ރައީސް ޔާމީންގެ މައްޗަށް އުފުލާފައިވާ ރިޝްވަތާއި މަނީ ލޯންޑަރިން ދައުވާގެ އަޑުހުމެއް ތާވަލް ކޮށްފި
މިއަޑުއެހުން ކްރިމިނަލް ކޯޓުގައި ތާވަލް ކޮށްފައިވަނީ އާދިއްތަ ދުވަހުގެ 14:00 އަށް
ރ. ފުއްގިރި މައްސަލާގައި ކްރިމިނަލް ކޯޓުގައި އެންމެފަހުން ބޭއްވި އަޑުއެހުމުގެ ތެރެއިން
މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ހިޔާނާތުގައި ހިމެނޭ، ރ. ފުއްގިރި މައްސަލާގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ރިޝްވަތާއި މަނީ ލޯންޑަރިންގެ ދައުވާގެ އަޑުއެހުމެއް ކްރިމިނަލް ކޯޓުގައި އާދިއްތަ ދުވަހަށް ތާވަލް ކޮށްފި އެވެ.
އެމްއެމްޕީއާރުސީން ރިސޯޓެއްގެ ގޮތުގައި ތަރައްގީ ކުރުމަށް ކުށްޔަށް ދޫކުރި ރ. ފުއްގިރި މައްސަލައިގައި، ރައީސް ޔާމީންގެ މައްޗަށް އުފުލާފައިވަނީ މަނީ ލޯންޑަރިންގ ކުށުގެ ދައުވާއަކާއި ރިޝްވަތު ގަބޫލު ކުރުމުގެ ކުށުގެ ދައުވާއެކެވެ. އެ ދެ ދައުވާއާ ގުޅިގެން އާދިއްތަ ދުވަހުގެ 14:00 ގައި އަޑުއެހުމެއް ބޭއްވުމަށް ކްރިމިނަލް ކޯޓުގައި ވަނީ ތާވަލް ކޮށްފަ އެވެ.
އެންމެފަހުން މިމައްސަލާގައި، މިދިޔަ މަހުގެ 26 ވަނަ ދުވަހު ބޭއްވި އަޑުއެހުމުގައި ރައީސް ޔާމީން ވިދާޅުވެފައިވަނީ އެމަނިކުފާނުގެ ގާނޫނީ ވަކީލުންނާ ސީދާ ބައްދަލުކޮށް، މަޝްވަރާކުރުމަށް އެކަށީގެންވާ ފުރުސަތު މިހާތަނަށް މޯލްޑިވްސް ކަރެކްޝަނަލް ސަރވިސްއިން ހަމަޖައްސާ ދެއްވާފައި ނުވާކަމަށެވެ. އެމަނިކުފާނު ވިދާޅުވީ، މިދައުވާއާ ގުޅިގެން، ގިނަ ލިޔެކިޔުންތަކެއްގެ އިތުރުން އިލެކްޓްރޯނިކް ވަސީލަތްތައް އެބަހުރި ކަމަށެވެ. އެގޮތުން ސީޑީ ފަދަ ތަކެތި ބެލުމަށް ކަރެކްޝަނަލް ސަރވިސްއިން ފޯރުކޮށްދިން ލެޓް ޓޮޕް ބަގު ކޮށްފައިވާ ކަމަށް ބެލެވޭތީ، ސީޑީތައް ބެލުމުގެ ފުރުސަތު ރައީސް ޔާމީނާއެކު އެމަނިކުފާނުގެ ގާނޫނީ ވަކީލުންނަށް ލިބިލައްވާފައި ނުވާކަމަށްވެސް ވިދާޅުވި އެވެ. އަދި ގިނަ ލިޔެކިޔުންތަކެއް މަދުކަންވެސް ރައީސް ޔާމީނާއި އެމަނިކުފާނުގެ ގާނޫނީ ވަކީލުން ވިދާޅުވެފައި ވެއެވެ.
ދައުލަތުގެ ގާނޫނީ ވަކީލު ވިދާޅުވީ، އިލެކްޓްރޯނިކް ވަސީލަތްތައް ބެލުމުގައި ދަތިތަކެއް ހުރިކަން ރައީސް ޔާމީންގެ ފަރާތުން ޕްރޮސެކިއުޓަރ ޖެނެރަލް (ޕީޖީ)ގެ އޮފީހަށް އަންގާފައިނުވާއިރު، ލިޔެކިޔުންތައް މަދުކަންވެސް އަންގާފައި ނުވާކަމަށެވެ. އަދި އަޑުއެހުން އޮންނަ ދުވަހު، އަޑުއެހުމުގައި އެވާހަކަތައް ހިއްސާކުރުމަކީ އެންމެ ޒިންމާދާރު ގޮތެއް ނޫން ކަމަށާއި، މަދުވާ ލިޔެކިޔުންތައް ވިދާޅުވުުން އެލިޔެކިޔުންތައް ފޯރުކޮށްދެވޭނެ ކަމަށާއި އަދި ސީޑީ ބެލޭނެ ގޮތެއް ނެތްކަން ޕީޖީއަށް ހިއްސާކުރިނަމަ، ކަރެކްޝަނާ ވާހަކަ ދައްކައިގެން އެކަންވެސް ހަމަޖެހިގެންދާނެ ކަމަށްވެސް ޕީޖީގެ ގާނޫނީ ވަކީލު ވިދާޅުވެފައި ވެއެވެ.
