ކުރީގެ ރައީސް ޔާމީން ވަޑައިގަތީ ފަޅުރަށްތަަކުން ލިބުނު ފައިސާކޮޅު ވެސް ހިފައިގެން: ރައީސް ޞާލިހު
ރައީސް ޔާމީންގެ ސަރުކާރުން 85 ރަށެއް ރިސޯޓު ހެދުމަށް ވިއްކާފައިވޭ
ރައީސް އިބްރާޙީމް މުހައްމަދު ޞާލިހު ހޯރަފުށީ އެއަރޕޯޓް ހުޅުވައިދެއްވުމަށް އެރަށަށް ކުރެއްވި ތާރީހީ ދަތުރުގެ ތެރެއިން
ކުރީގެ ރައީސް އަބްދުﷲ ޔާމީން، އެ މަނިކުފާނުގެ ވެރިކަން ނިންމަވާފައި ވަޑައިގަތީ ރާއްޖޭގެ ފަޅު ރަށްތައް ވިއްކާފައި ލިބުނު ފައިސާކޮޅު ވެސް ހިފައިގެން ކަމަށް ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު ވިދާޅުވެއްޖެއެވެ.
ހޯރަފުށީ އެއަރޕޯޓު ހުޅުވުމަށް ބޭއްވި ރަސްމިއްޔާތުގައި ރާއްޖޭގެ ބަޖެޓަށާއި، ލޯނުތައް ދެއްކުމަށް ސަރުކާރުން ކުރަމުންދާ މަސައްކަތްތަކަށް އަލިއަޅުއްވާލައްވާ ވާހަކަ ދައްކަވަމުން ރައީސް ޞާލިހު ވިދާޅުވީ، ރައީސް ޔާމީންގެ ސަރުކާރުން 85 ރަށެއް ރިސޯޓު ހެދުމަށް ވިއްކާފައިވާ ކަމަށާއި، ނަމަވެސް އޭގެން އެއްވެސް ރަށެއްގައި ރިސޯޓު ހެދިފައިނުވާ ކަމަށެވެ.
އެހެންކަމުން އެ ރަށްތަކުން ދައުލަތަށް ވަންނަންޖެހޭ އެއްވެސް ފައިސާއެއް ވަންނަމުން ނުދާ ކަމަށާއި އެ ފައިސާ ބަޖެޓުގައި ހުރިނަމަ މިފަދަ ދަތި ހާލަތެއްގައި ރައްޔިތުންނަށް ބޭނުންވާނެ ގިނަ ކަންތަކެއް އޭގެން ކޮށްދެވުނީސް ކަމަށެވެ.
ސަރުކާރުން ހަރުމުދާ ވިއްކާ ކަމަށް އިދިކޮޅު ފަރާތްތަކުން ކުރަމުންދާ ތުހުމަތުތަކަށް ރައްދު ދެއްވަމުން ރައީސް ޞާލިހް ވިދާޅުވީ، އަންނަ އަހަރުގެ ބަޖެޓުގައި މަޝްރޫޢުތައް ހިންގުމަށް ކަނޑައަޅާފައި ވާނީ އެކަމަށް ހޭދަކުރާނެ ފައިސާ ހަމަޖެހިފައިވާތީ ކަމަށެވެ. އަދި އެ މަނިކުފާނުގެ ފައިނޭންޝަލް ޓީމަށް ފުރިހަމަ އިތުބާރު އެބައޮތް ކަމަށާއި، އިރާދަކުރެއްވިއްޔާ ހަރުމުދާ ނުވިއްކާ މި ރާއްޖެ އަމާން އައްސޭރިއަކަށް ގެންގޮސްދޭނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ، ސަރުކާރުން ރައްޔިތުންގެ މަޖިލީހަށް ހުށައަޅާފައިވާ ބަޖެޓަކީ މިއަދުގެ ހާލަތަށް ބަލައި ހުށައެޅޭނެ އެންމެ ރަނގަޅު ބަޖެޓް ކަމަށެވެ. އެގޮތުން މި ދަތި އުނދަގޫ ވަގުތު ސަރުކާރުން ކޮށްދޭންޖެހޭ އެންމެ މުހިންމު ކަމަކީ ރައްޔިތުންނަށް އެހީތެރިކަން ފޯރުކޮށްދިނުން ކަމަށް ރައީސް ވިދާޅުވިއެވެ. އަދި ވޭތުވެދިޔަ ތަނުގައި އެކަން ވަރަށް ފުރިހަމައަށް ކޮށްފައިވާނެ ކަމަށް އެ މަނިކުފާނު ވިދާޅުވިއެވެ.
