އިންޑިއާގެ ސެރަމް އިންސްޓިޓިއުޓުން ކޮވިޑް ވެކްސިންގެ އިމަރޖެންސީ ޔޫސްއަށް އެދެނީ

އިންޑިއާގެ ސެރަމް އިންސްޓިޓިއުޓް އިން އުފައްދަމުން އަންނަ ކޮވިޑް-19 ވެކްސިންގެ އެމަޖެންސީ ޔޫސްއަށް ކުރިއަށް އޮތް ދެ ހަފްތާގެ ތެރޭގައި އެދެން ނިންމާފައިވާ ކަމަށް އެކުންފުނިން ހާމަކޮށްފި އެވެ.

ސެރަމް އިންސްޓިޓިއުޓްގެ ޗީފް އެގްޒެކިއުޓިވް، އަދަރް ޕޫނެވެއްލާ ވަނީ އެކުންފުނިން ތައްޔާރުކުރަމުން އަންނަ ވެކްސިން، ކޮވިޝީލްޑް އަކީ ކޮވިޑް-19 އަށް ރައްކާތެރިކަންދޭނެ ކަމުގެ ޔަގީންކަން އޮތް ވެކްސިނެއްކަން ފާހަގަކޮށްފަ އެވެ.

އެގޮތުން ސެރަމް އިން ތައްޔާރުކުރާ ވެކްސިނަކީ އެސްޓްރަޒެނެކާ އާއި އޮކްސްފޯޑް ޔުނިވާސިޓީ ގުޅިގެން ތައްޔާރުކުރާ ވެކްސިންކަމުން، މި ވެކްސިނަކީ 70 އިންސައްތަ ރައްކާތެރި ވެކްސިނެއްކަން މިހާރު ހަދާފައިވާ ޓެސްޓްތަކުން ދައްކާފައިވާ ކަމަށް ޕޫނެވެއްލާ ވަނީ ފާހަގަކުރައްވާފަ އެވެ.

ޕޫނެވެއްލާ ވަނީ އެސްޓްރަޒެނެކާގެ ވެކްސިނަށް ހުއްދަ ލިބުމާއިއެކު އެވެކްސިން އިންޑިއާގައި ދޭން ފެށުމަށް ހާއްސަ އިސްކަމެއް ދޭނެކަމަށް ފާހަގަކޮށްފައެވެ. އޭގެ ފަހުން އެކުންފުނިން އިސްކަންދޭނީ ކޮވެކްސް ފެސިލިޓީގައި ހިމެނޭ އެފްރިކާގެ ގައުމުތަކަށް ފޯރުކޮށްދޭން ކަމަށާއި އިނގިރޭސިވިލާތާއި ޔޫރަޕްގެ ގައުމުތަކަށް ވެކްސިން ފޯރުކޮށްދިނުމުގެ މަސައްކަތްތައް ކުރާނީ އެސްޓްރަޒެނެކާ އަދި އޮކްސްފޯޑުން ކަމަށް ސެރަމްގެ ޗީފް އެގްޒެކިއުޓިވް ވިދާޅުވި އެވެ.

ސެރަމް އިންސްޓިޓިއުޓް މިހާރު ކޮވިޝީލްޑްގެ ކްލިނިކަލް ޓްރަޔަލްގެ ފޭސް ތިނެއްގެ މަސައްކަތްތައް އިންޑިއާގައި ކުރިއަށް ގެންދާއިރު، އެ ކުންފުންޏަކީ ދުނިޔޭގެ ވެކްސިން އުފައްދާ ކުންފުނިތަކުގެ ތެރެއިން އެންމެ ބޮޑު އެއް ކުންފުންޏެވެ.