އިންޑިއާގެ 25 މަސްވެރިން ލަންކާ ނޭވީން ހައްޔަރު ކުރުމާއެކު ޓެމިލްނާޑޫ ސަރުކާރު ރަތައް!

އިންޑިއާގެ ޓެމިލްނާޑޫގެ ފަންސަވީސް މަސްވެރިން ލަންކާގެ ނޭވީން ހައްޔަރު ކުރުމާ ގުޅިގެން ޓެމިލްނާޑޫ ސްޓޭޓްގެ ސަރުކާރުން ރުޅިގަދަ ވެއްޖެއެވެ.

ހޮނިހިރު ދުވަހު ލަންކާއިން އިންޑިއާގެ މަސްވެރިން އަތުލައިގަތީ ލަންކާގެ ކަނޑުގެ ސަރަހައްދުން މަސްވެރިކަން ކުރި ކަމަށް ބުނެއެވެ.

ޓެމިލްނާޑޫގެ ފިޝަރީޒް ޑިޕާޓްމަންޓާ ހަވާލާދީ އިންޑިއާގެ ނޫސްތަކުގައި ބުނެފައިވަނީ ފަންސަވީސް މަސްވެރިން ހިފެހެއްޓީ މަސްވެރިކަން ކުރާ ދެ އުޅަނދަކުން ކަމަށާއި، ލަންކާއިން ބުނެފައިވަނީ އިންޑިއާގެ މަސްވެރިން "އިންޓަރނޭޝަނަލް މެރިޓައިމް ބައުންޑަރީ ލައިން" ހުރަސްކޮށް ލަންކާގެ މަސްވެރިންނަށް ޚާއްސަކޮށްފައިވާ ސަރަހައްދަށް ވަދެ މަސްވެރިކަން ކޮށްފައިވާ ކަމަށެވެ.

ލަންކާ ނޭވީން އިންޑިއާގެ މަސްވެރިންތަކެއް ހައްޔަރު ކުރި މައްސަލައާ ގުޅިގެން ޓެމިލްނާޑޫގެ ޗީފް މިނިސްޓަރ ވަރަށް ބޮޑަށް ކޯފާ އިސްކުރެއްވި ކަމަށާއި، އޭނާ މިކަން ސިފަ ކުރެއްވީ މަސްވެރިން "ރަހީނު" ކުރުން ކަމުގައި އިންޑިއާގެ މީޑިއާއިން ބުނެއެވެ. އަދި މިމައްސަލަ ޗީފް މިނިސްޓަރ ވަނީ ބޮޑުވަޒީރު ނަރެންދުރަ މޯދީގެ ސަމާލު ކަމަށް ގެންނަވާފައެވެ.

އިންޑިއާގެ މަސްވެރިން ސްރީލަންކާގެ ކަނޑުގެ ސަރަހައްދުގައި ގަވައިދާ ޚިލާފަށް މަސްވެރިކަން ކުރުމުގެ މައްސަލައަކީ ދޭތެރޭން ފެންމަތިވާ މައްސަލައެކެވެ.