އިންތިހާބުގައި ވާދަކުރާ ކެނޑިޑޭޓުން ނަން އަނބުރާ ނުގެންދެވުމަށް ރައީސް ނަޝީދު އިލްތިމާސްކުރައްވައިފި
80 އަށްވުރެ ގިނަ ފަރާތަކުން ނަން އަނބުރާ ގެންގޮސްފައިވޭ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ކައުންސިލް އިންތިހާބުގައި ވާދަކުރައްވާ ކެންޑިޑޭޓުން ނަން އަނބުރާ ނުގެންދެވުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އިލްތިމާސް ކުރައްވައިފިއެވެ.
އަންނަ އަހަރަށް ލަފާކޮށްފައިވާ ބަޖެޓު ފިނޭންސް މިނިސްޓްރީން މަޖިލީހަށް ހުށަހަޅައި މަޖިލީހުގައި ބަޖެޓާ ބެހޭ ގޮތުން ކުރި ބަހުސްތަކަށްފަހު މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ މާރޗް މަހުގައި އޮންނަ ކައުންސިލް އިންތިހާބުން މިހާރު ވަރަށް ގިނަ ކެނޑިޑޭޓުން ނަން އަބުރާ ގެންދަވަމުންގެންދާކަމަށެވެ. އަދި އެކަމާއިމެދު ކަންބޮޑުވެވަޑައިގަންނަވާކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު މިފަދައިން ވިދާޅުވެފައިވާއިރު ނަން އަނބުރާ ގެންދިޔަ ކެނޑިޑޭޓުންގެ ތެރޭގައި ގިނައީ އެމްޑީޕީގެ ކެންޑިޑޭޓުންނެވެ.
އިލެކްޝަންސްގެ ތަފާސްހިސާބުތަކަށް ބަލާއިރު، މިހާރުވެސް 80 އަށްވުރެ ގިނަ ފަރާތަކުން ނަން އަނބުރާ ގެންގޮސްފައިވާއިރު، އޭގެ ތެރޭގައި، ވާދަކުރާނެ އިތުރު ފަރާތެއް ނެތުމުން އޮޓަމެޓިކުން އިންތިހާބުވާ ބައެއް ކެނޑިޑޭޓުން ވެސް ނަން އަނބުރާ ގެންގޮސްފައިވެއެވެ. ކައުންސިލް އިންތިހާބުގައި މިހާރު ވާދަކުރާ ކެންޑިޑޭޓުންގެ އަދަދަކީ 2307 ކެއެވެ.
ރައީސް ނަޝީދު ވިދާޅުވީ ލާމަރުކަޒީ ގާނޫނުން ކައުންސިލްތަކަށް ލިބިދީފައިވާ ބޮޑު ބާރުން ހިންގާ ޕްރޮޖެކްޓްތަކުގެ ތެރެއިން ރާއްޖެއަށް މިހާރު ދިމާވެފައި މިއޮތް ކޮވިޑު-19 ގެ ހާލަތާއި އިގްތިސޯދީ ހީނަރުކަމުން އަރައިގަނެވޭނެ ކަމަށެވެ. އަދި ކައުންސިލް އިންތިހާބު ވީ އެންމެ އަވަހަކަށް ބޭއްވުމަށް ރައީސް ނަޝީދު ގޮވާލެއްވި އެވެ.
19 ވަނަ ރައްޔިތުންގެ މަޖިލިހުން ވަނީ ގާނޫނު އަސާސީއަށާއި، ލާމަރުކަޒީ ގާނޫނަށް ބޮޑެތި ބަދަލުތަކެއް ގެނެސްފައެވެ. އޭގެ ތެރޭގައި ކައުންސިލްތަކުގައި ދައުރު ފަސް އަހަރަށް އިތުރުކުރުމާއި، ކައުންސިލްތަކުގެ އިހުތިސާސް ހިނގާ ސަރަހައްދު ކަނޑައެޅުން ހިމެނެއެވެ. އަދި ކައުންސިލްތަކުގެ ނިންމުންތަކުގައި ރައްޔިތުންގެ ބައިވެރިވުން އިތުރުކުރަން ވެސް މާއްދާތަކެއް ހުށައަޅާފައިވެއެވެ.
