ރައުދާގެ މަރުގެ މިނިވަން ތަހުގީގެއް ކުރުމަށް ގޮވާލާ ޕެޓިޝަނެއް ހުޅުވައިފި

ބަންގަލްދޭޝްގައި ކިޔަވަމުން ދިޔަ ދިވެހި މޮޑެލް، ރައުދާ އާތިފް އަމިއްލައަށް މަރުވީކަމަށް އޮޓޮޕްސީ ރިޕޯޓުން ދެއްކި ނަމަވެސް، އޭނާގެ އާއިލާ، އެކުވެރިން އަދި އާންމުންގެ ގިނަ ފަރާތްތަކެއް ދަނީ އެކަމާ ސުވާލު އުފައްދަމުންނެވެ.

އެގޮތުން، ރައުދާގެ މަރުގެ ފުރިހަމަ ތަހްގީގަކަށް ގޮވަލާ ޗޭންޖް.އޯގްގައި ވަނީ ޕެޓިޝަނެއް ހުޅުވާފައެވެ.

Caption

މި ޕެޓިޝަނުގައި ބުނާ ގޮތުން، "ރައުދާ އާތިފްގެ މަރު ސުއިސައިޑެއް ކަމަށް ދެއްކުމަށް ބަންގްލަދޭޝް ފުލުހުންނާއި އޭނާ ކިޔަވަމުން ދިޔަ ކޮލެޖްގެ ސްޓާފުން ދަނީ މަސައްކަތް ކުރަމުން"ނެވެ. އަދި މިކަމާ ގުޅިގެން ބައިނަލްއަގްވާމީ ދުނިޔޭގައި ބަންގްލަދޭޝްގެ ނަމަށް އަައިސްދާނެ ގެއްލުމަކަށް ޖާގަ ނުދިނުމަށް ބަންގްލަދޭޝްގެ ސެންޓްރަލް އިންވެސްޓިގޭޓިވް ޑިޕާޓްމަންޓުން މަރުގެ ތަހްގީގު ކުރަންޖެހޭ ކަމަށް ޕެޓިޝަނުގައި ގޮވާލާފައިވެއެވެ. އަދި މިނިވަން ތަހުގީގެއް ކުރުމަށް ވެސް ޕެޓިޝަނުގައި ބުނެފައި ވެއެވެ.

ޕެޓިޝަން ހުޅުވުމުގައި މައުލޫމާތު ނަގާފައި ވަނީ މަރާ ގުޅިގެން އަމިއްލަ ފަރާތަކުން ތައްޔާރުކޮށްފައިވާ، ފޭސްބުކް އެނެލިސިސްއެއްގެ މައްޗަށް ބިނާކޮށްފައެވެ.

ޖަރުމަނު ރައްޔިތެއް ހޯމަ ދުވަހު ފަށާފައިވާ މި ޕެޓިޝަންގައި މިހާތަނަށް 4،000 އަށް ވުރެ ގިނަ މީހުން ވަނީ ސޮއިކޮށްފައެވެ.

ރައުދާ އަމިއްލައަށް މަރުވެފައިވާ ކަމަށް އޮޓޮޕްސީ ރިޕޯޓުން ބުނި ނަމަވެސް، ރައުދާގެ އާއިލާ އާއި ގާތް ފަރާތްތަކުން ދަނީ އޭނާ އަމިއްލައަށް މަރު ނުވާނެ ކަމަށް ބުނަމުންނެވެ.