ކުރިއަށް އޮތް ލޯކަލް ކައުންސިލް އިންތިހާބުގައި މާލެ ސިޓީގެ މޭޔަރުގެ މަގާމަށް ކުރިމަތިލައްވާފައިވާ ކުރީގެ ހައުސިންގ މިނިސްޓަރ ޑރ. މުހައްމަދު މުއިއްޒު، އިންތިހާބުން ބަލިވަންދެން ބަހައްޓައިދިނުމަށް އެމްޑީޕީގެ ރައީސް، ރައީސް މުހައްމަދު ނަޝީދު އެދިވަޑައިގެންފިއެވެ.
އެމްއެމްޕީއާރުސީގެ މައްސަލައިގައި މުއިއްޒުގެ މައްޗަށް އުފުލާފައިވާ ދައުވާއާމެދު ގޮތެއް ނުނިންމާ އޭނާ ބަހައްޓައިދޭން ރައީސް ނަޝީދު އެދިލެއްވީ ހުކުރު ދުވަހު އެމްޑީޕީ ހަރުގޭގައި ބޭއްވި ނޫސްވެރިންގެ ބައްދަލުވުމެއްގައެވެ.
ރައީސް ނަޝީދު ވިދާޅުވީ، މުއިއްޒުގެ މައްޗަށް މައްސަލައެއް އެބައޮތް ކަމަށާއި އަދި އެއީ ބޮޑު ހިޔާނާތާއި ގުޅުންހުރި މައްސަލައެއް ނަމަވެސް އިންތިހާބުން މުއިއްޒު "ބަލިވަންދެން" ބަހައްޓައިދިނުމަކީ ވަރަށް ބޮޑު އެދުމެއްކަމަށެވެ. އަދި އެ މަނިކުފާނު ގަބޫލުކުރައްވާ ގޮތުގައި އިންތިހާބުގައި މުއިއްޒުއަށް ލިބިިވަޑައިގަންނަވާނީ ހައެއްކަ ވޯޓު ކަމަށާއި އެހެންކަމުން ބަންދުނުކޮށް، އިންތިހާބު ނިމެންދެން ބަހައްޓާނެކަމަށް އުންމީދުކުރައްވާކަމަށް ރައީސް ނަޝީދު ވިދާޅުވިއެވެ.
މަޖިލީހުގެ ރައީސްގެ ހައިސިއްޔަތުން ޖުޑިޝަލް ސާވިސް ކޮމިޝަންގައިވެސް އިންނަވާ ރައީސް ނަޝީދު ވަނީ، އިދިިކޮޅު މީހުން ބަންދުކޮށްގެން އިންތިހާބެއް ބޭއްވުމަކީ ވަރަށް ގޯސް ކަމެއްކަމަށް ވިދާޅުވެފައެވެ. އަދި އެކަން އެހެން ހިނގާނެކަމަށް ހީފުޅުނުކުރައްވާކަމަށް ރައީސް ނަޝީދު ވިދާޅުވިއެވެ.
