މައުމޫނަކީ ދިވެހިން ފިއްކަނޑައިގެންދާ ވަރަށް އަނިޔާކުރެއްވި ވެރިއެއް - ރައީސް ނަޝީދު
8 ޑިސެމްބަރު 2020 | އަންގާރަ 04:03އަޅުގަނޑުގެ ވެރިކަމުގައި ކުރީގެ ރައީސް މައުމޫން އަބްދުލްޤައްޔޫމު ގެންގޮސް ޖަލަކަށް ނުލައްވަން - ރައީސް ނަޝީދު
ކުރީގެ ރައީސް މުހައްމަދު ނަޝީދު، ކުރީގެ ރައީސް މައުމޫނުގެ ވެރިކަމުގައި ހައްޔަރުކޮށްގެން ފުލުހުންގެ ބެލުމުގެ ދަށަށް ގެންދަނީ
ކުރީގެ ރައީސް މައުމޫނު ޢަބްދުލްޤައްޔޫމަކީ، އެ މަނިކުފާނުގެ ވެރިކަމުގައި ރައްޔިތުން ފިއްކަނޑައިގެންދާވަރުގެ އަނިޔާވެރި ވެރިކަމެއް ކުރެއްވި ބޭފުޅެއްކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ހޯމަ ދުވަހުގެ ރޭ ރައްޔިތުންގެ މަޖިލީހުން އިންތިޒާމްކޮށްގެން ބޭއްވި "އާސްކް ސްޕީކާރ" ޕްރޮގްރާމުގައި ވާހަކަ ދައްކަވަމުން ރައީސް ނަޝީދު ވިދާޅުވީ، އެ މަނިކުފާނު މި ގައުމުގެ ވެެރިކަމުގައި ހުންނެވިއިރު، ކުރީގެ ރައީސް މައުމޫން އަބްދުލްޤައްޔޫމު ގެންގޮސް ޖަލަށް ނުލައްވާކަމަށެވެ. އަދި އެހެން ކަންކުރެއްވީ ރައީސް މައުމޫނުގެ ވެރިކަމުގައި އެ މަނިކުފާނަށް ނުކުރައްވައި އޮތުމުން ނޫންކަމަށް ވިދާޅުވެ ރައީސް ނަޝީދު އިތުރަށް ވިދާޅުވީ، ރައީސް މައުމޫނަކީ އިންތިހާއަށް އަނިޔާވެރި 30 އަހަރުގެ ހުދުމުހުތާރު ވެރިކަމެއް ކުރެއްވި ބޭފުޅެއްކަމަށެވެ.
ރައީސް ނަޝީދު ވިދާޅުވީ، އެހެން ނަމަވެސް އެ މަނިކުފާނުގެ ވެރިކަމުގައި އެފަދަ ގޮތަކަށް ކަން ނުކުރައްވާ މަސައްކަތް ކުރެއްވީ، އެކަން އެމަގުން ނުދާނެ ގޮތަކަށް ތާރީހީ ފަތްފުއްތަކާ ހަމައަށް ގެންދެވޭނެ ހެޔޮ ވެރިކަމެއް ކުރިއަށްގެންދެވޭނެ ގޮތެއް ހޯއްދެވުމަށްކަމަށެވެ.
ރައީސް ނަޝީދު އިތުރަށް ވިދާޅުވީ، ކުރީގެ ނައިބު ރައީސް ޑރ. މުހައްމަދު ވަހީދު ހަސަން މަނިކުވެސް އެ މަނިކުފާނު ޖަލަށް ލެއްވެވިކަމަށާއި އެހެން ނަމަވެސް އޭގެ ބަދަލުގައި ރައީސް ވަހީދު ޖަލަށް ލައްވަން ނޫޅުއްވާކަމަށެވެ.
މި މޭރުމުން ވާހަކަ ދައްކަވަމުން ރައީސް ނަޝީދު ވިދާޅުވީ، ރައީސް ވަހީދުގެ ވެރިކަމަށްފަހު ޖެހިގެން އައި އަބްދުﷲ ޔާމީނުގެ ވެރިކަމުގައިވެސް އެ މަނިކުފާނު ގެންގޮސް ޖަލަށް ލެއްވި ކަމަށާއި މިގޮތަށް ފަހަރަކު ވެރިޔަކު ގެންގޮސް ޖަލަށް ލާހާ ދުވަހަކު، އެކަމަށް ހުއްޓުމެއް ނާންނާނެކަމަށެވެ. ނަމަވެސް އެ މަނިކުފާނު ބޭނުންފުޅުވެލައްވަނީ އެކަމަށް ހުއްޓުމެއް ގެންނަންކަމަށް ވިދާޅުވިއެވެ.
ރައީސް ނަޝީދު މިފަދަ މޭރުމަކުން ވާހަކަ ދައްކަވާފައިވާއިރު، އެ މަނިކުފާނަކީ ރައީސް މައުމޫނުގެ ވެރިކަމުގައި ތަފާތު އެކި ފަހަރު މަތިން ހައްޔަރުކޮށްފައިވާ ބޭފުޅެކެވެ. އެހެން ނަމަވެސް އަދި މިހާތަނަށް އެކަމުގައި ރައީސް މައުމޫނަށް ނުވަތަ ކުރީގެ އެއްވެސް ރައީސަކަށް ދައުވާއެއް ކުރުމަށް ނުވަތަ ހައްޔަރު ކުރުމުގެ ވިސްނުންފުޅެއް ނުގެންގުޅުއްވާކަމަށްވެސް ރައީސް ނަޝީދު އަންނަނީ ވިދާޅުވަމުންނެވެ.
