114 ކެންޑިޑޭޓުން ނަން އަނބުރާ ގޮންގޮސްފި، އެމްޑީޕީއަށް ނިސްބަތްވާ 49 ކެންޑިޑޭޓުން ހިމެނޭ!
ލޯކަލް ކައުންސިލް އިންތިހާބުން 74 ކެންޑިޑޭޓެއް ނަން އަނބުރާ ގެންގޮސްފައިވޭ
އިލެކްޝަންސް ކޮމިޝަނުގެ ރައީސް އަހުމަދު ޝަރީފް
އަންނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބަށް ކުރިމަތިލައިފައިވާ ކެންޑިޑޭޓުންގެ ތެރެއިން ޖުމްލަ 114 ކެންޑިޑޭޓަކު މިހާތަނަށް ނަން އަނބުރާ ނަގާފައިވާކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
އަންގާރަ ދުވަހުގެ ރޭ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ޝަރީފު ވިދާޅުވީ، ދެ އިންތިހާބަށް ބަލާއިރު ޖުމްލަ 114 ފަރާތަކުން ނަން ނަގާފައިވާކަމަށާއި އޭގެތެރޭގައި ލޯކަލް ކައުންސިލް އިންތިހާބުން 74 ކެންޑިޑޭޓަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުން 40 ކެންޑިޑޭޓެއް ހިމެނޭކަމަށެވެ.
ޝަރީފު ވިދާޅުވީ، ލޯކަލް ކައުންސިލް އިންތިހާބުން އެންމެ ގިނައިން ނަން ނަގާފައިވާ ކެންޑިޑޭޓުން ނިސްބަތް ވަނީ އެމްޑީޕީއަށް ކަމަށެވެ. އެގޮތުން، އެ ޕާޓީއަށް ނިސްބަތްވާ 24 ކެންޑިޑޭޓަކު ނަން އަނބުރާ ނަގާފައިވާއިރު ޕީޕީއެމްއަށް ނިސްބަތްވާ 13 ކެންޑިޑޭޓަކު ވަނީ އަނބުރާ ނަން ނަގާފައެވެ. މީގެއިތުރުން، ޖުމްހޫރީ ޕާޓީއަށް ނިސްބަތްވާ 7 ކެންޑިޑޭޓާކާއި އެމްޑީއޭގެ 1 ކެންޑިޑޭޓެއްގެ އިތުރުން އަމިއްލަ ގޮތަށް ކުރިމަތިލާފައިވާ 29 ކެންޑިޑޭޓަކު ނަން ނަގާފައިވާކަމަށެވެ. ޝަރީފު ވަނީ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުންވެސް އަނބުރާ ނަން ނަގާފައިވާ ކެންޑިޑޭޓުންގެ ޕާޓީގެ ތަފްސީލާއި އަދަދު ޕްރޮގްރާމްގައި ހިއްސާކޮށްފައެވެ.
ކޮވިޑާއި ގުޅިގެން ފަސްކުރި ލޯކަލް ކައުންސިލް އިންތިހާބު އަންނަ އަހަރުގެ މާޗު މަހުގެ 13 ވަނަ ދުވަހު ބޭއްވުމަށް ވާންޖެހޭ ތައްޔާރީތައް އިލެކްޝަނުން ވަމުން އަންނަ އިރު، ލޯކަލް ކައުންސިލް އިންތިހާބު ބާއްވާނެ ސީދާ ތާރީހެއް އީސީއިން އިއުލާން ކުރާނީ ސަރުކާރުން ސިއްހީ ކުއްލި ނުރައްކަލުގެ ހާލަތެއް ނެތް ކަމަށް އިއުލާން ކުރުމުން ކަމަށް ވެސް އިލެކްޝަނުން ބުނެއެވެ.
އިންތިހާބުގެ ހާއްސަ ގާނޫނު ގެ 3 ވަނަ މާއްދާގެ (ށ) ދަށުން، ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލާފައިވާ ކެންޑިޑޭޓުންގެ ނަން އަނބުރާ ގެންދިއުމުގެ ފުރުސަތު، ހުޅުވާލީ ޖޫން މަހުގެ 23 ވަނަ ދުވަހުއެވެ.
މި އަަހަރުގެ އޭޕްރީލް މަހު ބާއްވަން ނިންމާފައި އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީ އަށް މަސައްކުރާ ކޮމިޓީގެ އިންތިހާބު ފަސްކޮށްފައިވަނީ ކޮވިޑް-19އާ ގުޅިގެންނެވެ. އެއާއި އެކު ކައުންސިލްތަކުގެ އިންތިހާބެއް ބޭއްވެންދެން މިހާރު އޮތް ކައުންސިލްތަކުގެ ދައުރު ދެމިގެންދާ ގޮތަށް ގާނޫނުއަސާސީ އަށް އިސްލާހު ގެނެސް އެ އިސްލާހު ވަނީ ތަސްދީގުކޮށްފައެވެ.
