އޭވިއޭޝަން ދާއިރާއިން ކިޔަވާ ކުދިންގެ ގޮންޖެހުންތަކަށް ހައްލު ހޯދައި ދޭނަން: މިނިސްޓަރު ނަހުލާ

އޭވިއޭޝަންގެ ދާއިރާއިން ތައުލީމު ހާސިލުކުރަމުންދާ ދަރިވަރުންނަށް ދިމާވާ ދަތިތައް ހައްލުކޮށް ކިޔެވުން ފުރިހަމަ ކުރެވޭނޭ މަގު ތަނަވަސްކޮށްދެއްވާނެ ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.

މިނިސްޓަރު ނަހުލާ މިހެން ވިދާޅުވީ، ބައިނަލްއަޤްވާމީ މަދަނީ ވައިގެ ދަތުރުފަތުރުގެ ދުވަހާއި ގުޅިގެން ދެއްވި ޚިތާބުގައެވެ.

މިނިސްޓަރު ނަަހުލާ ވިދާޅުވީ، މަދަނީ ވައިގެ ދަތުރުފަތުގެ ދާއިރާއިން ފަންނީ މުވައްޒަފުން ބިނާކުރުމަކީ ބައިނަލްއަޤުވާމީ ފެންވަރުގައިވެސް ދިމާވެފައިވާ ވަރަށް ބޮޑު ގޮންޖެހުމެއް ކަމަށާއި މިދާއިރާއިން ތަޢުލީމު ޙާސިލުކުރާ ދަރިވަރުންނަށް ދިމާވާ ދަތިތައް ޙައްލުކޮށް ކިޔެވުން ފުރިހަމަ ކުރެވޭނޭ މަގުތައް ތަނަވަސްކުރުމަށް ސަރުކާރުން އަބަދުވެސް އިސްކަންދޭނެ ކަމަށެވެ. އަދި މި ދާއިރާއިން ކިޔެވުމަށް ދިވެހި ދަރީންނަށް މަގުފަހިކޮށްދީ ވަޒީފާގެ ބާޒާރުވެސް ދިވެހި ޒުވާނުންނަށް ތިޔާގި ކުރަމުން ގެންދިއުމަކީ އެ ވުޒާރާއިން ކުރަންޖެހޭ މުހިންމު ކަމެއްގެ ގޮތުގައި މިނިސްޓަރު ފާހަގަކުރެއްވި އެވެ.

މި މޭރުމުން ވާހަކަ ދައްކަވަމުން މިނިސްޓަރު ނަހުލާ ވަނީ، ކޯވިޑް-19 ގެ ބަލިމަޑުކަން ކުރިމަތިވުމުގެ ސަބަބުން، ދިވެހިރާއްޖެއަށް މިހާރު ދިމާވެފައިވާ ގޮންޖެހުންތަކުން އަރައިގަތުމަށް ހަރުދަނާ ޕްލޭންތަކާ އެކު، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ކުރައްވާ މިންނެތް މަސައްކަތްޕުޅު ފާހަގަކުރައްވާ އެމަނިކުފާނަށް ޝުކުރު އަދާކުރައްވާފައެވެ.މަދަނީ ވައިގެ ދަތުރުފަރުގެ ސިނާޢަތް ތަރައްޤީކޮށް ކުރިއެރުވުމަށް ބައިނަލްއަޤުވާމީ އިދާރާތަކާއި ރާއްޖެ ބައިވެރިވާ ސަރަޙައްދީ ޙަރަކާތްތަކުން ފޯރުކޮށްދެމުން ގެންދާ އެހީތެރިކަން ފާހަގަކުރައްވާ މިނިސްޓަރު ވިދާޅުވީ، މި ދާއިރާއިން ލިބެމުންދާ ފައިދާ އިތުރުވެގެން މި ދަނީ ސިނާޢަތުގެ ބައިވެރިންގެބޮޑު ޙިއްސާ އާއި އެކުގައި ކަމަށެވެ.

ކޮންމެ އަހަރެއްގެ ޑިސެމްބަރު މަހުގެ 7 ވަނަ ދުވަސް ފާހަގަކުރަމުންދަނީ "އިންޓަރނޭޝަނަލް ސިވިލް އޭވިއޭޝަން ޑޭ" ނުވަތަ ދުނިޔޭގެ މަދަނީ ވައިގެ ދަތުރުފަތުރުގެ ދުވަހުގެ ގޮތުގައެވެ. މި ދުވަސް ފުރަތަމަ ފާހަގަ ކުރަން ފެށުނީ 1994 ވަނަ އަހަރު އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އަށް 50 އަހަރު ފުރުމުގެ ޙަރަކާތްތަކުގެ ތެރެއިންނެވެ.

1996 ވަނަ އަހަރު އައިކާއޯގެ އިސްނެގުމުގެ މަތީން، އ.ދ. ގެ ޖެނެރަލް އެސެމްބްލީން ވަނީ ޑިސެމްބަރު މަހުގެ 7 ވަނަ ދުވަހަކީ އ.ދ. ގެ ނިޒާމުގެ ތެރެއިން ފާހަގަ ކުރާ ބައިނަލްއަޤުވާމީ މަދަނީ ވައިގެ ދަތުރު ފަތުރުގެ ދުވަހުގެ ގޮތުގައި ބަލައިގެންފައެވެ.

އައިކާއޯއިން މިދުވަސް ފާހަގަކުރަމުންދަނީ ކޮންމެ 5 އަހަރަކަށް ވަކި ޚާއްސަ ތީމެއް ނުވަތަ ޝިއާރެއް ކަނޑައަޅައިގެންނެވެ. އެގޮތުން 2019 އިން 2024 އަށް އެ ޖަމިއްޔާއިން ކަނޑައަޅާފައިވާ ޝިއާރަކީ "އެޑްވާންސިންގ އިނޮވޭޝަން ފޯރ ގްލޯބަލް އޭވިއޭޝަން ޑިވެލޮޕްމަންޓް" އެވެ. މިއީ ދުނިޔޭގެ އޭވިއޭޝަން ދާއިރާ ކުރިއެރުވުމުގައި މިހާރަށްވުރެ ބޮޑަށް އީޖާދީގޮތްތައް ބޭނުންކުރުމަށް ހިތްވަރުދިނުމުގެ ގޮތުން އެ ޖަމިއްޔާއިން ކަނޑައަޅާފައިވާ ޝިއާރެކެވެ.