އެފްއޭކަޕް ފައިނަލް މެޗަށް ސަންޗޭޒް ފިޓްވާނެ: ވެންގާ

އެފްއޭކަޕް ފައިނަލް މެޗަށް އާސެނަލް އަށް ކުޅެމުން އަންނަ އެލެކްސަސް ސަންޗޭޒް ފިޓްވާނެކަމަށް އެޓީމުގެ ކޯޗު އާސެން ވެންގާ ބުނެފި އެވެ.

ޗެލްސީއާ ދެކޮޅަށް ފައިނަލް މެޗުގައި ނިކުތުމުގެ ކުރިން ނޫސްވެރިންނަށް މައުލޫމާތު ދެމުން ވެންގާ ބުނީ ފައިނަލް މެޗަށް ސަންޗޭޒް ފިޓްކަމަށާއި، އެހެންނަމަވެސް އެކަން އެއްކޮށް ކަށަވަރުވާނީ ކުރިޔަށް އޮތް ދުވަސްތަކުގައި ހަދާ ޓެސްޓުތަކަށް ފަހު ކަމަށެވެ.

ވެންގާ ބުނީ މިވަގުތު އަނިޔާގައި ހުރި އެންމެ މުހިންމު އެއް ކުޅުންތެރިޔަކީ ގެބްރިއެލް ކަމަށާއި، އޭނާ އަށް ކުޅުމުގެ ތެރެއަށް އަނބުރާ އާދެވޭނެ ކަމަށް ލަފާކުރެވެނީ 8 ހަފްތާ ފަހުން ކަމަށެވެ. އެގޮތުން ވެންގާ ބުނީ ފައިނަލް މެޗުގައި ގެބްރިއެލް ނުފެންނާނެ ކަމަށެވެ.

މީގެއިތުރުން ވެންގާ ބުނީ ޗެލްސީ މެޗަށް ނިކުންނައިރު، މުސްތާފީއާ މެދުވެސް ކަންބޮޑުވާން ޖެހޭ ކަންތައްތައް އެބަހުރި ކަމަށާއި، އޭނާ އުޅެނީ ކުޑަކޮށް ބަލިވެ ކަމަށެވެ. އެހެންނަމަވެސް މެޗުގެ ކުރިން ފިޓްވާނެ ކަމަށް ލަފާ ކުރެވޭ ކަމަށާއި، ޑޮކްޓަރުންގެ ޓީމު އެކަމަށް މަސައްކަތްކުރަމުން އަންނަ ކަމަށެވެ.

މި ސީޒަނުގައި އާސެނަލް ކުޅުނު 38 މެޗުން 75 ޕޮއިންޓް ހޯދާފައިވާއިރު، އެޓީމަށް ލިބިފައިވަނީ ޕޮއިންޓް ތާވަލުގެ ފަސްވަނައެވެ. މި ނަތީޖާއާއެކު އެޓީމު ވަނީ 21 އަހަރަށްފަހު ޗެމްޕިއަންސްލީގުގެ ޖާގައަކާ އަލްވަދާއު ކިޔަންޖެހިފައެވެ. އެގޮތުން އަންނަ އަހަރު އެޓީމު ކުޅޭނީ ޔޫރޮޕާ ލީގުގައެވެ.

މި ސީޒަނުގައި އާސެނަލް ހޯދި ނަތީޖާތަކާއެކު، އެޓީމުގެ ކޯޗު ވެންގާ ބޭރުކުރުމަށް ގޮވާލާ ސަޕޯޓަރުން މުޒާހަރާ ކުރަމުން އަންނައިރު، އޭނާ ކޯޗުކޮށްދޭ ފަހު މެޗަކީ އެފްއޭކަޕް ފައިނަލް މެޗު ކަމަށް ރިޕޯޓްތައް ބުނެއެވެ. އެހެންނަމަވެސް އެކަންތައް ކްލަބުންވެސް ކަށަވަރުކޮށްނުދެއެވެ.