ގާސިމް ދޫކޮށްލަން ގޮވާލާ ހަރުކުރި ބޮޑު ޕޯސްޓަރު ނަގަން އަންގައިފި

ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމް ދޫކޮށްލުމަށް ގޮވާލާ ވިލާ ހައުސްގައި ހަރުކޮށްފައިހުރި ބޮޑު ޕޯސްޓަރު ނެގުމަށް ސަރުކާރުން އަންގައިފި އެވެ.

މިދިޔަ ބުރާސްފަތި ދުވަހުގެ ރޭ ދަންވަރު ކުއްލި ގޮތަކަށް ގާސިމް ހައްޔަރުކޮށް، ޖެހިގެން އައި ހުކުރު ދުވަހު ގާސިމްގެ ބަންދަށް 15 ދުވަސް ޖެހުމާ ގުޅިގެން ގާސިމްގެ އަމިއްލަ އިމާރާތެއް ކަމަށްވާ ވިލާ ހައުސް ބޭރު ފާރުގައި ގާސިމް ދޫކޮށްލުމަށް ގޮވާލާ ގާސިމްގެ މުވައްޒުން ވަނީ ބޮޑު ޕޯސްޓަރެއް ހަރުކޮށްފަ އެވެ.

އެނގިފައިވާ ގޮތުގައި އެ ޕޯސްޓަރު ނެގުމަށް އަންގާފައި ވަނީ ފޯނު މެދުވެރިކޮށް ހައުސިންގ މިނިސްޓްރީގެ ބޭފުޅެކެވެ. ނަމަވެސް ލިޔުމުން އަންގާފައި ނުވާ ކަމަށް ވިލާ ގްރޫޕުން ބުނެއެވެ.

"ރާއްޖެއެމްވީ"އަށް މައުލޫމާތު ދެއްވަމުން ދިއްދޫ ދާއިރާގެ ކުރީގެ މެމްބަރު އަދި ޖުމްހޫރީ ޕާޓީގެ ސެކެރެޓަރީ ޖެނެރަލް އަހުމަދު ސަމީރު ވިދާޅުވީ އެ ޕޯސްޓަރު ނެގުމަށް ފުލުހުން މަސައްކަތް ކުރަމުންދާކަން އެނގިފައިވާ ކަމަށެވެ.

މާލޭގައި ބޭނާ އާއި އިސްތިހާރު ބޯޑުފަދަ ތަކެތި ހަރުކުރެވޭނީ ހައުސިން މިނިސްޓްރީގެ ހުއްދައާއެކު ކަމަށް އެމިނިސްޓްރީން ކުރިން ނެރެފައިވާ ގަވައިދެއްގައި ވެއެވެ. ނަމަވެސް ސަރުކާރު ނިސްބަތްވާ ޕޯސްޓަރުތައް މާލޭ އެކި ސަރަހައްދުތަކުގައި ހަރުކޮށްފައިވާއިރު، ސިޔާސީ އިދިކޮޅު ފަރާތްތަކަށް އެފުސަތު ލިބެމުންނުދާކަން އިދިކޮޅު ލީޑަރުން ވަނީ ތަކުރާރުކޮށް ވިދާޅުވެއެވެ.

މީގެ އިތުރުން ސިޔާސީ ހަރަކާތް ހިންގުމަށް އިދިކޮޅު ފަރާތްތަކަށް ފުރުސަތު ނުދީ ސަރުކާރުން ޖެއްސުން ކުރަމުންދާ ކަމަށް ވެސް އިދިކޮޅު ލީޑަރުން ގެންދަވަނީ ވިދާޅުވަމުންނެވެ.

ޖުމްހޫރީ ޕާޓީގެ ލީޑަރު ގާސިމް ހައްޔަރު ކޮށްފައިވާއިރު، މިއީ މިމަހުގެ ތެރޭގައި ގާސިމް ހައްޔަރުކުރި ދެވަނަ ފަހަރެވެ. އަދި ގާސިމް ހައްޔަރު ކުރުމާއެކު ސިޔާސީ އިދިކޮޅު ހުރިހާ ލީޑަރުން ތިއްބެވީ ޖަލު ހުކުމެއްގަ ނުވަތަ ޖަލުގަ އެވެ.

އެމްޑީޕީގެ ލީޑަރު މުހައްމަދު ނަޝީދުގެ މައްޗަށް 13 އަހަރުގެ ޖަލު ހުކުމެއް އިއްވާ ޖަލަށްލާފައިވާއިރު، އަދާލަތު ޕާޓީގެ ރައީސް ޝެއިހް އިމްރާންގެ މަށްޗަށް 12 އަހަރުގެ ޖަލު ހުކުމެއް ވަނީ އިއްވާފަ އެވެ. މީގެ އިތުރުން ކުރީގެ ޑީފެންސް މިނިސްޓަރު މުހައްމަދު ނާޒިމް 11 އަހަރަށް ޖަލަށް ލާފައިވާއިރު، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފްގެ މައްޗަށް ވެސް އަހަރަކަށް ވުރެ ގިނަ ދުވަހުގެ މުއްދަތަކަށް ޖަލަށްލުމަށް ވަނީ ހުކުމް ކޮށްފަ އެވެ.