ރައީސް ޔާމީން ހުންނެވީ ބަންދުގައި. ދެން މާލޭގެ މޭޔަރު ކަމަށް ކުރިމަތިލައްވާފައިވާ ބޭފުޅެއްގެ މައްޗަށް އަޅުގަނޑު ހިތުން މައްސަލައެއް އެބަ ބެލޭ. އަޅުގަނޑު އުންމީދު ކުރަން އެމްއެމްޕީއާރުސީގެ މައްސަލައިގައި ވިޔަސް އިންތިހާބުން ބަލިވަންދެން މުއިއްޒު ބަހައްޓާނެ ކަމަށް. އަޅުގަނޑު ވަރަށް ބޮޑަށް ބޭނުން ހައެއްކަ ވޯޓް ދީ މާލެއިން ބަލިކޮށްލަން. އަޅުގަނޑު ވަރަށް ބޮޑަށް އެދެން ބަލި ވަންދެން އިންތިހާބު ނިމެންދެން ބަހައްޓާނެ ކަމަށްއެމްޑީޕީގެ ރައީސް، ރައީސް މުހައްމަދު ނަޝީދު
މި މޭރުމުން ވާހަކަ ދައްކަވަމުން ރައީސް ނަޝީދު ވިދާޅުވީ، އެމްއެމްޕީއާރުސީގެ މައްސަލަ ނުބެލި ދިގުލައިގެންދަނީ އެ މައްސަލައިގައި ޝާމިލްވާ މީހުންގެ ނިސްބަތް ގިނަވެފައި، އެއީ ސީރިއަސް ބޮޑު މައްސަލައަކަށް ވާތީ ބަލަންޖެހޭ ގިނަ ކަންކަން ހުރުމުން ކަމަށެވެ. ނަމަވެސް މި ސަރުކާރުން އެ ހުރިހާ ޝަރީއަތްތަކެއް ހިންގާނެ ކަމަށްވެސް ރައީސް ނަޝީދު ވިދާޅުވިއެވެ.
އެމްއެމްޕީއާރުސީއާ ގުޅުންހުރި މައްސަލަތައް ބަލައި ފިޔަވަޅު އެޅުމަކީ ފަސޭހަ ކަމެއް ނޫންކަން ފާހަގަކުރައްވާ ރައީސް ނަޝީދު ވިދާޅުވީ، ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް އަކީ ކުޅަދާނަ ބޭފުޅެއް ކަމަށާއި އެކަން އެ ބޭފުޅާއަށް ކުރަން އެނގިވަޑައިގަންނަވާނެކަމަށެވެ. ހަމައެހެންމެ ބަންޑާރަ ނައިބު އިބްރާހިމް ރިފްއަތަކީ ދުރުވިސްނޭ ބޭފުޅެއް ކަމަށާއި އެ މަނިކުފާނަށް ސަރުކާރަށް ރަނގަޅު ލަފާ އަރުވަން އެނގިވަޑައިގަންނަވާނެކަމަށް ވިދާޅުވިއެވެ.
ރައީސް ނަޝީދު ވަނީ 19 ވަނަ ރައްޔިތުންގެ މަޖިލީހުގެ މެންބަރުންނަކީ ދުރުވިސްނުމާއެކު ރަނގަޅު ގާނޫނުތައް ހައްދަވާ ބޭފުޅުންކަން ފާހަގަކުރައްވާ އެމްއެމްޕީއާރުސީ ނުވަތަ އެނޫންވެސް މައްސަލައެއްގައި ލޮލަކަށް ބޮލަކަށް އަދި ކަނދުރާއަކަށް ބެލުމެއްނެތި ރައްޔިތުންނަށް އިންސާފު ހޯދައިދިނުމަށް ކެނޑިނޭޅި ވަކާލާތު ކުރައްވާ ބޭފުޅުންކަަމަށް ވިދާޅުވެ އެ ބޭފުޅުންނަށް ޝުކުރު އަދާކުރައްވާފައެވެ.
ރައީސް ނަޝީދު ދެއްކެވި ވާހަކަތަކާއި ގުޅިގެން ބައެއް އާންމުންގެ ފާޑުކިޔުންތައް ވަނީ އަމާޒުވެފައެވެ. އެގޮތުން ކުށެއްކޮށްފިނަމަ ކޮންމެ މީހަކަށްވެސް އިސްތިސްނާއެއްނެތި ހައްގު އަދަބު ލިބެންޖެހޭނެކަމަށް ބުނެ އެ ފަރާތްތަކުން ވަނީ ކަންބޮޑުވުން ފާޅުކޮށްފައެވެ. ހާއްސަކޮށް ރައްޔިތުންގެ ފައިސާއަށް ހިޔާނާތްތެރިވީ މީހުންނަށް ވީހާވެސް އަވަހަކަށް އަދަބު ދިނުމަށް ވަނީ ގޮވާލާފައެވެ.
