ޖަޕާނުން ދޭ އެހީތަކަށް ރައީސް ނަޝީދުގެ ޝުކުރު
22 ނޮވެމްބަރު 2020 | އާދީއްތަ 22:45ޖަޕާނުން ރާއްޖެއަށްދޭ ދީލަތި އެހީތައް ފާހަގަ ކުރެއްވި
ޖަޕާނުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ކެއިކޯ ޔަނާއީ އާއި ފޮރިން މިނިސްޓަރ އަބްދުﷲ ޝާހިދު
ޖަޕާނު ސަރުކާރުން ދިވެހިރާއްޖެ އަށް ދޭ އެހީތަކަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޝުކުރުއަދާކުރައްވައިފިއެވެ.
އާދިއްތަ ދުވަހުގެ ރޭ ރައީސް ނަޝީދު ކުރެއްވި ޓްވީޓްގައި ވިދާޅުވީ، ޖަޕާނާއި ދިވެހިރާއްޖޭގެ ސަލާމަތީ ބާރުތަކާއި އޮންނަ ގާތް ގުޅުމަށާއި އަދި ޖަޕާނުގެ ރައްޔިތުންނާއި ސަރުކާރުން ރާއްޖެއަށް އަބަދުވެސް ދެއްްވާ ދީލަތި އެހީތެރިކަމަށް ޝުކުރުއަދާކުރައްވާކަމަށެވެ.
ރައީސް ނަޝީދު ޖަޕާނު ސަރުކާރަށް ޝުކުރުއަދާކުރައްވާފައި މިވަނީ ޖަޕާން ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން ދިވެހިރާއްޖޭގެ ކޯސްޓްގާޑާއި، މެރިޓައިމް ރެސްކިއު ކޯޑިނޭޝަން ސެންޓަރަށް 117 މިލިއަން ރުފިޔާގެ (7.6 މިލިއަން ޔޫއެސް ޑޮލަރު/800 މިލިއަން ޖަޕަނީޒް ޔެން) ގެ އެހީތެރިކަން ފޯރުކޮށްދިނުމާ ގުޅޭ އެކްސްޗޭންޖް އޮފް ނޯޓްސްގައި އާދިއްތަ ދުވަހު ސޮއިކޮށްފައި ވަނިކޮށެވެ.
ޖަޕާނު ސަރުކާރުގެ މި އެހީގެ ދަށުން ކޯސްޓްގާޑާއި، މެރިޓައިމް ރެސްކިއު ކޯޑިނޭޝަން ސެންޓަރުގެ އިތުރުން ސަބް ރީޖަނަލް ސެންޓަރުތަކާ ކޯސްޓްގާޑު އުޅަނދުފަހަރުގެ ޤާބިލްކަން އިތުރުކުރެވިގެންދާނެއެވެ. އެގޮތުން އެންމެ ފަހުގެ މުވާސަލާތީ އާލާތްތަކާއި، މީހުން ހޯދާ ސަލާމަތްކުރުމުގައި ބޭނުންކުރާނެ އާލަތްތަކުގެ އިތުރުން ކޯސްޓްގާޑަށް ބޭނުންވާ ޑައިވް އިކުއިޕްމަންޓް ހޯދޭނެއެވެ.
މިދިޔަ އަހަރުގެ އޮކްޓޯބަރު މަހުވެސް ޖަޕާނުން ވަނީ 21 ޕެރަމެޑިކް އެމްބިއުލާންސް ރާއްޖެއަށް ހަދިޔާކޮށްފައެވެ. 1.4 މިލިއަން އެމެރިކާ ޑޮލަރުގެ އަގުހުރި މި އެހީގެ ދަށުން ހަދިޔާކުރި އެމްބިއުލާންސް 15 އަތޮޅެއްގެ 21 ރަށަށް ވަނީ ހަދިޔާކޮށްފައެވެ.
