ކޮރަޕްޝަން ނައްތާލުން މުހިއްމުވަނީ ކީއްވެކަން އޭސީސީން ކިޔާދެނީ!
ޕަބްލިކް ޕްރޮކިއުމަންޓުގައި ކޮރަޕްޝަން ނައްތާލުން މުހިއްމުވާ ސަބަބުތަކާ ގުޅޭ މައުލޫމާތު ދޭނެ
އެންޓި ކޮރަޕްޝަން ކޮމިޝަން (އޭސީސީ)- މި ސެޝަންތައް ކުރިއަށް ގެންދާނީ އެކި ގަޑިތަކަށް ބަހާލައިގެން
މޯލްޑިވްސް ޓްރާންސްޕޭރެންސީ އެންޑް އެންޓި ކޮރަޕްޝަން ކޮންފަރެންސް 2020 ބޭއްވުމަށް ތާވަލުކޮށްފި އެވެ.
ޒޫމް މެދުވެރިކޮށް ހޯމަ ދުވަހު ފަށާ މި ކޮންފަރެންގެ ތާވަލު އޭސީސީން އާންމު ކޮށްފައިވާއިރު، އެކި ސެޝަންތަކަށް ބަހާލައިގެން ކޮރަޕްޝަނާ ގުޅޭ މައުލޫމާތު ބައްދަލުވުންތައް ކުރިއަށް ގެންދިއުމަށް ވަނީ ނިންމާފައެވެ.
އެގޮތުން މި ސެޝަންތަކުގައި ބައިވެރިވުމަށްޓަކައި ރަޖިސްޓަރ ވުމުގެ ފުރުސަތު އާންމުންނަށްވެސް ހުޅުވާލާފައިވާއިރު، ހޯމަ ދުވަހުގެ ހެނދުނު 09:45ން 10:30ށް ކުރިއަށް ގެންދިއުމަށް ހަމަޖެހިފައިވަނީ ޕަބްލިކް ޕްރޮކިއުމަންޓުގައި ކޮރަޕްޝަން ނައްތާލުން މުހިއްމުވާ ސަބަބުތަކާ ގުޅޭ ސެޝަން އެވެ. އެގޮތުން މި ސެޝަން ކުރިއަށް ގެންދާނީ އޭސީސީގެ އޮފިޝަލުން ކަމަށް އެ ކޮމިޝަނުން މައުލޫމާތުދެ އެވެ.
އެއަށްފަހު އެކި ގަޑިތަކަށް ބަހާލައިގެން މި ސެޝަންތައް ކުރިއަށް ގެންދިއުމަށް ނިންމާފައިވާއިރު، މެންދުރު 13:00ން 13:45 ށް އޮތީ ފުރިހަމަ ލާމަރުކަޒީ ނިޒާމެއް ހިންގުމުގައި ކޮރަޕްޝަންގެ ހިރާސް ކުޑަ ކުރުމުގެ މުހިއްމުކަމާ ގުޅޭގޮތުން ލޯކަލް ގަވަރމަންޓް އޮތޯރިޓީ (އެލްޖީއޭ) އިން މައުލޫމާތު ދިނުމަށް ބާއްވާ ސެޝަން އެވެ.
ހޯމަ ދުވަހު އެންމެ ފަހު ސެޝަންއެއްގެ ގޮތުން ރޭގަނޑު 20:30ން 22:00ށް ކުރިއަށްދާނީ ރާއްޖޭގައި ކޮރަޕްޝަންގެ މައްސަލަތައް ރިޕޯޓު ކުރުމުގައި ކުރިމަތިވާ ގޮންޖެހުންތަކާ ގުޅޭގޮތުން ބާއްވާ ބައްދަލުވުމެވެ. އެގޮތުން މި ބައްދަލުވުމުގައި މައުލޫމާތު ދިނުމަށް ހަމަޖެހިފައިވަނީ މޯލްޑިވްސް ޖާރނަލިސްޓް އެސޯސިއޭޝަން (އެމްޖޭއޭ) އެވެ.
