ކޮވިޑްގައި މަރުވާ ލަންކާ މުސްލިމުން ރާއްޖޭގައި ވަޅުލަން އެގައުމުން ދިވެހި ސަރުކާރުގައި އެދުނުކަމެއް ކެބިނެޓަށްކަށް ނޭނގޭ: ތަރުޖަމާނު

ކޮވިޑްގައި މަރުވާ ލަންކާ މުސްލިމުން ރާއްޖޭގައި ވަޅުލަން އެގައުމުގެ ސަރުކާރުން ރާއްޖޭގައި އެދުނުކަމެއް ލަންކާ ސަރުކާރުގެ ކެބިނެޓަށްކަށް ނޭނގޭކަމަށް ކެބިނެޓްގެ ތަރުޖަމާނު މިނިސްޓަރ ކެހެލިޔާ ރަމްބުކްވެއްލާ ވިދާޅުވެއްޖެއެވެ.

ކެބިނެޓުގެ ތަރުޖަމާނާއި ހަވާލާދީ ލަންކާގެ މީޑިއާ ރިޕޯޓުތައް ބުނާ ގޮތުން، ލަންކާ ސަރުކާރުން އެ ގައުމުގައި މަރުވާ މުސްލިމުން ރާއްޖޭގައި ވަޅުލަން އެދިފައިވާކަމަށް ކެބިނެޓަށް އެނގިފައިނެތެވެ. ކޮންމެ ހަފްތާއަކު ކެބިނެޓުގެ ފަރާތުން ބާއްވާ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން، މިނިސްޓަރ ކެހެލިޔާ ރަމްބުކްވެއްލާ ވިދާޅުވީ ކެބިނެޓުގައި މިކަމާއި ގުޅިގެން އެއްވެސް ވަރަކަށް މަޝްވަރާކޮށްފައި ނުވާކަމަށެވެ. އަދި، މިކަމާއި ގުޅޭ މައުލޫމާތު ކަށަވަރުކުރުމަށްފަހު ނޫސްވެރިންނަށް މައުލޫމާތު ހިއްސާކުރައްވާނެކަމަށް ވިދާޅުވިއެވެ.

ކޮވިޑް-19 ޖެހިގެން ލަންކާގައި ނިޔާވާ މުސްލިމުންނަށް އިސްލާމީ އުޞޫލުތަކާ އެއްގޮތަށް ޖަނާޒާގެ ކަންތައްތައް ހަމަޖައްސައިދިނުމަށް އެހީތެރިކަން ހޯދުމަށް އެ ގައުމުން އެދުނީ، ރައީސް ގޯތާބަޔަ ރާޖަޕަކްސަ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހަށް ފޮނުއްވި ސިޓީފުޅެއްގައެވެ. އެ ސިޓީފުޅުގައި ރާޖަޕަކްސަ ވަނީ އިސްލާމީ އުސޫލުތަކާ އެއްގޮތަށް މުސްލިމުންގެ ޖަނާޒާގެ ފުރިހަމަކުރުމަށް ލަންކާ ސަރުކާރަށް ދަތިތަކެއް ކުރިމަތިވެފައިވާ ކަން ފާހަގަކުރައްވާފައެވެ.

މި ސިޓީފުޅާ ގުޅިގެން ފޮރިން މިނިސްޓަރު އަބްދުﷲ ޝާހިދު ވިދާޅުވީ އެހީތެރިކަން ފޯރުކޮށްދިނުމުގައި އިސްލާމީ އުޚުއްވަތްތެރިކަން ދެމެހެއްޓުމުގެ މަތިވެރި ނިޔަތާއި މަގުސަދުގައި، އަދި ރާއްޖެއާ ލަންކާއާ ދެމެދު އޮތް ޒަމާންވީ ގުޅުމުގެ މައްޗަށް ދިވެހި ސަރުކާރުން ރިއާޔަތްކުރާނެ ކަމަށެވެ. އަދި ލަންކާގެ މުސްލިމުންނަށް ފޯރުކޮށްދެވޭ ޚާއްސަ އެހީތެރިކަމެއްގެ ގޮތުގައި ލަންކާގެ ރައީސްގެ މި ހުށަހެޅުއްވުމުގައި އެދިވަޑައިގެންފައިވާ ކަންކަން އިންތިޒާމް ކުރެވޭނެ ގޮތެއް އޮތްތޯ ބެލުމަށް ވެސް ރައީސް ސޯލިހު ސަރުކާރުގެ ކަމާ ބެހޭ އިދާރާތަކުގެ މެދުގައި މަޝްވަރާ ކުރަމުން ގެންދަވާ ކަމަށް މިނިސްޓަރު ޝާހިދު ވިދާޅުވިއެވެ