ކޮމިއުނިކޭޝަންސް މިނިސްޓްރީއަށް ނަތީޖާ ހާސިލްކުރެވުނީ ސިޔާސީ މުވައްޒަފުންގެ ސަބަބުން: އަލީ ޞާލިހު
6 ޑިސެމްބަރު 2020 | އާދީއްތަ 03:33މިނިސްޓްރީގެ އޮނިގަނޑުގައި 53 މުވައްޒަފުން ތިބި ނަމަވެސް ދީފައިވަނީ 17 މުވައްޒަފުން
ސްޓޭޓް މިނިސްޓަރ އަލީ ޞާލިހު
ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓްރީއަށް ގިނަ ކަންތައްތަކެއް ހާސިލްވެފައިވަނީ އެ މިނިސްޓްރީގައި މަސައްކަތްކުރަމުންދާ ސިޔާސީ މުވައްޒަފުންގެ ސަބަބުންކަމަށް އެ މިނިސްޓްރީގެ ސްޓޭޓް މިނިސްޓަރ އަލީ ޞާލިހު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި މިނިސްޓްރީގެ މަސައްކަތްތަކަށް ހުރި ގޮންޖެހުންތަކާއި ގުޅޭގޮތުން ވާހަކަ ދައްކަވަމުން އަލީ ޞާލިހު ވިދާޅުވީ މި ދާއިރާއަކީ ފާއިތުވި 15 ވަރަކަށް އަހަރު އަޅާނުލާ އޮތް ދާއިރާއެއްކަމަށެވެ.
އެގޮތުން މި ސަރުކާރު އައުމަށްފަހު ދާއިރާއަށް ޚާއްސަކޮށް ވުޒާރާއެއް އުފައްދާ މަސައްކަތްތަކެއް ހަވާލުކޮށްފައިވާއިރު، މިނިސްޓްރީގެ އޮނިގަނޑު ފާސްކޮށްފައިވަނީ 53 މުވައްޒަފުންނާއެކު ކަމަށް އަލީ ޞާލިހު ވިދާޅުވިއެވެ. ނަމަވެސް ސިވިލް ސަރވިސްއިން މިހާތަނަށް އައިއިރު އެ މިނިސްޓްރީއަށް ދީފައިވަނީ 17 މުވައްޒަފެއް ކަމަށް އަލީ ޞާލިހު ވިދާޅުވިއެވެ.
އަލީ ޞާލިހު ވަނީ މިނިސްޓްރީތަކުގެ އޮނިގަނޑުގައި ހުންނަ ތަފާތުކަމެއްގެ ސަބަބުން އެ މިނިސްޓްރީގައި މަސައްކަތްކުރާ ޑިވެލޮޕަރުން އެހެން ވުޒާރާތަކަށް ބޮޑު މުސާރައިގައިދާކަންވެސް ފާހަގަކުރައްވާފައެވެ. އަދި އެގޮތުން ކެނޑިގެންދާ މުވައްޒަފުންގެ ބަދަލުގައި މުވައްޒަފުން ނުނެގޭކަން ފާހަގަކުރެއްވިއެވެ.
އެގޮތުން ސަރުކާރުން ރައްޔިތުންނަށް ދެމުންދާ ޚިދުމަތްތަކާއި ގުޅޭ 15 އެޕްލިކޭޝަނެއްގެ މަސައްކަތް މިހާރުވެސް މިނިސްޓްރީގައި ކުރަމުންދާއިރު، އެކަންކަން ކުރުމަށް މިނިސްޓްރީގައި ތިބީ 8 ޑިވެލޮޕަރުންކަމަށް ވިދާޅުވެ ސޯލިހު ކަންބޮޑުވުން ފާޅުކުރެއްވިއެވެ. އަދި ވިދާޅުވީ މިނިސްޓްރީއަށް އެކަށީގެންވާ މިންވަރަށް މުވައްޒަފުން ލިބިގެން ނޫނީ މިނިސްޓްރީގެ މަސައްކަތްތައް އެންމެ އެދެވޭގޮތުގައި ކުރިޔަށްނުދާނެކަމަށެވެ.
