ސާފުތާހިރުކަން ފެނިގެންދާނީ ފަރުދީ ޒިންމާ އަދާކޮށްގެން: ނައިބް ރައީސް
19 ޑިސެމްބަރު 2020 | ހޮނިހިރު 14:03މި ސަރުކާރުން ސާފުކުރުމަށް އަދި ތިމާވެށި ރީތިކޮށް ބެހެއްޓުމަށް ވަރަށް ބޮޑު އިސްކަމެއްދޭ
ނައިބު ރައީސް ފައިސަލް ނަސީމް، ސާފު ހުޅުމާލެ ޕްރޮގްރާމް އިފްތިތާޙް ކޮށްދެއްވަނީ
ހުޅުމާލެ އަކީ ހަލުވި ސްޕީޑުގައި ތަރައްޤީވަމުން އަންނަ ތަނެއް ކަމަށާއި އެތަނުގެ ރީތިކަން ފެނިގެންދާނީ ފަރުދީ ޒިންމާ އަދާކޮށް ސާފުތާހިރު ތަނަކަށް ހެދުމަށް ހުރިހާ ފަރާތްތަކުންވެްސ މަސައްކަތްކޮށްގެން ކަމަށް ނައިބް ރައީސް ފައިސަލް ނަސީމު ވިދާޅުވެއްޖެ އެވެ.
ސާފު ހުޅުމާލެ ޕްރޮގްރާމް ފެއްޓެވެމުގެ ގޮތުން ވާހަކަ ދައްކަވަމުން ނައިބް ރައީސް ވިދާޅުވީ މި ސަރުކާރުން ސާފުކުރުމަށް އަދި ތިމާވެށި ރީތިކޮށް ބެހެއްޓުމަށް ވަރަށް ބޮޑު އިސްކަމެއްދޭ ކަމަށާއި ވެރިކަމާއި ހަވާލުވުމަށްފަހު އެންމެ ފުރަތަމަވެސް ސަރުކާރުން ފެއްޓެވި އެއް ޕްރޮގްރާމަކީ ސާފު ކުރުމުގެ ޕްރޮގްރާމެއް ފެއްޓެވުން ކަމަށެވެ. މިއާއި އެކު އެއް ފަހަރު ބޭނުންކޮށްފައި އުކާލާ ޕްލާސްޓިކް ބޭނުން ކުރުން ހުއްޓާލަން ސަރުކާރުން ވަރަށް ބޮޑަށް ބާރު އަޅާ ކަމަށާއި މިކަމުގައި ރައްޔިތުންގެވެސް ފުރިހަމަ އެއްބާރުލުން ބޭނުންވާ ކަމަށް ވިދާޅުވި އެވެ.
ޒަމާނުއްސުރެ ރާއްޖޭގެ ރައްޔިތުންނަކީ ސާފުތާހިރު ކަމަށް ލޯބިކުރާ ބަޔަކަށްވާއިރު ފަތިހުގެ ވަގުތުތަކުގައިވެސް ގޭދޮޅު ކުނިކަހާ މަންޒަރަކީ އަބަދުވެސް އަޅުގަނޑުމެންނަށް ފެނިގެންދިޔަ މަންޒަރެއް ކަމަށެވެ.
މިރީތި އާދަ މިއަދުވެސް ފެނިގެންދާއިރު، ފަތުރުވެރިކަމުގެ މަންޒިލެއްގެ ގޮތުގައިވެސް މުޅި ދުނިޔޭގެ ކުރިމަތީގައި ރާއްޖެ ވިދާ ބަބުޅަނީ މި ރީތި ސާފުކަންމަތީ ރާއްޖެ އޮތުމުން ކަމަށް ނައިބް ރައީސް ވިދާޅުވި އެވެ. އެހެންކަމުން ކޮންމެ ތަނެއްވެސް ސާފު ތާހިރުކޮށް ބޭއްވޭނީ ފަރުދީ ޒިންމާއަދާކޮށްގެން ކަމަށާއި މިކަމަށް ހުރިހާ ރައްޔިތުންވެސް އެއްބާރުލުންދިނުމަށް ނައިބް ރައީސް އިލްތިމާސްކުރެއްވިއެވެ.
ސާފު ހުޅުމާލެ" ނަމުގައި ހުޅުމާލެ ސާފުކުރުމުގެ ހަރަކާތެއް ކަމަށް ހައުސިން ޑިވެލޮޕްމަންޓް ކޯޕަރޭޝަން އެޗްޑީސީން ކުރިއަށް ގެންގޮސްފައިވާއިރު، އެކި އެކި މުއައްސަސާތަކުން ގިނަ އަދަދެއްގެ ފަރާތްތަކުން ވަނީ ބައިވެރިވެފައެވެ. ސާފު ކުރުމުގެ މި ހަރަކާތާއި ގުޅިގެން ރާއްޖެއެމްވީއާއި ވާހަކަދައްކަވަމުން އެޗްޑީސީގެ ޗެއަރމަން މުހައްމަދު ޖައިޝް އިބްރާހިމް ވިދާޅުވީ ކޯވިޑަށްފަހު ހުޅުމާލެ ތެރެ ސާފު ކުރުމުގެ ހިންގި މިޕްރޮގްރާމްގައި ގިނަ ބައެއްގެ އެއްބާރުލުން ލިބިގެންދިޔަ ކަމަށެވެ.
މިޕްރޮގްރާމްގެ ދަށުން ހުޅުމާލޭގެ އެކި ސަރަހައްދުތަކުގައި ގިނަވެފައިވާ ކުނިތައް ނަގާ ސާފުކޮށްފައިވެއެވެ. ސާފުކުރުމުގެ މި ޕްރޮގްރާމްގެ ތެރެއިން ވާހަކަދައްކަވަމުން ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވީ ހުރިހާ ފަރާތްތަކުން ކުނި މެނޭޖް ކުރުމަކީ މުހިއްމު ކަމެއް ކަމަށާއި އަދި ފަރުދީ ޒިންމާ އަދާކޮށް ދިރިއުޅޭ ވެށި ސާފުކޮށް ބަހައްޓަން ޖެހޭ ކަމަށެވެ.
އެޗްޑީސީން ބުނީ މި ޕްރޮގްރާމް 2021 ވަނަ އަހަރު ތެރޭގައި ކުރިއަށްގެންދާނެ ކަމަށެވެ. އަދި މިޕްރޮގްރާމަށް ރައްޔިތުންނާއި މުއައްސަސާތަކުންދިން އަކި ވަކިން ހާއްސަކޮށް ޕްރޮގްރާމް ކާމިޔާބުކަމާއި އެކު ކުރިއަށް ގެންދިއުމަށް ސްޕޮންސަރކޮށްދެއްވި ފަރާތްތަކަށް ޝުކުރުއަދާކުރާ ކަމަށެވެ.
