އައްޑޫ ފްލައިން ސްކޫލުގެ ދަރިވަރުންނަށް ބޭއިންސާފުން އަމަލުކުރާތީ ކަންބޮޑުވޭ: ނަހުލާ
ފްލައިންގ ސްކޫލްގައި ކިޔަވަމުންދާ ކުދިންނާއި މެދު ބޭއިންސާފުން އަމަލު ކުރެވެމުންދާތީ އެކަން ކުށްވެރި ކުރަން
އައްޑޫ ފްލައިންގ ސްކޫލް
އައްޑޫ ފްލައިންގ ސްކޫލުގެ ދަރިވަރުންގެ ކަންތައްތައް ހައްލު ކުރުމަށް މަސައްކަތް ކުރެވެމުންދާ ވަގުތެއްގައި ކިޔަވާ ކުދިންނާއި މެދު ބޭއިންސާފުން އަމަލު ކުރެވެމުންދާތީ އެކަމަށް އިހުމާލު ވެފައިވާ ފަރާތްތަކާއިމެދު އަޅަންޖެހޭ ފިޔަވަޅު އަޅާނެ ކަމުގެ އިންޒާރު ޓްރާންސްޕޯޓު މިނިސްޓަރު އައިޝަތު ނަހުލާ ދެއްވައިފިއެވެ.
އައްޑޫ ސިޓީ ގަމުގައި ހިންގަމުން އަންނަ އޭޝިއަން އެކަޑަމީ އޮފް އެރޮނޮޓިކްސް (އޭއޭއޭ) އަކީ ހަޔާ އެޑިއުކޭޝަން މިނިސްޓްރީގައި ރަޖިސްޓްރީކޮށް، ސިވިލް އޭވިއޭޝަން އޮތޯރިޓީގެ ދަށުން އޮޕަރޭޝަންސް ރެގިއުލޭތް ކުރާ އެކަޑަމީއެކެވެ.
ފްލައިން ސްކޫލުގައި ދިމާވެފައިވާ ގިނަ މައްސަލަތައް ހައްލު ނުވެ ދިގުލައިގެން ގޮސް، އެންމެ ފަހުން އެތަނުގައި ކިޔަވަމުންދާ ދަރިވަރުން ވަކިކުރާ މައްސަލަވެސް އޮތީ ހޫނުވެފައެވެ. އަދި އެ އެތަނުގައި ކިޔަވަމުން އަންނަ ދަރިވަރުންގެ ކިޔެވުން ނުނިމި ދިގުލައިގެން ދާ މައްސަލަވެސް ވަނީ ފެންމަތިވެފައެވެ.
މިކަމާ ގުޅިގެން އާދިއްތަ ދުވަހު މިނިސްޓަރު ނަހުލާ ކުރެއްވި ޓްވީޓެއްގައި ބުނެފައި ވަނީ، އައްޑޫގައި ގާއިމް ކޮށްފައިވާ ފްލައިންގ ސްކޫލްގައި ކިޔަވަމުންދާ ކުދިންނާއި މެދު ބޭއިންސާފުން އަމަލު ކުރެވެމުންދާތީ އެކަން ކުށްވެރި ކުރާ ކަމަށެވެ. އަދި ކަންތައްތައް ހައްލު ކުރުމަށް މަސައްކަތް ކުރެވެމުންދާ ވަގުތެއްގައި ކިޔަވާ ކުދިންނާއިމެދު ބޭއިންސާފުން އަމަލު ކުރެވެމުންދާތީ އެކަމަށް އިހުމާލު ވެފައިވާ ފަރާތްތަކާއިމެދު އަޅަންޖެހޭ ފިޔަވަޅު އަޅާނެ ކަމަށް ވެސް މިނިސްޓަރު ވަކިވަކިން ކުރެއްވި ޓްވީޓުގައި ބުނެފައިވެއެވެ.
އައްޑޫ ފްލައިންގ ސްކޫލުގައި ތަމްރީނު ހޯދަމުންދާ ދަރިވަރުންގެ ކަންބޮޑުވުންތަކަށް އެކި ގޮތްގޮތުން ހައްލު ހޯދައިދެވޭތޯ ކުރަމުންދާ މަސައްކަތުގެ ދަށުން ޓްރާންސްޕޯޓް މިނިސްޓްރީން ވަނީ ކަމާއި ގުޅުން ހުރި ފަރާތްތަކާއި އެކު ފާއިތުވި އޮކްޓޫބަރު މަހުގެ 14 ވަނަ ދުވަހު މަޝްވަރާކޮށްފައެވެ.
