އަކްރަމް ވަކިކުރަން ކޮމިޓީން ނިންމާފައި ވަނިކޮށް އިސްތިއުފާ ދެއްވައިފި
19 ނޮވެމްބަރު 2020 | ބުރާސްފަތި 11:17އިސްތިއުފާ ދެއްވާފައިވަނީ ބުރާސްފަތި ދުވަހު
އަހުމަދު އަކްރަމް
އިލެކްޝަންސް ކޮމިޝަންގެ ނައިބް ރައީސް އަހުމަދު އަކްރަމް މަޤާމުން އިސްތިއުފާދެއްވައިފިއެވެ.
އޭނާ އިސްތިއުފާ ދެއްވާފައިވަނީ ބުރާސްފަތި ދުވަހުއެވެ.
އަކްރަމްގެ އިސްތިއުފާގެ ސިޓީ ރާއްޖެ އެމްވީއަށް ލިބިފައިވާއިރު އަކްރަމް ވަނީ މިނިވަން މުވައްސަސާތަކާއި ބެހޭ ކޮމިޓީގެ އިތުބާރެއްނެތި މެންބަރުކަމުގައި ދެމިހުންނެވުމަކީ އެންމެ ރަނގަޅުގޮތް ކަމަށް ދެކެވަޑައިނުގަންނަވާކަމަށް ވިދާޅުވެފައެވެ.
ރައީސުލްޖުމްހޫރިއްޔާއަށް އެޑްރެސް ކުރައްވާ ފޮނުއްވި ސިޓީގައި އަކްރަމް ވިދާޅުވީ އޭނާއާ ބެހޭގޮތުން ހުށަހެޅިފައިވާ މައްސަލައަކީ ކަންޑައެޅިގެން ހަޤީގަތާއި ޚިލާފް ވާހަކަތަކެއްގެ މައްޗަށް ބިނާކޮށް ހުށަހަޅާފައިވާ މައްސަލައެއް ކަމަށެވެ. އަދި އެފަދަ އެއްވެސް ކަމެއް ހިނގާފައި ނުވާނެ ކަމުގެ ފުރިހަމަ ޔަޤީންކަން އަރުވާކަމަށާއި އެކަން ހިނގާފައިވާގޮތުގެ ތަފްސީލީ މައުލޫމާތު ކޮމިޓީއާ ހިއްސާކޮށްފައިވާނެ ކަމަށް އަކްރަމް ވިދާޅުވިއެވެ.
މިނިވަން މުއައްސަސާތަކާއި ބެހޭ ކޮމިޓީގެ މުޤައްރިރު ރޮޒައިނާ އާދަމް ވިދާޅުވީ އަކުރަމް ވަކިކުރަން ނިންމީ އޭނާގެ މައްޗަށް ޖިންސީ ފުރައްސާރައިގެ ތުހުމަތުކޮށް އެކޮމިޝަންގެ އަންހެން މުވައްޒަފުންތަކެއް ހުށަހެޅި މައްސަލައަކާއި ގުޅިގެން ކޮމިޝަނަރެއްގެ ހުންނަންޖެހޭ ސުލޫކީ މިންގަނޑުތަކަށް އޭނާ އަމަލުތައް ނުފެތޭ ކަމަށް ކޮމިޓީއަށް ޤަބޫލުކުރެވޭތީ ކަމަށެވެ.
އަކްރަމް ވަކިކުރަން ފާސްކޮށްފައިވަނީ ބުދަ ދުވަހުގެ ބައްދަލުވުމުގައި ބައިވެރި މެންބަރުންގެ ތެރެއިން އެއް މެންބަރަކު ފިޔަވާ އެހެން ހުރިހާ މެންބަރުންގެ ތާއީދާއި އެކުގައި ކަމަށް ކޮމިޓީގެ ރޮޒައިނާ ވަނީ ވިދާޅުވެފައެވެ.
އިލެކްޝަން ކޮމިޝަންގެ މެމްބަރުކަމަށް އަކްރަމް ދެވަނަ ދައުރަކަށް އައްޔަން ކޮށްފައިވަނީ މިއަހަރުގެ މާރޗް މަހުގައެވެ. އިތުރު ދައުރަކަށް އޭނާ މަޤާމަށް އައްޔަން ކޮށްފައިވަނީ މަޖިލީހުގެ 77 މެމްބަރަކު ވޯޓާއި އެކުގައެވެ
