އެމެރިކާގެ ފާމަސޫޓިކަލް ކުންފުނި ފައިޒަރ އާއި ޖަރުމަނުގެ ބައޯއެންޓެކް ގުޅިގެން އުފެއްދި ކޮވިޑް-19 ވެކްސިން ބޭނުންކުރުމުގެ ހުއްދަ އެމެރިކާއިން ދީފައިވާއިރު އަންނަ ހަފްތާގައި ވެކްސިން ދޭން ފަށާނެކަމަށް އެމެރިކާގެ ހެލްތު ސެކެޓްރީ އެލެކްސް އަޒަރް ވިދާޅުވެއްޖެއެވެ.

އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ހުކުރު ދުވަހު ވަނީ ފައިޒަރގެ ކޮވިޑް-19 ވެކްސިން އެގައުމުގައި ބޭނުންކުރުމަށް ހުއްދަ ދީފައެވެ. އެމެރިކާއިން ފައިޒަރގެ ވެކްސިނަށް ހުއްދަ ދީފައިވަނީ ވެކްސިނަށް ހުއްދަ ދިނުމަށް ބޭއްވި އެފްޑީއޭގެ ޕެނަލްގައި ބައިވެރިވި 22 މީހުންގެ ތެރެއިން 17 މީހުންގެ ވޯޓާއިއެކުއެވެ. ހަތަރު ފަރާތަކުން ވެކްސިނަށް ހުއްދަ ދިނުމާ ދެކޮޅަށް ވޯޓުލާފައިވާއިރު، ޕެނަލްގެ އެކަކު ވަކިގޮތަކަށް ވޯޓު ދީފައެއް ނުވެއެވެ.

މިހުއްދަ އާއެކު އެމެރިކާގައި އެމަރޖެންސީކޮށް ވެކްސިން ދޭން ފަށާއިރު މީޑިޔާތަކަށް މައުލޫމާތު ދެއްވަމުން އެލެކްސް ވިދާޅުވީ ކަމާބެހޭ އިދާރާތަކުން ފައިޒަރ އާއެކު ވެކްސިން ޖެހުމަށް ކުރަންޖެހޭ ކަންކަން މިހާރު ކުރަމުންދާކަމަށެވެ.

"އަހަރުމެންނަށް އަންނަ ހަފްތާގެ ހޯމަ، އަންގާރަ ދުވަހު މީހުން ގަޔަށް މިވެކްސިން ޖަހާތަން ފެނިގެންދާނެ." އެލެކްސް ވިދާޅުވިއެވެ.

ވެކްސިނަކަށް އެމަރޖެންސީކޮށް ބޭނުންކުރުމުގެ ހުއްދަ ލިބުމުން އެމެރިކާގެ ފެޑަރަލް ސަރުކާރުން އެމެރިކާގެ އެކި ހިސާބުތަކަށް ވެކްސިން ބެހުމާއި ޖެހުމުގެ ކަންކަން ހިނގަމުންދާގޮތް ބަލަމުންދާނެ އެވެ.

މީގެއިތުރުން އެމެރިކާގެ އެފްޑީއޭއިން ވެކްސިން ޖެހުމަށް ހުއްދަދިނުމުގެ އިތުރުން ސެންޓަރސް ފޮރ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)ގެ ކޮމިޓީއަކުންވެސް އެވެކްސިން ބޭނުންކުރުން ރަނގަޅުކަމަށް ނިންމަންޖެހެއެވެ. އެއާއެކު ވެކްސިން އުފައްދާ އެޖެންސީއަކުން ސީޑީސީން ނިންމި ނިންމުންވެސް ބަލައިގަންނަންޖެހެ އެވެ.

ވެކްސިން ބޭނުންކުރުމުގެ ހުއްދަ ދިނުމަށް ފުރަތަމަ ބައްދަލުވުން ބާއްވާފައިމިވަނީ ހުކުރު ދުވަހު އެވެ. އަދި ދެވަނަ ބައްދަލުވުން އާދިއްތަ ދުވަހު ބާއްވާނެ އެވެ.

އަންނަ ހަފްތާގެ އެމެރިކާގެ އެފްޑީއޭއިން މޮޑާނާ އާއި ނޭޝަނަލް އިންސްޓިޓިއުޓްސް އޮފް ހެލްތުން އުފައްދަމުން އަންނަ ވެކްސިން ބޭނުންކުރުމުގެ ހުއްދަ ދިނުމާމެދު ގޮތެއް ނިންމުމަށް ބައްދަލުކުރާނެ އެވެ.

އެމެރިކާއިން އުންމީދުކުރަނީ މިމަސްތެރޭގައި 20 މިލިއަން މީހުންގެ ގަޔަށް ވެކްސިން ޖެހުމަށެވެ. އަދި ފެބްރުއަރީ މަސް އަންނަންވާއިރު 100 މިލިއަން މީހުންނަށް އަދި އަންނަ އަހަރުގެ ޖޫން މަހާ ހަމައަށް އެމެރިކާގެ މުޅި އާބާދީއަށް ވެކްސިން ދިނުމަށް އަންނަނީ މަސައްކަތްކުރަމުންނެވެ.

އެންމެ ފުރަތަމަ ވެކްސިން ދޭންހަމަޖެހިފައިވާ މީހުންގެ ތެރޭގައި ސިއްހީ ދާއިރާގައި މަސައްކަތްކުރާ މީހުން ހިމެނެއެވެ.

ފައިޒަރގެ ކޮވިޑް-19 ވެކްސިން އަކީ އުމުރުން 16 އަހަރާއި 85 އަހަރާ ދެމެދުގެ މީހުންނަށް ޖެހުމަށް ތައްޔާރުކޮށްފައިވާ ވެކްސިނެކެވެ.

މިދިޔަ މަހު ފައިޒަރ އިން ބުނެފައިވަނީ މި ވެކްސިނަކީ ކޮވިޑުން ދިފާއުކޮށްދިނުމުގައި 95 އިންސައްތަ ކާމިޔާބު ވެކްސިނެއްކަމަށެވެ.