އެމެރިކާގައިތިބި ކިއުބާގެ 15 ޑިޕްލޮމޭޓަކު ފޮނުވާލަން ނިންމައިފި

ހަވާނާގައި ތިބި އެމެރިކާގެ ޑިޕްލޮމޭޓުންނަށް ދެވުނު އާދަޔާ ޚިލާފް އެކޯސްޓިކް ހަމަލާއިން އެމީހުން ދިފާއުކުރަން އެ ގައުމު ނުކުޅެދުނު ކަމަށް ބުނެ އެމެރިކާގައި ތިބި ކިއުބާގެ 15 ޑިޕްލޮމޭޓަކު އެ ގައުމުން ފޮނުވާލަން ނިންމައިފިއެވެ.

ކިއުބާގެ ޑިޕްލޮމޭޓުންނަށް ވަނީ އެ ގައުމު ދޫކޮށް ދިއުމަށް ހަތްދުވަހުގެ މުއްދަތެއް ދީފައެވެ.

އެމެރިކާގެ ސްޓޭޓް ޑިޕާޓްމަންޓުން މި ފިޔަވަޅު އަޅާފައި މިވަނީ ކިއުބާގައި ތިބި އެ ގައުމުގެ ޑިޕްލޮމޭޓުންގެ ތެރެއިން ދެބައިކުޅަ އެއްބައި މީހުން މިދިޔަ ހަފްތާގައި އަނބުރާ އެމެރިކާއަށް ގެންދިއުމަށްފަހުއެވެ.

ކިއުބާގެ ވެރިރަށް ހަވާނާގައި ތިބި އެމެރިކާގެ ޑިޕްލޮމޭޓުންގެ ތެރެއިން 24 އަށް ވުރެ ގިނަ މީހުން ވަނީ ގޮތްނޭނގޭ ހަމަލާއެއްގެ ސަބަބުން ސިއްހީ މައްސަލަ ތަކާ ކުރިމަތިލާން ޖެހިފައެވެ.

"އަޅުގަނޑުމެންނަށް މިފިޔަވަޅު އަޅަން ޖެހުނީ ކިއުބާއިން އެކަށީގެންވާ ފިޔަވަޅުތަކެއް އަޅައިގެން އަޅުގަނޑުމެންގެ ޑިޕްލޮމޭޓުންނަށް ވިއެނާ ކޮންވެންޝަންގެ ދަށުން ލާޒިމް ކުރާގޮތުގެ މަތިން ރައްކާތެރިކަން ދޭން ނުކުޅެދުމުން. މި އަމުރުން ކަށަވަރު ކުރެވިގެންދާނެ އަޅުގަނޑުމެންގެ ޑިޕްލޮމެޓިކް އޮޕަރޭޝަންގެ ހަމަހަމަކަން" އަންގާރަ ދުވަހު ނެރުއްވާފައިވާ ބަޔާނުގައި ސެކްރެޓަރީ އޮފް ސްޓޭޓް ރެކްސް ޓިލަރސަން ވިދާޅުވެފައިވެއެވެ.

ކިއުބާގައި ހުންނަ އެމެރިކާ އެމްބަސީގައި މަސައްކަތްކުރާ ޑިޕްލޮމޭޓުންގެ ތެރެއިން މަދުވެގެން 21 މީހަކަށް އެކިކަހަލަ ސިއްހީ މައްސަލަތަށް ކުރިމަތިވެފައިވާކަމަށް ވަނީ ރިޕޯޓް ކޮށްފައެވެ. އޭގެ ތެރޭގައި ސިކުނޑިއަށް ގެއްލުންވުމާ ބީރުވުމާއި ބޯ އެނބުރުމާއި އައްސސިވުން ހިމެނެއެވެ.

ފުރަތަމަ ލިބުނު ރިޕޯޓްތަކަށް ބަލާއިރު އެކަން ދިމާވެފައި ވަނީ ސޮނިކް އެޓޭކްގެ ސަބަބުންކަމަށް ބުނި ނަމަވެސް އެފަދަ އެއްވެސް ކަމެއް ސާބިތެއް ނުވެއެވެ.

އެމެރިކާ އެމްބަސީ ސްޓާފުންނަށް އަމާޒު ކޮށްގެން އެފަދަ ކަމެއް ނުކުރާ ކަމަށް ބުނާއިރު އެމެރިކާއިން ވެސް މި ހަމަލާގެ ޒިންމާ ކިއުބާގެ ސަރުކާރުގެ ބޮލުގައި ނާޅުވައެވެ.

ސޮނިކް އެޓޭކަކީ އަޑެއް ބޭނުން ކޮށްގެން މީހުން މަރާލުމަށް ނުވަތަ ނުކުޅެދޭ މީހަކަށް ހަދާލަން ދެވޭ ބާވަތެއްގެ ހަމަލާއެކެވެ.