އެހެންކަމުން ރައީސް ޔާމީންގެ މިމައްސަލާގައި އަދިވެސް ކުރިއަށް ދަނީ ލިޔެކިޔުންތަކާއި އިޖުރާއީ ގޮތުން ލިބިދޭންޖެހޭ ހައްގުތަށް ކަށަވަރު ކުރުުގެ މަރުހަލާ އެވެ. ރައީސް ޔާމީންގެ މައްޗަށް އުފުލާފައިވާ ދައުވާ އިއްވައި، ދައުވާއަށް ޖަވާބުދާރީ ވުމާހަމައަށް އަޑުއެހުންތައް ކުރިއަށް ގެންދެވިފައި ނުވެއެވެ.
މި މައްސަލައިގައި ރައީސް ޔާމީންއާއެކު މަނީ ލޯންޑަރ ކުރުމުގައި އުޅުއްވި ކަމުގެ ތުހުމަތުގައި އިތުރު ފަރާތްތަކެއްގެ މައްޗަށްވެސް ދައުވާކޮށްފައިވެއެވެ. އޭގެ ތެރޭގައި އެ މަނިކުފާނުގެ އަރިސް ބޭފުޅެއް ކަމުގައިވާ ވިޔަފާރިވެރިޔާ އަދި މީދޫ ދާއިރާގެ މެމްބަރު އަހުމަދު ސިޔާމްގެ ހިއްސާ އޮންނަ ދެ ކުންފުންޏަކާއި، މއ. ކުރިކީލަހިޔާ، އަހުމަދު ކްރިކް ރިޒާ ހިމެނެއެވެ.
މި ދައުވާގައި ބުނެފައިވަނީ ރ. ފުއްގިރި ދޫކުރުމުގެ މުއާމަލާތާ ގުޅިގެން ރައީސް ޔާމީން ރިޝްވަތުގެ ފައިސާގެ ގޮތުގައި ހޯއްދެވި، 1،117،000 (އެއްމިލިއަން އެއްލައްކަ ސަތާރަހާސް) ޑޮލަރު ކްރިކް ރިޒާ މެދުވެރިކޮށް އަދި ސަން ކޮންސްޓްރަކްޝަން އެންޑް އިންޖިނިއަރިންގ ޕްރައިވެޓް ލިމިޓެޑާއި، ސަން އިންވެސްޓްމަންޓް ޕްރައިވެޓް ލިމިޓެޑް ބޭނުންކޮށްގެން އެ ފައިސާ މަލޯންޑަރ ކުރުމަށްޓަކައި ފަށަލަކޮށްފައިވާ ކަމަށެވެ.
މި މައްސަލައިގައި ރައީސް ޔާމީންގެ މައްޗަށް އުފުލާފައިވާ ދައުވާގެ ކުށަކީ ޖިނާޔަތުގެ 3 ވަނަ ޖަރަޖައިގެ ކުށެކެވެ. މި ކުށް ސާބިތު ވެއްޖެނަމަ ޖަލަށް ހުކުމް ކުރެވޭނެ އެންމެ ކުރު މުއްދަތަކީ 4 އަހަރެވެ. އެންމެ ދިގު މުއްދަތަކީ 8 އަހަރެވެ.
މި މައްސަލައިގައި ރައީސް ޔާމީންގެ މައްޗަށް އުފުލާފައިވާ ދެވަނަ ދައުވާއަކީ، މަނީ ލޯންޑަރިންގ އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ 53 ވަނަ މާއްދާގެ (ހ)އާއި އެގާނޫނުގެ 5 ވަނަ މާއްދާގެ (ހ) ގެ (3) ވަނަ ނަމްބަރާ ހަވާލާދީ، އެ ގާނޫނުގެ 53 ވަނަ މާއްދާގެ (ށ) ގެ ދަށުން މަނީ ލޯންޑަރިންގގެ ކުށުގެ ދައުވާއެވެ.
މި ދައުވާ ސާބިތު ވެއްޖެނަމަ، 100،000ރ. އާއި 1،000،000ރ. އާ ދެމެދުގެ އަދަދަކުން ޖޫރިމަނާކުރުމާއެކު، 5 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުން، ނުވަތަ ކުށުގެ އަމަލު ހިންގުމުގައި ބޭނުންކުރި ފައިސާގެ އަދަދު (ލޯންޑަރކުރި ފައިސާގެ އަދަދު) ގެ 5 ގުނައަށްވުރެ އިތުރުނުވާ އަދަދަކުން ޖޫރިމަނާކުރުމާއެކު 5 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ. އެހެންކަމުން މި ދައުވާއާ ގުޅިގެން ޖުރިމަނާ ކުރެވޭނެ އެންމެ މަތީ އަދަދަކީ 5،585،000 ޑޮލަރެވެ.
