ފިޗުން ދިން ރޭޓިންގ ލަންކާއަށްވެސް ކަމަކު ނުދިޔަ

ކްރެޑިޓް ރޭޓިން ކުންފުނި ފިޗުން ސްރީލަންކާގެ ކްރެޑިޓް ރޭޓިންގ "ބީ" އިން "ސީސީސީ" އަށް ދަށްކުރުން ބަލައި ނުގަންނަ ކަމަށް ސްރީލަންކާގެ ފިނޭންސް މިނިސްޓްރީން ބުނެފިއެވެ.

ސީސީސީ ރޭޓިން އަކީ ދަރަނި ނުދެއްކޭ ދަރަޖަ އަށް މާލީ ހާލަތު ގޯސްވުމެވެ. ފިޗުން ސްރީލަންކާގެ ރޭޓިންގ ދަށްކުރަމުން ބުނެފައިވަނީ ސްރީލަންކާގެ ބަޖެޓުގައި އިގްތިޞާދު ޚަރުދަނާކޮށް އާމްދަނީ އިތުރުކުރާނެ ގޮތްތަކުގެ ތަފްސީލުތައް ހިމަނާފައިނުވާކަމަށެވެ.

އެގޮތުން ގައުމުގެ ފިސްކަލް ޕޮލިސީ ރަނގަޅުކޮށް އާމްދަނީ އިތުރުކުރާނެ ގޮތްތަކެއް ހިމެނިފައިވަނީ ވަކި މިންވަރަކަށްކަމަށާއި އެކަމުގެ ތަފްސީލުތަކެއް ބަޖެޓުން ނޭންގޭކަމަށް ފިޗުން ވަނީ ބުނެފައެވެ. އަދި ސަރުކާރުން ދަރަނި ކުޑަކޮށް ޑެފިސިޓް ކުޑަކުރުމަށް ރާވާފައިވާ ކަންކަމާމެދު ޔަގީންކަމެއް ނެތްކަމަށްވެސް ފިޗުގެ ރިޕޯޓުގައިވެއެވެ.

ފިޗުގެ މި ނިންމުމާއި ގުޅިގެން ސްރީލަންކާ ސަރުކާރުން ބުނެފައިވަނީ މި ރޭޓިންގ އާމެދު ކަންބޮޑުވާކަމަށެވެ. ވަކިން ޚާއްސަކޮށް އައު ސަރުކާރު އައިސް ލަންކާގެ އިގްތިޞާދު ޚަރުދަނާކުރުމަށް އަޅާނެ އައު ފިޔަވަޅުތައް އިއުލާންކޮށް އެކަން ބަޖެޓްގައި ހިމަނާފައިވާއިރު އެގޮތަށް ނިންމުމުން އެކަމާމެދު ހިތްހަމަނުޖެހޭކަމަށެވެ.

މި ރޭޓިންގ ގަބޫލުނުކުރާ ސަބަބު ބަޔާންކުރަމުން ލަންކާ ސަރުކާރުން ބުނީ، އައު ސަރުކާރުން އިގްތިޞާދު ޚަރުދަނާކޮށް އާމްދަނީ އިތުރުކުރުމަށް ގެންގުޅޭ ސިޔާސަތުތައް ފިޗުން ބަލައިގަތުމުގައި ފެއިލްވެފައިވާކަމަށެވެ. އަދި އަންނަ އަހަރުގެ ބަޖެޓް ޑެފިސިޓް ކުޑަކުުރުމަށް ބަޖެޓްގައި ހިމަނާފައިވާ މުހިންމު ކަންކަން ފިޗުން ބަލައިގަނެފައިނުވާ ކަމަށްވެސް ސަރުކާރުން ބުނެއެވެ.

ބޭރުގެ ދަރަނި ދެއްކުމުގައި ސަރުކާރުން ގެންގުޅޭ ސިޔާސަތަކީ ކުރިޔަށް ދައްކަން އޮތް ދަރަނިތައް ދައްކަން ހަމަޖެހިފައިވާ ތާރީޚުތަކުގައި ދައްކާ ނިންމުން ކަމަށް ލަންކާގެ މާލީ ވުޒާރާއިން ވަނީ ހާމަކޮށްފައެވެ. އަދި މަސައްކަތްކުރަމުން ދަނީ އިތުރު ލޯން ނުނަގާ މެދު ރާސްތާގެ ދަރަނީގެ ކަންކަން ހަމަޖެއްސުމަށް ކަމަށް ވަނީ ބުނެފައެވެ.

"ސްރީލަންކާ ސަރުކާރުން ބޭރުގެ އިންވެސްޓަރުންނަށް އަދި ވަކިން ޚާއްސަކޮށް ފާއިތުވި ދުވަސްތަކުގައި ސްރީލަންކާ ސަރުކާރަށް އިތުބާރުކޮށް ލޯން ދޫކުރަމުންދިޔަ ފަރާތްތަކަށް ޔަގީންކޮށް އަރުވަން ބޭނުންވަނީ ދަރަނިތައް ދެއްކުމަށް ކަނޑައަޅާފައިވާ މުއްދަތުގައި ދަރަނިތައް ދައްކަމުންދާނެ. މީގެކުރިންވެސް ދަރަނިތައް އެމުއްދަތުގައި ދައްކަމުން ގޮސްފައިވާނެ." ފިނޭންސް މިނިސްޓްރީގެ ބަޔާނުގައި ބުނެފައިވެއެވެ.

ސްރީލަންކާގެ އިގްތިޞާދު ކޮވިޑާއި ގުޅިގެން ދެވަނަ ކުއަރޓަރގައި ދަށަށްދިޔުމަށްފަހު ތިންވަނަ ކުއާޓަރުގައި ވަނީ ރަނގަޅުވެފައެވެ. ނަމަވެސް އެ ގައުމުގެ ކޮވިޑުގެ ހާލަތު އަނެއްކާވެސް ގޯސްވެ، އިގްތިސާދަށް މިކަމުގެ ނޭދެވޭ އަސަރުކުރުމުގެ ފުރަސަތު ބޮޑުކަމަށް އިގްތިސާދީ މާހިރުން ލަފާކުރެއެވެ.