ސައްހަ މައުލޫމާތު ހޯއްދެވުމަށް އިންވެސްޓަރުންނަށް ޓޫރިޒަމް މިނިސްޓަރު އިލްތިމާސްކުރައްވައިފި
މައުލޫމާތު މިނިސްޓްރީން ލިބޭނެ
ރާއްޖޭގެ ރިސޯޓެއްގެ މަތިން ނަގާފައިވާ ފޮޓޯއެއް
ރާއްޖޭގައި އިންވެސްޓުކުރަން ބޭނުންވާ ފަރާތްތަކުން ސައްހަ މައުލޫމާތު ހޯދެއްވުމަށް އިންވެސްޓަރުންނަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް އިލްތިމާސްކުރައްވައިފިއެވެ.
މިނިސްޓަރު މައުސޫމް ކުރައްވާފައިވާ ޓްވީޓެއްގައި ވިދާޅުވީ، ރާއްޖޭގައި އިންވެސްޓުކުރަން ބޭނުންވާ އިންވެސްޓަރުންނަށް ހުރި ފުރުސަތުތަކުގެ މައުލޫމާތުތައި، ރާއްޖޭގެ ފަތުރުވެރިކަމުގެ އިންވެސްޓްމެންޓް ސިނާރިއޯތަކުގެ މައުލޫމާތު މިނިސްޓްރީގެ ވެބްސައިޓުންނާއި، މިނިސްޓްރީއަށް މެއިލްކޮށްގެންވެސް ލިބޭނެ ކަމަށެވެ. އަދި ޓޫރިޒަމް ދާއިރާގެ އިންވެސްޓްމެންޓުތަކާއި ގުޅޭ ދޮގު މައުލޫމާތުތަކުގެ މައްޗަށް ބަރޯސާނުވުމަށް މިނިސްޓަރ އިލްތިމާސްކުރެއްވި އެވެ.
ސައްހަ މައުލޫމާތު ހޯއްދެވުމަށް މައުސޫމް އިލްތިމާސް ކުރައްވާފައިވާއިމިވަނީ، ރާއްޖޭގައި ބައިނަލްއަގްވާމީ އެއާޕޯޓެއް ތަރައްގީކޮށް ހިންގުމަށް އިންޑިއާގެ އޮލިއަލިއާ ކިޔާ ކުންފުންޏަކަށް 50 އަހަރަށް ދޭން ނިންމާފައިވާ ކަމަށް އެ ކުންފުނީގެ ވެބްސައިޓުގައި ބުނެފައި ވަނިކޮށެވެ. އެ ވެބްސައިޓްގައި ބުނެފައިވާގޮތުން، އެއާޕޯޓް ތަރައްގީކުރަން ހަމަޖެހިފައިވަނީ ށ. ފުށިފަރު ގެ އިތުރުން ފުށިފަރު ފަޅުތެރޭގައި ހިއްކާފައިވާ ތަނެއްގައެވެ.
ފުށިފަރު ފަޅުތެރޭގައި ތަރައްގީކުރާ އެއާޕޯޓަށް ކިޔާނެ ނަމަކީ ''އޮލިއަލިޔާ އިންޓަނޭޝަނަލް އެެއާޕޯޓް'' ކަމަށްވެސް އެ ކުންފުނިން ވަނީ ބުނެފައެވެ. އެއާޕޯޓުގެ މޮޑިއުލް ހަދަނީ ޓޫރިޒަމް މިނިސްޓްރީން ކަމަށްވެސް އޮލިއަލިޔާ އިން ވަނީ ބުނެފައެވެ.
ނަމަވެސް ''ރާއްޖެ.އެމްވީ'' އަށް މައުލޫމާތު ދެއްވަމުން ޓޫރިޒަމް މިނިސްޓަރު ޑރ. މައުސޫމް ވަނީ އެ ވާހަކަތައް ދޮގުކުރައްވާފައެވެ. އަދި އެފަދަ އެގްރީމެންޓެއް ހަދާފައިނުވާނެކަމަށެވެ.
ކޮވިޑް-19 ގެ ބަލިމަޑުކަމާއި ގުޅިގެން ބޮޑެތި ހުރަސްތަކެއް ކުރިމަތިވެފައިވާ ދިވެހިރާއްޖޭގެ ފަތުރުވެރިކަމުގެ ސިނާއަތް ކޮޅަށްޖެހުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖެ އިސްތިހާރުުކުރުމުގެ ގިނަ މަސައްކަތްތަކެއްކޮށް، ރާއްޖެއަކީ "ސޭފް ޑެސްޓިނޭޝަން" އެއްގެގޮތުގައި ބޭއްވުމަށް ހަރުދަނާ އުސޫލުތަކެއް އެކުލަވާލާ އަންނަނީ ތަންފީޒްކުރަމުންނެވެ.
އޭގެއިތުރުން އިންވެސްޓްމެންޓްގެ ގިނަ ފުރުސަތުތަކެއް ހުޅުވާލަމުން އަންނައިރު، އޭގެތެރޭގައި ހއ. އުލިގަމް އަދި ހއ. ކެލާގައި ހޮޓާ ތަރައްޤީކުރުމުގެ މަސައްކަތް ހިމެނެ އެވެ. އޭގެއިތުރުން ބުރާސްފަތި ދުވަހު ހއ. ހޯރަފުށީގައި ވާހަކަދައްކަވަމުން ރައީސުލްޖުމްހޫރިއްޔާ ފާހަގަކުރެވި، ރާއްޖޭގެ އުތުރުން ފަތުރުވެރިކަމަށް ހާއްސަ ރިސޯޓުތަކެއް ތަރައްޤީކުރުމަށް، ފަތުރުވެރިކަމުގެ ދާއިރާއަށް އައު ރަށްތަކެއް ނެރުމަށް ޓޫރިޒަމް މިނިސްޓްރީން އަންނަނީ މަސައްކަތް ކުރަމުންނެވެ.
