މަސްވެރިންނަށް ދިމާވާ ދަތިތައް ހައްލުކޮށްދިނުމަށް ގޮވާލާ ހުށަހެޅި ޤަރާރު ދިރާސާކުރުމަށް ކޮމިޓީއަށް
މިގަރާރު ދިރާސާކުރުމަށް ފޮނުވާފައިވަނީ އިގްތިޞާދީ ކޮމިޓީއަށް
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
މަސްވެރިން ބާނާ މަސް ނުކިރުމާއި ފައިސާ ނުލިބުމާއި މަސްވެރިންނަށް ކުރިމަތިވާ ދަތިތައް ހައްލުކޮށްދިނުމަށް ގޮވާލާ ހުށަހެޅި ގަރާރު ދިރާސާކުރުމަށް އިގްތިޞާދީ ކޮމިޓީއަށް ފޮނުވައިފި އެވެ.
މިގަރާރު ބަލައިގަތުމަށް ނެގުނު ވޯޓުގައި ބައިވެރިވެވަޑައިގެންނެވި 60 މެމްބަރުންގެ އިއްތިފާގުންވަނީ ގަރާރު ބަލައިގަތުމަށް ފެންނަކަމަށް ފާސްވެފައެވެ. މިގަރާރު މަޖިލީހަށް ހުށަހަޅުއްވާފައިވަނީ މަޑުއްވަރީ ދާއިރާގެ ޕީއެންސީ މެމްބަރ އާދަމް ޝަރީފެވެ.
މި ގަރާރު ހުށަހަޅުއްވަމުން އާދަމް ޝަރީފް ވިދާޅުވީ މިއީ މަސްވެރިން ބާނާ މަސް ކިރުމަށްޓަކައި ކިޔުގައި ޖެހިގެން ގިނަ ދުވަސްތަކެއް ވަންދެން މަޑުކުރަންޖެހުމާއި އެކަމާއި ގުޅިގެން ބޭކާރު ގިނަގުނަ ޚަރަދުތަކެއް ހިނގައި ތަކުލީފުތަކެއް އުފުލަންޖެހުމާއި އަދި ކިރިޔާ މަހަށް ފައިސާ ލިބުން ލަސްވުމާއި ކަޅުބިލަ މަހާއި ކަންނެލީގެ އަގު ދަށްވުމުގެ ސަބަބުން މަސްވެރިންނާއި އޮޑިވެރިންނަށް ކުރިމަތިވާ ދަތިތައް ހައްލުކޮށްދިނުމަށް އެދި ސަރުކާރުގެ ކަމާބެހޭ މުއައްސަސާތަކަށް ގޮވާލާ ހުށަހަޅާ ގަރާރެއް ކަމަށެވެ.
މަސްވެރިން ބާނާ މަސް ނުކިރި އެތައް ދުވަހެއް ކިޔުގައި މަސްކިރޭނެ ދުވަހެއްގެ އިންތިޒާރުގައި ރަށުން ބޭރުގައި ތިންބެޖެހޭ ކަމަށާއި އަދި އެތައް ދުވަހެއް ކަނޑުމަތީގައި ހޭދަކޮށްގެން ބޮޑު ޚަރަދުކޮށްގެން ބާނާ މަސް ނުކިރި މަހަށް ނުފުރި ގިނަ ދުވަސްތަކެއް ވަންދެން ތިބެންޖެހޭކަމަށް އާދަމް ޝަރީފް ވިދާޅުވިއެވެ. އަދި މިމައްސަލަތަކަށް ހައްލު ހޯދައިދިނުމާއި މަސްވެރިން ބާނާ މަސް އަވަހަށް ކިރޭނެ ގޮތާއި ކިރޭ މަސްކޮޅަށް ވަގުތުން ފައިސާ ލިބޭނެ އިންތިޒާމު ހަމަޖައްސައިދިނުމާއި މަސްވެރި އާއިލާތަކަށް ދިމާވާ ދަތިތައް ހައްލުކުރެވޭނެ ނިޒާމެއް ގާއިމުކޮށްދިނުމަށް ސަރުކާރުގެ ކަމާބެހޭ މުއައްސަސާތަކަށް އިލްތިމާސްކުރުމަށް މިގަރާރު ހުށަހަޅުއްވާކަމަށް އާދަމް ޝަރީފް ވިދާޅުވިއެވެ.