އެދުވަހު ބޭއްވި މިބައްދަލުވުމުގައި ޓްރާންސް ޕޯޓު މިނިސްޓްރީއާއި ސިވިލް އޭވިއޭޝަން އޮތޯރިޓީއާއި އޭޝިއަން އެކަޑަމީ އޮފް އެރޮނޮޓިކްސް (އޭއޭއޭ) ގެ މެނޭޖްމަންޓުގެ އިސްވެރިން ބައިވެރިވެފައިވެއެވެ. މި ބައްދަލުވުމުގައި އެ ސްކޫލްގެ މެނޭޖްމަންޓުން ވަނީ ދެ ފުށް ފެންނަ ގޮތަށް ދަރިވަރުންގެ ޝެޑިއުލްތައް ހެދުމަށްފަހު ސިވިލް އޭވިއާޝަނާއި ހިއްސާކުރަން އެއްބަސްވެފައެވެ.
އޭގެ އިތުރުން، ކުރިން ދަރިވަރުން ފްލައިންއަށް ހޭދަކުރާ 3 ދުވަހުގެ ބަދަލުގައި މިހާރު ފަސް ދުވަހަށް ޝެޑިއުލްކުރާ ކަމަށާއި އަލަށް ކުދިން ނަގާނީ އެތަނުގެ އޮނިގަނޑު ހަމައަކަށް އެޅުވުމަށްފަހުގައި ކަމަށްވަނީ ބުނެފައެވެ. އެގޮތުން ކޮންމެ 6 ދަރިވަރަކަށް އިންސްޓްރަކްޓަރެއް ހުންނަން ޖެހޭނެ ކަމަށް ޤަވާއިދުގައި ބުނާއިރު މިހާރު އެތަނުގައި އިންތިހާއަށް ކުދިން ގިނަ ކަމަށް ވަނީ މައުލޫމާތުލިބިފައެވެ.
ބައެއް ދަރިވަރުންނަކީ ކޯސް ދިގުލައިގެން ގޮސް 4 އަހަރު ނުވަތަ 3 އަހަރު ވެފައިވާ ކުދިން ކަމަށާއި "ޗެކް ރައިޑް" އަޅަން ފްލައިޓެއް ނެތި ގިނަ ދުވަސް އެކަމަށްވެސް ހޭދަ ކުރަން ޖެހިފައިވާ ކަމަށް ދަރިވަރުން ފާޅުކޮށްފައިވާ ކަންބޮޑުވުމާއި ގުޅިގެން އައްޑޫ ފްލައިންގ ސްކޫލްއިން ބުނެފައިވަނީ މިމައްސަލަ ހައްލުކުރުމަށް އެއަރ ކްރާފްޓް ހަމަޖައްސައިދޭނެ ކަމަށެވެ.
ދަރިވަރުންގެ ކަންބޮޑުވުންތަކާއިއެކު ހަޅުތާލުކުރުމަށް ނިންމާފައިވާތީ، ހަޔަރ އެޑިއުކޭޝަން ޑރ. އިބްރާހިމް ހަސަންއާ އެކު ބޭއްވި ބައްދަލުވުމުގައި މިނިސްޓަރ ވިދާޅުވެފައިވަނީ ރާއްޖޭގައި ކިޔެވުމަށް ދޫކުރާ ލޯނުގައި އެ ސްކޫލްގައި ކިޔަވަމުންދިޔަ ދަރިވަރުން ރާއްޖޭއިން ބޭރުގައި ކިޔެވުމަށް ހުއްދަ ދީފައި ވާނެ ކަމަށެވެ.
އައްޑޫ ފްލައިންގ ސްކޫލްގައި ކޯސް ނިންމުމަށް ތާވަލުކޮށްފައިވާ މުއްދަތުގައި ފަހުގެ ތާރީހެއްގައި ނިންމި ދަރިވަރެއް ނެތެވެ. އަދި ގިނަ ދަރިވަރުންނަކީ މިހާރު އިމްތިހާނު ނިންމާފައިވާ ދަރިވަރުން ކަމަށްވާއިރު ނަތީޖާ ނުލިބި ގިނަ ދުވަސްތަކެއް ވަމުން އަންނަ ކަމަށް ދަރިވަރުން ވަނީ ފާހަގަކޮށްފައެވެ.
