ބޭރު ދުނިޔޭގައި ރާއްޖެ ފަތުރުވެރި މަންޒިލެއްގެ ގޮތުގައި ޕްރޮމޯޓްކޮށް އިޝްތިހާރު ކުރުމަށްޓަކައި އެއް ބިލިއަން ރުފިޔާގެ ރައުސުލްމާލަކާއެކު އިތުރު ކުންފުންޏެއް ރައީސުލް ޖުމްހޫރިއްޔާ ޢަބްދުﷲ ޔާމީން ބުރާސްފަތި ދުވަހު އުފައްދަވައިފިއެވެ
ރައީސުލް ޖުމްހޫރިއްޔާގެ ޤަރާރަކުން އުފެއްދި އާ ކުންފުންޏަށް ކިޔަނީ މޯލްޑިވްސް ޓޫއަރިޒަމް ޕްރޮމޯޝަން ބޯޑު ލިމިޓެޑެވެ.
ރައީސުލްޖުމްހޫރިއްޔާ އަބްދުﷲ ޔާމީން ސޮއިކުރައްވައި ބުރާސްފަތި ދުވަހު ނެރުއްވި ގަރާރުގައި ވިދާޅުވެފައިވަނީ އެކުންފުނި އުފެއްދެވީ ބޭރު ދުނިޔޭގައި ފަތުރުވެރިކަމުގެ މަންޒިލެއްގެ ގޮތުގައި ރާއްޖެ ޕްރޮމޯޓްކޮށް އިޝްތިހާރުކުރުމަށާއި، ދިވެހިރާއްޖޭގެ ފަތުރުވެރިކަމުގެ ސިނާޢަތުން ދިވެހި މުޖުތަމަޢަށް ކުރާ ހެޔޮ ލާބައާއި މަންފާ އިތުރަށް ފުޅާކުރުމުގެ ގޮތުން، އަދި ދިވެހިރާއްޖޭގެ ފަތުރުވެރިކަން ބާޒާރަށް ނެރެވެމުންދާ ގޮތާއި އެދާއިރާގެ ކަންތައްތައް ވަމުންދާ ދިރާސާކޮށް އިތުރަށް ހަރުދަނާ ކުރުމަށްޓަކައި ކަމަށެވެ.
ގަރާރުގައި ބުނެފައިވާ ގޮތުގައި ދިވެހި ސަރުކާރުގެ ސައްތައިން ސައްތަ ހިއްސާވާ އެކުންފުންޏަށް ހުއްދަކުރެވިފައިވާ ކެޕިޓަލަކީ ހިއްސާއެއް 10 ރުފިޔާއަށް ވާ ގޮތަށް، 100 މިލިޔަން ހިއްސާގެ މައްޗަށް ބަހާލެވިފައިވާ އެއް ބިލިޔަން ރުފިޔާ ކަމަށެވެ. މީގެ ކުރީގައި ވެސް ރާއްޖޭގެ ފަތުރުވެރިކަން ޕްރޮމޯޓުކުރުމަށް ޓުއަރިޒަމް ޕްރޮމޯޝަން ބޯޑުގެ ނަމުގައި އިދާރާއެއް އޮތެވެ. ރައީސް މައުމޫނުގެ ދުވަސްވަރު އުފައްދަވާފައިވާ އެ ބޯޑު އުވާލައި، ކުރީގެ ރައީސް މުހައްމަދު ނަޝީދުގެ ސަރުކާރުގައި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން އުފެއްދެވި އެވެ.
ރައީސް ޔާމީން ވެރިކަމަށް ވަޑައިގެންނެވިފަހުން އެކުންފުނިން ވަނީ ރާއްޖޭގައި މިހާތަނަށް ހިންގި އެންމެ ބޮޑު ޚިޔާނާތް ހިންގައިފައެވެ. އެޚިޔާނާތުގައިގެ ބައެއް މައްސަލަތަކުގައި ކުރީގެ ނައިބު ރައީސް އަހްމަދު އަދީބުގެ މައްޗަށް ހުކުމްކޮށްފައިވާއިރު، އެ ހިޔާނާތުގައި ރައީސް އަބްދުﷲ ޔާމީނާއި އެ މަނިކުފާނުގެ އަނބިކަނބަލުން ވެސް ބައިވެރިވެވަޑައިގަންނަވާ ކަމަށް ތުހްމަތުކުރެ އެވެ. އެ ތަހްގީގުތައް ހުއްޓިފައިވާއިރު، ރައީސް ޔާމީން ވިދާޅުވެފައިވަނި އެމްއެމްޕީއާރުސީގެ ހިޔާނާތް ހުއްޓެނީ އަދީބާ ހަމައިން އެކަނި ކަމަށެވެ. އެމްއެމްޕީއާރުސީގެ މައްސަލަ ފަޅައި އެރުމުގެ ކުރިން، އެކަން އޭރުގެ އޮޑިޓަ ޖެނެރަލް ނިޔާޒު އިބްރާހިމް ރައީސް ޔާމީނަށް ހިއްސާކުރެއްވި އެވެ. ނަމަވެސް އެކަމަށް ބެއްލެވުމެއް ނެތި، ނިޔާޒު މަގާމުން ވަކިކުރެއްވެވި އެވެ. ނިޔާޒުގެ އިތުރުން އަދީބުގެ ހިޔާނާތުގެ މައްސަލަތައް ސަރުކާރުގެ ކޯލިޝަންގެ އިސް ބައެއް ބޭފުޅުން ވެސް ރައީސް ޔާމީނާ ހިއްސާ ކުރެއްވިއިރު، އެ މަނިކުފާނު ގެންދެވީ ފާޅުގައި އަދީބަށް އިތުބާރު ކުރައްވާ ކަމަށް ވިދާޅުވަމުންނެވެ. އަދި ނައިބު ރައީސް ކަމަށް ވެސް އައްޔަން ކުރެއްވެވި އެވެ.
މިކުންފުނި އުފެއްދެވިއިރު ޓޫރިޒަމް ޕްރޮމޯޓް ކުރުމަށް އުފައްދާފައި މިހާރު އޮތް ކުންފުނި އެމްއެމްޕީއާރުސީ އުވާލި ކަމަކަށް ނިންމަވާފައެއް ނުވެއެވެ. އެމްއެމްޕީއާރުސީގެ ނަން ކިލަނބުކޮށް، އެ ކުންފުނިން ދިވެހި ރައްޔިތުންގެ ފައިސާ ވަގަށް ނެގުމަށް ފަހު، އާ ކުންފުންޏެއް އުފައްދި ނަމަވެސް، އެމްއެމްޕީއާރުސީން ގެއްލިގެން ދިޔަ ފައިސާ ހޯދިފައެއް ނެތެވެ. އެކަމަށް ރައީސް ޔާމީންގެ ރިޔާސީ ބަޔާނުގައި އެންމެ ލަފްޒެއް ވެސް ހާމައެއް ނުކުރެ އެވެ.
