ދެވަނަ ބޮޑުހަނގުރާމައިގެ ދުވަސްވަރު އެޑޮލްފް ހިޓްލަރ ބޭނުންކުރި ޓެލެފޯނެއް އެމެރިކާގައި ހަފްތާބަންދުގައި ނީލަން ކިޔަން ނިންމައިފިއެވެ.

ނާޒީ ލީޑަރުންގެ ނަން ކަނޑާނަގާފައިވާ ރަތްކުލައިގެ މި ފޯނު ފެނިފައިވަނީ ބާލިންގައި ހަދާފައިވާ  އޭނާގެ ބަންކަރުން 1945ގައެވެ.

ޖަރުމަނުން ބަލި ގަބޫލުކުރިތާ ގިނައިރުތަކެއްނުވެ، ސޯވިއެޓް ސިފައިން މި ފޯނު ދީފައިވަނީ އިނގިރޭސި ސިފައިންގެ އޮފިސަރެއް ކަމަށްވާ ސަރ ރަލްފް ރޭނާއަށެވެ.

އެލެގްޒެންޑަރ ހިސްޓޮރިކަލް އޯކްޝަން ހައުސްއިން ބުނީ ނީލަން ފެށޭނީ 100،000 ޑޮލަރުން ކަމަށެވެ.

އޯކަޝަން ހައުސްގެ އޮފިޝަލެއްކަމަށްވާ ބިލް ޕެނަގޯޕުލޮސް ބުނީ އެ ފޯނަކީ އެތައް ބަޔަކު މެރުމަށް އަމުރުކުރުމަށް ހިޓްލަރ ބޭނުންކޮށްފައިވާ ވަސީލަތެއްކަމަށްވާއިރު އެއީ "ވެޕަން އޮފް މާސް ޑިސްޓްރަކްޝަން" ނުވަތަ ފަނާ ކުރަނިވި ހަތިޔާރެއްގެ ގޮތުގައި ފޯން ބެލިދާނެކަމަށެވެ.

ސަރ ރަލްފް ދަރިކަލުން ވިއްކާލި މި ފޯނުގެ އަގު 300،000 އެމެރިކާ ޑޮލަރަށް އަރާނެ ކަމަށް ވަނީ ބެލެވިފައެވެ.