މަރޭގެ މެސެޖު ޒުވާނުންނަށް: ކާމިޔާބީ ހޯދަން މޮޅު ނަސަބަކަށް ނިސްބަތްވާކަށް ނުޖެހޭ

ދެކެމުން އަންނަ ހުވަފެނެއް ހަގީގަތަށް ހަދައި، ކާމިޔާބީ ހޯދަން މޮޅު ނަސަބަކަށް ނިސްބަތްވާން ނުޖެހޭ ކަމަށް މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ޖެނެރަލް ސެކްރެޓަރީ އަޙްމަދު މަރުޒޫގް (މަރޭ) ވިދާޅުވެއްޖެއެވެ.

ދާދި ފަހުން މަރުޒޫގް ވަނީ އޮލިމްޕިކް ކައުންސިލް އޮފް އޭޝިއާ (އޯސީއޭ) ގެ މެރިޓް އެވޯޑް ހާސިލުކުރައްވާފައެވެ. މި އެވޯޑް މަރުޒޫގަށް އެރުވީ އޭޝިއާގެ ކުޅިވަރަށް މިދިޔަ 11 އަހަރު ކޮށްދެއްވި އަގުހުރި ޚިދުމަތުގެ އަގުވަޒަންކުރުމުގެ ގޮތުންނެވެ.

މި ކާމިޔާބީއާ ގުޅިގެން މަރުޒޫގަށް މަރުހަބާ ކީ އެންމެންނަށް ޝުކުރުއަދާކުރުމުގެ ގޮތުން ފޭސްބުކްގައި ހިއްސާކުރި ޕޯސްޓެއްގައި އޭނާ ވަނީ ޒުވާނުންނަށް އަގުހުރި މެސެޖެއް ދީފައެވެ. އެގޮތުން މި ޕޯސްޓުގައި މަރުޒޫގް ވަނީ ހަޔާތުގައި ކާމިޔާބީއަކާ ހަމައަށް ވާސިލުވުމަށް އަމާޒެއް ކަނޑައެޅުމަށްފަހު އެކަމަށް ހިތްވަރުލައި މަސައްކަތް ކުރުމަށް ޒުވާނުންނަށް ނަސޭހަތްތެރި ވެފައެވެ. އަދި މި ދަތުރުގައި ހިތްހަމަނުޖެހޭ އެތައް ކަމެއް ކުރިމަތިވާނެ ކަމަށާއި، އެކަން ކަމަށް ފަރުވާ ނުބަހައްޓައި ކާމިޔާބީ ހޯދަން ގަދައަޅައި މަސައްކަތް ކުރުމަށްވެސް މަރުޒޫގް ވަނީ ނަސޭހަތްތެރިވެފައެވެ. އަދި ހަޔާތުގައި ދެކެމުން އަންނަ ހުވަފެނެއް ހަގީގަތަށް ހެދުމަށް މޮޅު ނަސަބަކަށް ނުވަތަ ބޭފުޅު އާއިލާއަކަށް ނިސްބަތްވާން ނުޖެހޭ ކަމަށްވެސް މި ޕޯސްޓުގައި މަރުޒޫގް ވިދާޅުވިއެވެ.

އޭޝިއާގެ ކުޅިވަރަށް ފާހަގަކުރެވޭ ފަދަ ޚިދުމަތްތަކެއް ކުރާ މީހުންނަށް އޭޝިއާގެ އޮލިމްޕިކުގެ އެންމެ މަތީ ޖަމުޢިއްޔާއިން ދޭ ހާއްސަ ޝަރަފު މަރުޒޫގަށް ލިބިވަޑައިގެންނެވިއިރު، އާދައިގެ އާއިލާއަކަށް ނިސްބަތްވާ މަރުޒޫގް އަންނަނީ ދިވެހި ކުޅިވަރު އެހެން ހަރުފަތަކަށް ގެންދިޔުމަށް އަގުހުރި މަސައްކަތްތަކެއް ކުރައްވަމުންނެވެ.

ކުރީގެ މަޝްހޫރު ރެފުރީ އަދި ސ. ފޭދޫ ޑީއެންސީ ހިންގެވުމުގައި އިސްކޮށް އުޅުއްވި މަރްހޫމް ހުސެއިން ދީދީ (ޖޯޖް) ގެ ބޭފުޅެއް ކަމަށްވާ މަރުޒޫގް އެމްއޯސީގެ ޖެނެރަލް ސެކްރެޓަރީގެ މަގާމާ ހަވާލުވީ 2009 ވަނަ އަހަރުއެވެ. އޭގެ ފަހުން އޭނާ އިސްވެވަޑައިގެން ދިވެހި އެތުލީޓުން ތަމްރީނުކުރުމަށް ގިނަ މަސައްކަތްތަކެއް ކޮށްދެއްވާފައިވާއިރު، ރާއްޖެއަށް 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ 100 މީޓަރު ދުވުމުން ރަން މެޑަލް ހޯދައިދިން ހަސަން ސާއިދަކީ އޭގެ ތެރެއިން ލިބުނު ފުރުސަތުގެ ބޭނުން ހިފި އެތުލީޓެކެވެ. އަދި ގިނަ އަދަދެއްގެ އެތުލީޓުންނަށާއި ޓީމުތަކަށްވެސް މަރުޒޫގް ވަނީ ބޭރުން ތަމްރީނު ހެދުމުގެ ފުރުސަތު ހޯދައިދީފައެވެ.

މީގެ އިތުރުން އެމްއޯސީއާ ގުޅުމުގެ ކުރިން މަރުޒޫގް ވަނީ ވިކްޓަރީ ސްޕޯޓްސް ކުލަބުގެ ޖެނެރަލް ސެކްރެޓަރީގެ މަގާމުވެސް ފުރުއްވާފައެވެ. އަދި ވަނީ ފުޓްބޯޅަ ކެރިއަރުގައި ޔޫތު ގައުމީ ފުޓްބޯޅަ ޓީމުތަކަށާއި ކުލަބު ވެލެންސިއާ އަދި އައިއެފްސީއަށްވެސް ކުޅެފައެވެ.