ބުރެވި ތޫފާނުގެ އަސަރު ސްރީލަންކާގެ 12000 ށް ވުރެ ގިނަ މީހުންނަށް ކޮށްފައިވާ ކަމަށް އެގައުމުގެ މީޑީއާތަކުން ބުނެފި އެވެ.
ރިޕޯޓްތައް ބުނާގޮތުން އެގައުމުގެ ހަ ޑިސްޓްރިކްޓަކުން 3575 އާއިލާއެއްގެ 12،252 އެއްހާ މީހުންނަށް ތޫފާނުގެ އަސަރު ވަނީ ކޮށްފައެވެ.
ލަންކާގެ ޑިޒާސްޓަރ މެނޭޖްމަންޓް ސެންޓަރުން މައުލޫމާތުދޭ ގޮތުގައި 2911 އާއިލާއެއްގެ 10،336 މީހަކަށް ބުރާސްފަތި ދުވަހުގެ މެންދުރު ވަގުތީ ބޯހިޔާވަހިކަން ފޯރުކޮށްދީފައިވާ ކަަމަށެވެ.
އެންމެ ބޮޑަށް ތޫފާނުގެ އަސަރުކޮށްފައިވާ ޖެފްނާ ޑިސްޓްރިކްޓުން ބުދަ ދުވަހުގެ ރެއިން ފެށިގެން އެކަކު ގެއްލި ހަތަރު މީހަކަށް ވަނީ ބޮޑެތި އަނިޔާތަކެއް ލިބިފައެވެ.
ބޭ އޮފް ބެންގޯލްގައި އުފެދި ހުޅަނގަށް ދަތުރުކުރަމުންދާ ބުރެވި ތޫފާން ސްރީލަންކާއަށް އަރާފައިވަނީ ރޭ 8:30 ހާއިރު އެވެ.
