ކުޑަކުދިންގެ ދުވަހާ ގުޅުވައިގެން ބޭންކް އޮފް މޯލްޑިވްސް ބީއެމްއެލް އާއި ޓީއެފްޖީ ގުޅިގެން ދުވުމެއް ބާއްވަން ނިންމައިފިއެވެ.
އުމުރުން ނުވަ އަހަރުން ދަށުގެ 600 އެއްހާ ކުދިން ބައިވެރިކޮށްގެން ކުރިއަށް ގެންދިއުމަށް ނިންމާފައިވާ މި ދުވުން އޮންނާނީ، އަންނަ މޭ މަހުގެ 12 ވަނަ ދުވަހު ކަމަށް ބީއެމްއެލުން މައުލޫމާތުދެއެވެ.
ބީއެމްއެލްގެ ޕަބްލިކް ރިލޭޝަންސް އޮފިސަރު މުހައްމަދު ސައީދު ވިދާޅުވީ، މި ދުވުމަކީ ބީއެމްއެލްގެ ސީއެސްއާރު ޕްރޮގްރާމްގެ ދަށުން ކުރިއަށްގެންދާ ހަރަކާތްތަކުގެ ދަށުން ކުރިއަށްގެންދިއުމަށް ރާވާފައިވާ ހަރަކާތެއް ކަމަށެވެ. އެގޮތުން މި ދުވުމަކީ ދުޅަހެޔޮ މުޖުތަމައުއެއް ބިނާކުރުމަށް ކުރަމުންދާ މަސައްކަތަށް އިތުރުވާ ބޮޅެއް ކަމަށް ސައީދު ވިދާޅުވިއެވެ.
މި ދުވުން އިންތިޒާމް ކުރާ ޓީއެފްޖީ ޖިމްގެ ސީއީއޯ ހުސެއިން ޒިނާން ވިދާޅުވީ، ކުރީ އަހަރުތަކެކޭ އެއްގޮތަށް މި ދުވުން ކުރިއަށް ދާނީ ތިން އުމުރުފުރާއަކަށް ބަހާލައިގެންކަމަށެވެ. އެގޮތުން ތިން އަހަރާއި ފަސްއަހަރާއި ދެމެދު އުމުރުފުރާ އާއި، ފަސްއަހަރާއި ހަތް އަހަރާއި އަދި ހަތް އަހަރާއި ނުވަ އަހަރާ ދޭތެރޭގެ އުމުރުފުރާތަކުގެ ކުދިންނަށް ފުރުސަތު ހުޅުވާލާނޭ ކަމަށެވެ.
ކޮންމެ އުމުރުފުރާއަކުން ޖާގަދިނުމަށް ހަމަޖެހިފައި ވަނީ 200 ކުދިންނަށް ކަމަށް ޒިނާން ވިދާޅުވިއެވެ. ފުރުސަތު ދެވޭނީ އެންމެފުތަމަ ނަންނޯޓް ކުރާ ތަރުތީބުން ކަަމަށް ޒިނާން ވިދާޅުވިއެވެ. އަދި ނަންނޯޓްކުރުމުގެ ފުރުސަތު ވަރަށް އަވަހަށް ހުޅުވާލާ ޓީއެފްޖީގެ ވެބްސައިޓް މެދުވެރިކޮށް މައުލޫމާތު އާއްމުކުރަމުންދާނެކަމަށް ޒިނާން ވިދާޅުވިއެވެ.
މީ ބީއެމްއެލްއާ އެކު ޓީއެފްޖީން މި ދުވުން ބާއްވާތާ ތިންވަނަ އަހަރެވެ.
