ފައިޒަރ އަދި ބައޯއެންޓެކް ވެކްސިނަށް އެމެރިކާގެ ހުއްދަ ލިބިއްޖެ

އެމެރިކާގެ ފާމަސޫޓިކަލް ކުންފުނި ފައިޒަރ އާއި ޖަރުމަނުގެ ބައޯއެންޓެކް ގުޅިގެން އުފެއްދި ކޮވިޑް-19 ވެކްސިނަށް އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) ގެ ހުއްދަ ލިިބިއްޖެއެވެ.

އެމެރިކާއިން ފައިޒަރގެ ވެކްސިނަށް ހުއްދަ ދީފައިވަނީ ވެކްސިންނަށް ހުއްދަ ދިނުމަށް ބޭއްވި އެފްޑީއޭގެ ޕެނަލްގައި ބައިވެރިވި 22 މީހުންގެ ތެރެއިން 17 މީހުންގެ ވޯޓާއިއެކުއެވެ. ހަތަރު ފަރާތަކުން ވެކްސިނަށް ހުއްދަ ދިނުމާ ދެކޮޅަށް ވޯޓުލާފައިވާއިރު، ޕެނަލްގެ އެކަކު ވަކިގޮތަކަށް ވޯޓު ދީފައެއް ނުވެއެވެ.

ވެކްސިނަކަށް ހުއްދަ ލިބުމާއެކު އެ ވެކްސިން ދޭން ފަށާނެކަމަށާއި، ޑިސެމްބަރ 10 ވަނަ ދުވަހު ވެކްސިނަށް ހުއްދަ ލިބިއްޖެނަމަ 11 ވަނަ ދުވަހު ވެކްސިން ޖަހަން ލިބޭނެކަމަށް އެމެރިކާއިން ބުނެފައިވެއެވެ. ނަމަވެސް، ވެކްސިން ދިނުމުގެ ޕްރޮގްރާމް ފަށަން އިތުރު ދުވަސްތަކެއް ނަގާފާނެކަމަށް ކަމުގެ މައުލޫމާތު ހުރި ފަރާތްތަކާ ހަވާލަދީ މީޑިއާތަކުން ރިޕޯޓްކޮށްފައިވެއެވެ. އެ ގައުމުން ރާވާފައިވަނީ 16 އަހަރުން މަތީގެ ފަރާތްތަކަށް ވެކްސިން ޖެހުމަށެވެ.

ކޮވިޑް ވެކްސިނަކަށް އެމެރިކާއިން ހުއްދަ ދީފައި މިވަނީ އެ ގައުމުން ކޮވިޑަށް ޕޮޒިޓިވްވާ މީހުންގެ އަދަދުތަކާއި، އެ ބަލި ޖެހިގެން މަރުވާ މީހުންގެ އަދަދު އިންތިހާއަށް މައްޗަށް ގޮސްފައިވާ ދަނޑިވަޅެއްގައެވެ. އެންމެ ފަހުގެ އަދަދުތަކަށް ބަލާއިރުވެސް އެއްދުވަހާ 3,100 މީހުން މަރުވެގެން އެމެރިކާގައި ރިޕޯޓްކޮށްފައިވެއެވެ.

މި ވެކްސިން އުފެއްދި ފައިޒަރ ކުންފުނިންވަނީ ޑިސެމްބަރު މަސް ނިމުމުގެ ކުރިން އެމެރިކާއަށް 25 މިލިއަން ޑޯޒް ފޯރުކޮށްދޭނެކަމަށް ބުނެފައެވެ. އެއީ 15 މިލިއަން މީހުންގެ ގަޔަށް ޖެހޭނެ ވަރުގެ އަދަދެކެވެ. އެ ކުންފުނިންވަނީ އެމެރިކާގެ އެކި ސަރަހައްދުތަކަށް ވެކްސިން ފޯރުކޮށްދިނުމުގައި ދިމާވެދާނެ ގޮންޖެހުތައް ދެނެގަތުމަށް ހަތަރު ސްޓޭޓެއްގައި ވެކްސިން ޑިސްޓްރިބިއުޝަންގެ ޓްރަޔަލްތަކެއްވެސް ކުރިއަށް ގެންގޮސްފައެވެ.

ފައިޒަރ އަދި ބައޯއެންޓެކް ވެކްސިންގެ އެންމެ ފަހުގެ ނަތީޖާތައް ދައްކާގޮތުން މި ވެކްސިނަކީ ކޮވިޑުން ދިފާއުކޮށްދިނުމުގައި 95 އިންސައްތަ ކާމިޔާބު ވެކްސިނެކެވެ. މިއީ މިހާތަނަށް އުފެއްދި ވެކްސިންތަކުގެ ތެރެއިން ވައިރަހުން ދިފާއުކުރުމުގައި އެންމެ ކާމިޔާބު އެއް ވެކްސިނެވެ.