ދޮންކެޔޮ ތޮށި ކޮންޓެއިނަރެއްގެ ތެރެއިން 100 މިލިއަން ޑޮލަރުގެ ކޮކެއިން އިނގިރޭސި ފުލުހުން އަތުލައިގަނެފި
7 ޑިސެމްބަރު 2020 | ހޯމަ 09:28މި ކޮންޓެއިނަރު ބަރުކުރީ ކޮލަމްބިއާއިން، މިސްރާބުހުރީ ބެލްޖިއަމްގެ އެންޓްވަރޕަށް
އެސެކްސް ބަނދަރުން އަތުލައިގަތް މަސްތުވާތަކެތި މީޑިއާތަކަށް ދައްކާލަނީ
އިނގިރޭސިވިލާތުގެ އެސެކްސް ބަނދަރުގައި އޮތް ދޮންކެޔޮ ތޮށި ކޮންޓެއިނަރެއްގެ ތެރެއިން 100 މިލިއަން ޑޮލަރުގެ ކޮކެއިން އަތުލައިގަނެވިއްޖެ ކަމަށް އެ ގައުމުގެ ދާހިލީ ވުޒާރާއިން ހާމަކޮށްފިއެވެ.
މަސްތުވާތަކެތި ފޮރުވާފައިވާ ކޮންޓެއިނަރު ފުލުހުންނަށް ފެނިފައިވަނީ، އެސެކްސްގައި ހުންނަ ލަންޑަން ގޭޓްވޭ ޑީޕޯގައި އަޅާފައިއޮތް އާގުބޯޓަކުންނެވެ. ބެލްޖިއަމްގެ އެންޓްވަރޕަށް ދަތުރުކުރަމުން ދިޔަ މި ބޯޓުގެ ކޮންޓެއިނަރެއްގެ ތެރެއިން ނެގި މަސްތުވާތަކެތީގެ ވަގުތީ ބަރުދަނުގައި 1،060 ކިލޯ ހުރިކަމަށް ކަމާބެހޭ އިދާރާތަކާ ހަވާލާދީ "ސްކައިނިއުސް" ގައި ރިޕޯޓްކުރިއެވެ.
މަސްތުވާތަކެތި އަތުލައިގަތުމުން ހިތްހަމަޖެހިވަޑައިގެން ހުންނެވިކަން ފާހަގަކުރައްވަމުން އިނގިރޭސި ދާހިލިއްޔާގެ ވެރިޔާ ޕްރިޓީ ޕަޓޭލް މި އޮޕަރޭޝަންގެ ކާމިޔާބީ ސިފަކުރެއްވީ ޓްރެފިކްކުރާ ފަރާތްތަކަށް ދެވުނު މެސެޖެއްގެ ގޮތުގައެވެ. އެގޮތުން އިނގިރޭސިވިލާތަށް ވަންނަ މަސްތުވާތަކެތި ހުއްޓުވަން ގާނޫނު ތަންފީޒުކުރާ އިދާރާތަކުން އެންމެ ތަންކޮޅެއްވެސް ފަހަތަކަށް ނުޖެހޭނެކަމަށް ވިދާޅުވިއެވެ.
މިއީ ކުޑަ ދުވަސްކޮޅެއްގެ ތެރޭގައި އެސެކްސްގެ ބަނދަރުން މިހާ ގިނަ އަދަދެއްގެ ކޮކެއިން އަތުލައިގަނެވުނު ދެވަނަ ފަހަރެވެ. މީގެ ދެ މަހެއްހާ ދުވަސް ކުރިން އަތުލައިގަތް މަސްތުވާތަކެތީގެ މަގުމަތީ އަގު 150 މިލިއަން ޑޮލަރާ ގާތްކުރާކަމަށް މީޑިއާތަކުން ރިޕޯޓްކުރިއެވެ.
އީޔޫގެ ޑްރަގް އެޖެންސީން އެންމެފަހުން އާންމުކުރި ތަފާސްހިސާބުތައް ދައްކާގޮތުގައި، ޔޫރަޕުގެ ގައުމުތަކުގެ ތެރެއިން އެންމެ ގިނަ އަދަދެއްގެ ބަޔަކު ކޮކެއިން ބޭނުންކުރަނީ އިނގިރޭސިވިލާތުގައެވެ. އަދި ނިމިދިޔަ އަހަރުގެ ތެރޭގައި އެ ގައުމުން މަސްތުވާތަކެތި ބޭނުންކޮށްގެން މަރުވި މީހުންގެ އަދަދުތައްވަނީ އެހެން އަހަރުތަކުގެ އަދަދުތައް މުގުރާލާފައެވެ.
