އައްޑޫގައި ގާއިމުކުރެވިގެންދާ ޑްރަގް ޑީޓޮކްސިފިކޭޝަން ސެންޓަރަކީ ރާއްޖެއާ ގުޅިގެން ކުރެވޭ ތަރައްގީގެ މަސައްކަތުގައި، މުޖުތަމައުގެ ބޭނުންތަކާއި އުންމީދުތައް ފުއްދުމަށް ދެވޭ އަހަންމިއްޔަތު ރަމްޒުކޮށްދޭ ލާމަސީލު މިސާލެއް ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރް ވިދާޅުވެއްޖެއެވެ.
އިންޑިއާ ސަފީރު މިހެން ވިދާޅުވެފައިވަނީ އައްޑޫގައި ޑްރަގް ޑިޓޮކްސިފިކޭޝަން ސެންޓަރ އިމާރާތްކުރުމުގެ ކޮންޓްރެކްޓް ހަވާލުކުރުމަށް އަންގާރަ ދުވަހު ދިވެހިރާއްޖޭގެ އަޑުގައި ބޭއްވި ހާއްސަ ރަސްމިއްޔާތުގައެވެ.
އެ ރަސްމިއްޔާތުގައި ވާހަކަ ދައްކަވަމުން ސުދީރު ވިދާޅުވީ މަސްތުވާތަކެތީގެ ވަބާއަކީ ރާއްޖޭގެ ރަށްތަކުގެ މުޖުތަމައުތަކަށް ދިމާވެފައިވާ އެންމެ ބޮޑު އެއް މައްސަލަ ކަމަށާއި މަސްތުވާތަކެތީގެ ޝިކާރައަކަށް ވެފައިވާ ކުޑަކުދިންނާއި ފުރާވަރުގެ ކުދިންގެ އަދަދު އިތުރުވަމުންދާ ކަމަށެވެ.
އެގޮތުން ރާއްޖޭގައި މިހާރު ވެސް ހަތަރު ޑްރަގް ރީހެބިލިޓޭޝަން ސެންޓަރ ގާއިމުކުރެވިފައިވީ ނަމަވެސް، ޑްރަގް ޑީޓޮކްސިފިކޭޝަން އަދި ކޮމިއުނިޓީ ރީހެބިލިޓޭޝަން ސާވިސްތަކަށް ބޭނުންވެފައިވާ ފަރާތްތަކުގެ އަދަދު ގިނަ ކަމަށް ފާހަގަކުރައްވާ ހައިކޮމިޝަނަރ ވަނީ މިފަދަ އިތުރު ސެންޓަރުތައް ގާއިމް ކުރެވިގެން ދިއުމަކީ މުހިންމުކަމެއް ކަމަށް ވިދާޅުވެފައެވެ.
އިންޑިއާ ސަފީރު އިތުރަށް ވިދާޅުވީ މަސްތުވާތަކެތީގެ ޝިކާރައަކަށް ވެފައިވާ މީހުންނަށް ރީހެބިލިޓޭޝަން ހިދުމަތްތަކާއި އެމީހުންގެ އާއިލާތަކަށް އަދި މުޖުތަމައުއަށް ހިތްހަމަޖެހުން ގެނެސްދޭނެ މިފަދަ މަޝްރޫއުއެއް ހިންގުމަށް އެހީވެވޭކަމީ އިންޑިއާއިން ފަހުރުވެރިވާ ކަމެއް ކަމަށެވެ.
އިންޑިއާއިން ރާއްޖެއަށް ޑިވެލޮޕްމެންޓަލް އެސިސްޓެންސް ފޯރުކޮށްދިނުމުގައި އެންމެ ބޮޑު އިސްކަމެއް ދެނީ ރާއްޖޭގެ ލޯކަލް ކޮމިއުނިޓީތަކަށް އެންމެ އެކަށޭނެ އަދި އެންމެ ފައިދާ ކުރުވަނިވި މަޝްރޫއުތަކަށާއި، ރާއްޖޭގެ އިގްތިސާދު ވަރުގަދަވެ ކުރިއަރުމަށް މަގުފަހިކޮށްދޭނޭފަދަ ބޮޑެތި އުމްރާނީ ތަރައްގީގެ މަޝްރޫއުތަކަށް ކަމަށް ހައިކޮމިޝަނަރ ފާހަގަކުރެއްވިއެވެ.
މި މަޝްރޫއުތަކަކީ އިންޑިއާ އާއި ރާއްޖެއާ ދެމެދު އޮންނަ ގާތް ގުޅުމުގެ އެންމެ މުހިންމު އެއް ބައި ކަމަށް ފާހަގަކުރައްވާ އިންޑިއާ ސަފީރު ވަނީ ޑްރަގް ޑިޓޮކްސިފިކޭޝަން ސެންޓަރުގެ މަސައްކަތް އަވަހަށް ނިމިގެންދާނެ ކަމަށް އުންމީދުކުރައްވާ ކަމަށް ވިދާޅުވެފައެވެ.
އައްޑޫ ސިޓީ ހުޅުދޫގައި ގާއިމުކުރެވިގެންދާ ޑްރަގް ޑިޓޮކްސިފިކޭޝަން ސެންޓަރަކީ އިންޑިއާގެ ހިލޭ އެހީގެ އަށް މިލިއަން ރުފިޔާ ބޭނުންކޮށްގެން އިމާރާތްކުރެވޭ ސެންޓަރެކެވެ. މި ސެންޓަރުގައި ޑީޓޮކްސިފިކޭޝަން، ކޮމިއުނިޓީ ރީހެބިލިޓޭޝަން އަދި ރެޒިޑެންޝަލް ރީހެބިލިޓޭޝަންގެ ހިދުމަތްތައް ފޯރުކޮށްދެވޭނެއެވެ.
