ހަ މެޖިސްޓްރޭޓް ކޯޓަކަށް ފަނޑިޔާރުން އައްޔަންކޮށްފި
26 ނޮވެމްބަރު 2020 | ބުރާސްފަތި 14:14ފަނޑިޔާރުން ހުވާކުރައްވާފައިވަނީ ބުރާސްފަތި ދުވަހު
ފަނޑިޔާރުން މަގާމުގެ ހުވާކުރެއްވުމުގެ ރަސްމިއްޔާތުގެ ތެރެއިން
ހަ މެޖިސްޓްރޭޓް ކޯޓަކަށް އައްޔަނުކުރެވުނު ފަނޑިޔާރުން ހުވާކުރެއްވުމާއި ފަތްކޮޅު އެރުވުމުގެ ރަސްމިއްޔާތު ބާއްވައިފިއެވެ.
ބުރާސްފަތި ދުވަހު ޖުޑިޝަލް ސަރވިސް ކޮމިޝަން (ޖޭއެސްސީ) ގައި ބޭއްވި މި ރަސްމިއްޔާތުގައި ފަނޑިޔާރު ކަމަށް ބޭފުޅުން އައްޔަނުކުރެވުނީ ހދ. ކުޅުދުއްފުށި، ށ. ފުނަދޫ، ނ. މަނަދޫ، ރ. މަޑުއްވަރީ، ގދ. ތިނަދޫ އަދި ސ. ފޭދޫ މެޖިސްޓްރޭޓް ކޯޓަށެވެ.
ހދ. ކުޅުދުއްފުށި މެޖިސްޓްރޭޓް ކޯޓު
- ހދ. ކުޅުދުއްފުށި މެޖިސްޓްރޭޓް ކޯޓުގެ މެޖިސްޓްރޭޓް ކަމަށް އައްޔަނުކުރެވުނީ ހދ. ކުޅުދުއްފުށި ނޫރަންގޭ މުޙައްމަދު އިސްމާއިލްއެވެ. މުޙައްމަދު އިސްމާޢީލް ވަނީ ދިވެހިރާއްޖޭގެ ޤައުމީ ޔުނިވަރސިޓީ އިން ބެޗްލަރސް އޮފް ޝަރީޢާ އެންޑް ލޯ (އޮނަރސް) ހާޞިލްކުރައްވާފައެވެ. އޭނާ ކުރިން ހުންނެވީ ސިވިލްކޯޓުގެ ލީގަލް އޮފިސަރެއްގެ މަޤާމުގައެވެ.
ށ. ފުނަދޫ މެޖިސްޓްރޭޓް ކޯޓު
ށ. ފުނަދޫ މެޖިސްޓްރޭޓް ކޯޓްގެ މެޖިސްޓްރޭޓް ކަމަށް އައްޔަނުކުރެވުނީ ގ. ނޫމަރާވިލާ އަލްއުސްތާޛާ ޝީރީން ނާހިދާ ލަތީފްއެވެ. ޝީރީން ނާހިދާ ލަތީފް ޝަރީޢަތާއި ޤާނޫނުގެ ދާއިރާއިން ޑިޕްލޮމާ ހާސިލް ކުރައްވާފައިވަނީ މައުހަދުއް ދިރާސާތިލް އިސްލާމިއްޔާއިންނެވެ. ޝީރީން ނާހިދާ ލަތީފަށް ފަނޑިޔާރުކަމުގައި ތިން އަހަރު ދުވަހުގެ ތަޖުރިބާ ލިބިވަޑައިގެންފައިވެއެވެ.
ނ. މަނަދޫ މެޖިސްޓްރޭޓް ކޯޓު
ނ. މަނަދޫ މެޖިސްޓްރޭޓް ކޯޓުގެ މެޖިސްޓްރޭޓް ކަމަށް އައްޔަނުކުރެވުނީ، ށ. މަގޫދޫ، ހަވީރީނާޒް، އަލްއުސްތާޛު އާދަމް ސަލީމްއެވެ. އާދަމް ސަލީމް ބެޗެލަރ އޮފް ޝަރީޢާ އެންޑް ލޯ ޙާޞިލްކުދުއާވީ ކުއްލިއްޔަތުއް ދިރާސާތުލް އިސްލާމިއްޔާއިންނެވެ. އާދަމް ސަލީމް ކުރިން ހުންނެވީ ނ. މަނަދޫ މެޖިސްޓްރޭޓް ކޯޓުގެ އެސިސްޓެންޓް ލީގަލް އޮފިސަރގެ މަޤާމުގައެވެ.
ގދ. ތިނަދޫ މެޖިސްޓްރޭޓް ކޯޓު
- ގދ.ތިނަދޫ މެޖިސްޓްރޭޓް ކޯޓުގެ މެޖިސްޓްރޭޓް ކަމަށް އައްޔަނުކުރެވުނީ، ގއ. ގެމަނަފުށީ، އެތުމާގެ އަލާއުސްތާޛު އައްމަދު އާދަމްއެވެ. އަޙްމަދު އާދަމް ވަނީ ދިވެހިރާއްޖޭގެ އިސްލާމިކް ޔުނިވަރސިޓީ އިން ބެޗްލަރ އޮފް ޝަރީއާ އެންޑް ލޯ (އޮނާރސް) ހާސިލްކުރައްވާފައެވެ. އޭނާ ވަނީ ޕްރޮސެކިއުޓަރ ޖެނެރަލް އޮފީހުގެ ޕަބްލިކް ޕްރޮސިކިއުޓަރެއްގެ މަޤާމު ދެ އަހަރު އަދާކުރައްވާފައެވެ.
ރ. މަޑުއްވަރީ މެޖިސްޓްރޭޓް ކޯޓު
ރ. މަޑުއްވަރީ މެޖިސްޓްރޭޓްކޯޓް އިސް މެޖިސްޓްރޭޓް ކަމަށް އައްޔަނުކުރެވުނީ، ކޮޅުމަޑުލު މަޑިފުށި، ސިގްނަލްގެ، އަލްއުސްތާޒު އަކްރަމް ރަފީއުއެވެ. އަކްރަމް ރަފީއު ބެޗެލަރ އޮފް ޝަރީޢާ އެންޑް ލޯ ހާސިލްކުރެއްވީ ދިވެހިރާއްޖޭގެ ޤަޢުމީ ޔުނިވަރސިޓީންނެވެ. ޢަކްރަމް ރަފީޢު ކުރިން ހުންނެވީ ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް ގެ ލީގަލް ކައުންސެލްގެ މަޤާމުގައެވެ.
ސ. ފޭދޫ މެޖިސްޓްރޭޓް ކޯޓު
ސ.ފޭދޫ މެޖިސްޓްރޭޓްކޯޓުގެ އިސްމެޖިސްޓްރޭޓްކަމަށް، ސ. މަރަދޫ ފޭދޫ މެރީވިލާ، އަލްއުސްތާޛް މުޙައްމަދު ޢަފީފް ޔުނިވަރސިޓީ އޮފް މަދީނާއިން އިސްލާއިކް ލޯ އިން ބެޗެލަރސް ޑިގްރީ ޚާޞިލް ކުރައްވާފައިވާ ބޭފުޅެކެވެ. އޭނާ ކުރިން ހުންނެވީ ފެކަލްޓީ އޮފް ޝަރީޢާ އެންޑް ލޯ ހިތަދޫ ކެމްޕަސްގެ ލެކްޗަރަރއެއްގެ މަޤާމުގައެވެ.
