ބަޔާން މިއުނިކަށް ކުޅެމުން އަންނަ ޕޯޗުގަލްގެ މިޑްފިލްޑަރު ރެނާޓޯ ސަންޗޭޒް ހޯދުމުގެ ރޭހުގައި ޔުވަންޓަސް އިން ބައިވެރިވެއްޖެ ކަމަށް ރިޕޯޓްތައް ބުނެފިއެވެ.
މަޝްހޫރު ކުޅިވަރު ނޫހެއް ކަމަށްވާ ދަ ސަން އިން ބުނީ ޔުވަންޓަސް އިން ސަންޗޭޒް ހޯދުމަށް މަސައްކަތް ފަށާފައިވާ ކަމަށާއި، އެގޮތުން އެޓީމުން އޭނާ ހޯދުމަށް ބިޑެއް ހުށަހެޅުމަށް ތައްޔާރުވަމުން އަންނަ ކަމަށެވެ.
ރިޕޯޓްތައް ބުނާ ގޮތުން ސަންޗޭޒްއަށް ބޮޑު ހޭދައެއް ކުރުމަށް ޔުވަންޓަސް އިން އޮތީ ތައްޔާރަށެވެ. އެގޮތުން އޭނާގެ ސޮއި ހޯދާ ކުރިޔަށް އޮތް ސީޒަނަށް އޭނާ އެ ކްލަބަށް ގެންނަނާނެ ކަމަށް ރިޕޯޓްތައް ބުނެއެވެ.
މެންޗެސްޓާ ޔުނައިޓެޑުން ވެސް ހޯދަން މަސައްކަތްކުރަމުން އަންނަ ސަންޗޭޒް ހޯދުމަށް ގިނަ ކްލަބްތަކުން އަންނަނީ މަސައްކަތްކުރަމުންނެވެ. އޭގެ ތެރޭގައި ސްޕެއިން އަދި ޕްރިމިއާ ލީގުގެ ބައެއް ކްލަބްތައް ވެސް ހިމެނެއެވެ.
ބެންފީކާ އިން ކެރިޔަރު ފެށި އުމުރުން އެންމެ 19 އަހަރުގެ ސަންޗޭޒް އަންނަނީ ޒުވާން އުމުރުގައި މޮޅު ކުޅުމެއް ދައްކަމުންނެވެ. އެގޮތުން މި ސީޒަނުގައި އޭނާ ވަނީ މިހާތަނަށް ބަޔާނަށް ވެސް 25 މެޗު ކުޅެފައެވެ.
ސަންޗޭޒް ބަޔާން އަށް ބަދަލުވީ މިދިޔަ އަހަރުގެ މެއި މަހު ފަސް އަހަރު ދުވަހުގެ އެއްބަސްވުމެއްގެ ދަށުން 35 މިލިއަން ޕައުންޑަށެވެ. އެގޮތުން އޭނާގެ އެއްބަސްވުން ހަމަވާނީ 2021 ވަނަ އަހަރެވެ.
މިދިޔަ އަހަރު ގޯލްޑެން ބޯއި އެވޯޑު ހޯދި ސަންޗޭޒް ވިދާލީ ނިމިގެންދިޔަ ޔޫރޯ ފުޓުބޯޅަ މުބާރާތުގައެވެ. އޭނާ ވަނީ އެ މުބާރާތުގައި ޕޯޗުގަލް ޓީމަށް މޮޅު ކުޅުމެއް ދައްކާ އެޓީމަށް މުބާރާތް ކާމިޔާބުކޮށްދިނުމަށް މުހިންމު ދައުރެއް އަދާކޮށްފައެވެ. އޭނާ ވަނީ މުބާރާތުގެ އެންމެ ޒުވާން ކުޅުންތެރިޔާގެ މަގާމު ވެސް ހޯދާފައެވެ.
