ސެލްޓަ ވީގޯއާ އެކު ވެފައިވަނީ އެންމެ ރަނގަޅު އެއްބަސްވުމެއް ނޫން: މައުސޫމް
24 ނޮވެމްބަރު 2020 | އަންގާރަ 18:43މި އެއްބަސްވުމުގައި ސޮއިކޮށްފައިވަނީ މިދިޔަ އަހަރު
ސެލްޓަ ވީގޯގެ ޖާޒީގައި ރާއްޖެ އިޝްތިހާރު ކޮށްފައި
ރާއްޖޭގެ ފަތުރުވެރިކަން އިޝްތިހާރު ކުރުމުގެ ގޮތުން ސްޕެނިޝް ލީގްގައި ކުޅޭ ސެލްޓަ ވީގޯގެ ޖާޒީގައި ރާއްޖެ އިޝްތިހާރު ކުރަން ހެދިފައިވަނީ އެންމެ ރަނގަޅު އެއްބަސްވުމެއް ނޫން ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖޭގެ ފަތުރުވެރިކަން އިޝްތިހާރު ކުރަން ސެލްޓައާއެކު އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ނޮވެމްބަރު މަހުގެ ކުރީކޮޅެވެ. ތިން އަހަރު ދުވަހުގެ މުއްދަތަށް ވެފައިވާ މި އެއްބަސްވުމުގެ ދަށުން އަހަރަކު 900،000 ޑޮލަރު ރާއްޖެއިން ހަރަދު ކުރާނެއެވެ.
އަހަރުން އަހަރަށް ބަދަލު ގެނެވޭގޮތަށް ހެދި މި އެއްބަސްވުމާއެކު ރާއްޖެއިން ތިން އަހަރުގެ ތެރޭގައި ސެލްޓާގެ ޖާޒީ އާއި ސްޓޭޑިއަމްގައި ރާއްޖޭ އިސްތިހާރު ކުރާނެއެވެ. އެ އެއްބަސްވުމުގައި ސޮއިކޮށްފައިވަނީ އޭރުގެ ޓޫރިޒަމް މިނިސްޓަރު އަލީ ވަހީދުއެވެ.
އެކަމާއި ގުޅުވައި ރާއްޖެޓީވީގެ ''ފަލަ ސުރުހީ'' ޕްރޮގްރާމްގައި ސުވާލު ކުރުމުން ޑރ. މައުސޫމް ވިދާޅުވީ، އެ ކްލަބާ އެކު ވެފައިވާ އެއްބަސްވުމާއެކު ކުރިޔަށް ގެންދިޔުމާއި ގުޅޭ ގޮތުން ރާއްޖެ އިޝްތިހާރުކުރާ މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ) ގެ މެނޭޖިން ޑިރެކްޓަރ މުހައްމަދު ތޮއްޔިބުއާ އެކު މަޝްވަރާތަކެއް ކުރެވެމުންދާ ކަމަށެވެ. އެއަށް ފަހު ޑރ. މައުސޫމް ވިދާޅުވީ، ކުރެވުނު މަޝްވަރާތަކުގެ އަލީގައި އެ ކްލަބާއެކު ވެފައިވަނީ އެންމެ ރަނގަޅަށް ހެދިފައިވާ އެއްބަސްވުމެއް ނޫން ކަމަށް ވިދާޅުވިއެވެ.
ޔޫރަޕްގެ ކްލަބެއްގެ ޖާޒީއެއްގެ މޭމަތީގައި ރާއްޖެ އިޝްތިހާރުކުރާނަމަ 20 މިލިއަން ޑޮލަރު ހަރަދުކުރަން ޖެހޭކަން ފާހަގަކުރައްވަމުން މައުސޫމް ވިދާޅުވީ، އެ އަދަދަކީ ފަތުރުވެރިކަން އިޝްތިހާރުކުރަން ދީފައިވާ ބަޖެޓަށް ވުރެވެސް ބޮޑު ބަޖެޓެއް ކަމަށްވާއިރު އެފަދަ ކަމެއް ކުރާއިރު އެކަން ކުރަން ޖެހޭނީ އެންމެ އެދެވިގެންވާ ގޮތަށް ކަމަށެވެ. ރާއްޖެ އިޝްތިހާރުކުރަން ދީފައިވާ ބަޖެޓަކީ 10 މިލިއަން ޑޮލަރެވެ.
މީގެ ކުރިން ހަދާފައިވާ އެއްބަސްވުންތަކުގެ އުވާލަން ޖެހުމުން ސަބަބުން ބަދަލުގައި ގިނަ އަދަދެއްގެ ފައިސާ ދޭން ޖެހޭތީވެ ސެލްޓައާ އެކު ވެފައިވާ އެއްބަސްވުމާ މެދު ވަރަށް އަވަހަށް ގޮތެއް ނިންމާނެ ކަމަށް ވިދާޅުވިއެވެ.
ރާއްޖެ އިޝްތިހާރުކުރަން ވެފައިވާ އެއްބަސްވުމަކީ އެންމެ ރަނގަޅު އެއްބަސްވުމެއް ނޫން ކަމަށް ޑރ. މައުސޫމް ވިދާޅުވެފައިވާއިރު އެއްބަސްވުމުގެ ދަށުން ސެލްޓައިން ރާއްޖޭގެ ފުޓްބޯޅަ ކުރިއެރުވުމަށްވެސް އެކި ގޮތްގޮތުން އެހީވުމަށް ވަނީ ހަމަޖެހިފައެވެ.
އެގޮތުން ރާއްޖޭގެ އެކި އުމުރު ފުރާތަކުގެ ގައުމީ ޓީމުތައް ސްޕެއިނަށް ގޮސް، އެ ކްލަބުގެ ޓްރެއިނިންގ ފެސިލިޓީތައް ބޭނުން ކުރެވޭނެ މަގު ފަހިވެގެން ދާނެ ކަމަށް ވެސް އޭރު މިނިސްޓްރީން ވަނީ ބުނެފައެވެ. އަދި ރަހުމަތްތެރިކަމުގެ މެޗުތައް ކުޅުމާއި ކޯޗުން ތަމްރީން ކުރުމާއި ސެލްޓާގެ އެކަޑަމީގައި ރާއްޖޭގެ ގައުމީ ޓީމުން ބޭނުންވާ ކުޅުންތެރިން ތިބެ ތަމްރީނުވުމުގެ ފުރުސަތުވެސް ފަހިކޮށްދޭ ގޮތަށް ވަނީ ހަމަޖެހިފައެވެ.
