު މަޖިލީހުގެ މިފަދަ ނިންމުންތަކަކީ މެމްބަރު ގައުމުތަކުން އޭގެ މައްޗަށް އަމަލު ކުރުން ލާޒިމް ނުވަތަ ބައިނަލްއަގްވާމީ ގާނޫނުތަކުގެ ދަށުން ބަނދެވޭ ނިންމުންތަކެއް ނޫނެވެ. މިގަރާރު ފާސްކޮށްފައި މިވަނީ، އދ.ގެ މެމްބަރު ގައުމުތަކަށް އެމެރިކާއިން ދޭ އެހީ ކަނޑާލާނެ ކަމުގެ އިންޒާރު ދީފައިވަނިކޮށެވެ.

ގުދުސްގެ މައްސަލަ އދ.ގެ ސަލާމަތީ މަޖިލީހަށް ހުށަހަޅާފައިވަނީ، ގުދުސް އަކީ އިޒްރޭލުގެ ވެރިރަށުގެ ގޮތުގައި އެމެރިކާ އިން ބަލައިގަނެ، އިޒްރޭލުގެ ޓެލް އަވީވްގައި ހުންނަ އެމެރިކާގެ އެމްބަސީ ގުދުސް އަށް ބަދަލު ކުރުމަށް ނިންމާފައިވާކަން އެމެރިކާގެ ރައީސް ޑޮނަލްޑް ޓްރަމްޕް އިޢުލާން ކުރުމާއި ގުޅިގެން މުޅި ދުނިޔެ އެމެރިކާގެ ނިންމުމާއި ދެކޮޅު ހަދަމުންދަނިކޮށެވެ.