ނުކުޅެދުންތެރިކަން ހުންނަ ކުދިންނަށް ކުޅިވަރު ކުޅުމުގެ ހާއްސަ ޕްރޮގްރާމެއް

ކުޅިވަރާ ބެހޭ ވުޒާރާ އާއި ސްޕެޝަލް އޮލިމްޕިކްސް ކޮމިޓީ އަދި މޯލްޑިވްސް ޕެރަލިމްޕިކް ކޮމިޓީ ގުޅިގެން ނުކުޅެދުންތެރިކަން ހުންނަ ކުދިންނަށް ކުޅިވަރު ކުޅުމުގެ ފުރުސަތުތައް އިތުރުކުރުމަށް ހާއްސަ ޕްރޮގްރާމެއް ފަށައިފިއެވެ.

މި ޕްރޮގްރާމުގައި ގައުމީ ކުޅިވަރު އެސޯސިއޭޝަންތަކުގެ ތެރެއިން އެތުލެޓިކްސް އެސޯސިއޭޝަން އޮފް މޯލްޑިވްސް އާއި، ސްވިމިންގ އެސޯސިއޭޝަން އޮފް މޯލްޑިވްސް އާއި، ބެޑްމިންޓަން އެސޯސިއޭޝަން އޮފް މޯލްޑިވްސް އަދި ފުޓްބޯލް އެސޯސިއޭޝަން އޮފް މޯލްޑިވްސްއިން ވަނީ ބައިވެރިވެފައެވެ.

މި ޕްރޮގްރާމް އިފްތިތާހުކުރުމަށް އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ހުޅުވާލެވިގެން މިދިޔަ ފުރުސަތުގައި ވީހާވެސް ގިނަ ބޭފުޅުން ބައިވެރިވާނެ ކަމަށް އުންމީދުކުރައްވާ ކަމަށެވެ. އަދި ކޮވިޑް-19 އާ ގުޅިގެން މަސައްކަތް ފަށަން ޖެހިފައިވަނީ މާލޭ ސަރަހައްދުގައި ކަމަށާއި، އެހެން ނަމަވެސް ޖާގަ ލިބެމުންދާ މިންވަރަކުން އަތޮޅު ތެރެއަށްވެސް މި ހަރަކާތް ފުޅާކުރުމަށް ހަމަޖެހިފައިވާ ކަމަށް ވިދާޅުވިއެވެ. އަދި މި ޕްރޮގްރާމުގައި ބައިވެރިވުމަށް އެއްވެސް ފައިސާއެއް ނުނަގާނެ ކަމަށާއި، މިކަން ކުރުމަށް ވުޒާރާގެ ފަރާތުން ހުރިހާ އެއްބާރުލުމެއް ލިބިގެންދާނެ ކަމަށްވެސް މަޙްލޫފް ވިދާޅުވިއެވެ. އަދި މައިގަނޑު ހަތަރު ކުޅިވަރެއް މި ވަގުތަށް އޮތް ނަމަވެސް، އެހެން ކުޅިވަރުތައް ކުޅެން އެދޭ ކުދިންނަށްވެސް އެ ފުރުސަތު ހޯދައިދެވޭނެ ކަމަށްވެސް ވިދާޅުވިއެވެ.

ނޫސްވެރިންގެ މި ބައްދަލުވުމުގައި ބައިވެރިވި، އެސޯސިއޭޝަންތަކުގެ އިސް ބޭފުޅުން ވަނީ މި ޕްރޮގްރާމަށް ފުރިހަމަ އެއްބާރުލުންދޭނެ ކަމަށް ވިދާޅުވެފައެވެ. އަދި ކުރިއަށް އޮތް ތަނުގައި މި ޕްރޮގްރާމް އަތޮޅުތެރަށް ފުޅާ ކުރުމަށް މަސައްކަތް ކުރައްވާނެ ކަމަށްވެސް ވިދާޅުވިއެވެ.

އަންގާރަ ދުވަހު ބޭއްވި ބައްދަލުވުމުގައި ނުކުޅެދުންތެރިކަން ހުންނަ ކުދިންގެ ބެލެނިވެރިން ވިދާޅުވީ މިއީ ނުކުޅެދުންތެރިކަން ހުންނަ ކުދިންނަށް ލިބުނު ބޮޑު ފުރުސަތެއް ކަމަށާއި، މި ފުރުސަތުގެ ބޭނުން އެންމެހާ ބެލެނިވެރިން ހިފުމަށް ގޮވާލާ ކަމަށެވެ.

މި މަހުގެ 31 ވަނަ ދުވަހުގެ ނިޔަލަށް މި ޕްރޮގްރާމުގައި ރަޖިސްޓްރީވުމުގެ ފުރުސަތު ހުޅުވާލާފައިވާއިރު، ޔޫތު އެކަމަޑޭޝަން ބްލޮކުގައި ހުންނަ ސްޕެޝަލް އޮލިމްޕިކް ކޮމިޓީގެ އޮފީހުން ފޯމް ލިބެން ހުންނާނެއެވެ. އަދި އޮންލައިންކޮށްވެސް ފޯމް ފުރުމުގެ ފުރުސަތު ވަނީ ހުޅުވާލާފައެވެ. މި ޕްރޮގްރާމުގައި ރަޖިސްޓްރީވާ ކުދިންގެ ފަރިތަކުރުންތައް ފެށުމަށް ހަމަޖެހިފައިވަނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ހުއްދަ ލިބުމާއެކު ހާއްސަ އުސޫލުތަކެއްގެ ދަށުންނެވެ.